帶子花枝炸 & 豆卜魚腐 & 司華力腸 + 韓式上湯小籠包 + 麻醬拍青瓜 ( 24-JUL-2022 )

尋日嘅金邊粉   今晚點都要食㗎喇

特登煮個炒麵比里奧大人   咁聽日可以唔駛出去食

尋日喺 360 買㗎   $23/Pack 好抵咁   如果我唔想煮白飯   叫里奧大人拎盒番公司蒸熱都唔錯

( 24-JUL-2022  SUN )

今朝里奧大人鬧鐘響   之後繼續瞓 ~ 

9 點唔夠都起身   一起身嘅時候   原來我算係一覺瞓天光   但感覺係瞓到好似昏迷咁   即係自己瞓咗都唔知咁呀   哈哈 ~

梳洗之後就整早餐   之前買咗吞拿魚包   但原來得好少餡   所以又加塊芝士   其實我仲有 4 Pack 芝士   好似下年 1 月到期   我依家一個月先食 4 次   希望到期前食得哂啦 ~

食完就大清潔屋企   拖埋地就大清潔廁所   原來已經 10 點半啦   要快啲沖涼洗頭喇 ~

我出發前   都會熄哂啲制同關窗   但喺鎖門之前會再 Check 多次   所以我好鍾意里奧大人放假喺屋企   我唔駛搞咁多嘢   哈哈 ~

依家真係沖完等如無沖咁   塊臉搽 Cream 都無用   因為一出汗就要抹   幾時先結束夏天呀   今年真係特別熱   係全球都特別熱   天氣反常了 ~

崇拜完就等里奧大人放工   佢去買外賣   我就去超市買菜同香蕉 ~

見里奧大人未番到屋企   咁我都沖個涼先喇   之後佢番嚟都沖涼   依家真係覺得沖涼緊要過食呀   因為實在太熱呢   哈哈 ~

抖咗陣就同里奧大人一齊崇拜   之後我都瞓咗陣   出完汗係特別想瞓 ~

6 點 15 分左右開始預嘢   今晚特登煮多個炒麵比里奧大人聽日帶飯 ~

是日晚餐 - 帶子花枝炸 & 豆卜魚腐 & 司華力腸 + 韓式上湯小籠包 + 麻醬拍青瓜

帶子花枝炸 & 豆卜魚腐 & 司華力腸 - 間唔中要買定呢啲做儲備   唔想煮就焗嚟食喇 ~

韓式上湯小籠包 - 好想飲醋   所以蒸小籠包   哈哈 ~

麻醬拍青瓜 - 唔想煮菜   咁拍青瓜就最方便 ~

洗埋碗就開機洗衫   之後沖涼喇 ~

睇下 Youtube   今晚 11 點半都瞓覺 lu ~