打邊爐 ( 18-MAR-2023 )

仍然係沙爹湯底   里奧大人知道打邊爐就話要食辛辣麵   之後佢見咁多食物就話唔駛食麵喇

脆肉鯇 ($70) - 第一次買   魚佬問要肉定腩 ?!   我問佢番佢轉頭咩係肉同腩   哈哈   之後佢話大人食腩喎   同埋好似話大骨定咩   我都亂咗添   不過份量好多   仲剩番 5 件   下次應該買 $40 都夠了

牛板腱 ($31) - 本來要 $40 㗎   佢話駛唔駛要夠 $40 ?!   我話唔駛喇   屋企又有   同埋再比就肯定超過 $40 啦

韓國蠔 - 上次清完好開心   但今日又要買番佢   係咪煩呀   哈哈哈哈

蝦滑 ($25) - 里奧大人鍾意食   所以點都會買   但今次份量少咗咁噃   

響鈴 - 終於清哂喇   食落又唔滯喎   最搞笑里奧大人話我淥得耐   但我話喺雪柜拎出嚟㗎   都係淥耐啲好   唔知係咪咁所以唔覺油呢 ?!

鳳城水餃 - 買一打但只食咗 3 隻   聽晚又食佢喇

韓國金菇 ($10) - 今次終於記得買   仲要買 1 送 1 好抵呀   

粟米 - 好似上星期買㗎喇   都已經變成冰   好在及時發現   拿拿聲拎出嚟解凍   哈哈

 ( 18-MAR-2023  SAT )

尋晚去咗 2 次廁所   今朝 7 點 20 分都醒咗   感恩都算精神呢 ~

早餐都係食黑芝麻方包   食食下   里奧大人比粒麵包比我   我話唔要喇   之後又比   我話都話飽咯   原來佢話嗰粒脆卜卜好味   所以比我食   好在我唔係發脾氣話佢咋   唔係佢真係好慘囉 ~

菇場唔忙   傾偈上網好快放工 ~

放工買埋午餐就番屋企   食完就去買餸喇 ~

今次用咗 $5 Coupon   所以只係 $72   感覺係賺咗   哈哈

個包分開醬係好㗎   因為外賣會手 Fing Fing   整到成個包都係醬咁   好核突咁呢

搞掂哂就同里奧大人睇 "黑暗榮耀 2"   好想快啲睇哂呀   哈哈 ~

頭先見一盤啱啱出爐嘅嘢   感覺好煙韌咁   所以問人係咩啦   佢話係蕃薯餅   之後我又好想知幾錢又問啦   佢答五蚊   咁我就買啦   其實幾錢都會買㗎喇   搞搞震問人咁多嘢仲唔買咩   但估唔到係好好食   好煙韌同埋個邊係脆脆地   希望下次再有啦

睇到 5 點半左右就停喇   因為要預備晚餐 ~

今晚又打邊爐   難得天氣仲未熱嘛   哈哈 ~

洗埋碗就沖涼   抖陣又再睇 "黑暗榮耀 2"   今晚終於睇哂喇   好在節奏都快同埋唔算爛尾啦   哈哈 ~

再睇多陣 Youtube   今晚 11 點都瞓 lu ~