蕃茄肉碎意粉 + 菠菜苗 ( 31-JAN-2024 )

 

( 31-JAN-2024  WED )

尋晚半夜去廁所   之後瞓番都係咁發夢   今朝 6 點 45 分醒咗   但瞓得唔好   所以唔做運動喇 ~

我同里奧大人講話今朝無去做運動   佢話唔做咪唔做囉   無咩問題   唔駛咁激進喎   呢句好笑   因為佢知我一係唔做   一做就要博命做咁   哈哈 ~

今朝里奧大人去買早餐   佢話早餐食包食到悶喎 ~

早餐食沙爹牛肉麵餐   我話做咩食麵嘅 ?!   原來佢唔記得轉米線呀   不過其實我都無咩所謂 ~

菇場忙下停下   咁就好喇 ~

Lunch Time 行陣再去食白粥 + 炸兩   一路食一路想出汗咁呀   所以真係要慢慢食   哈哈 ~

食完去買菜   我多數問有無蔥 ?!   菜婆話即刻種棵蔥比妳都得啦   阿婆聽到話咩咁犀利即刻種棵蔥呀   之後菜婆話人哋咁靚女   要咩都得啦   好在我戴咗口罩咋   唔係比人反白眼都似 ~

不過咁   街市啲人   係咪都叫靚仔靚女㗎喇   所以有時都唔知應唔應佢好   哈哈 ~

唔忙就做自己嘢   時間就會過得好快㗎喇 ~

放工即走   叫里奧大人幫手蒸蘿蔔糕   咁我番嚟就可以預備晚餐 ~

咁我切嘢嘅時候   里奧大人問點解咁耐都仲未食得 ?!   啲糕蒸咗好耐喇喎 ?!   我話今晚點會就咁食糕呀   我仲會煮意粉呀   之後佢 "哦" 一聲就走咗去 ~

是日晚餐 - 蕃茄肉碎意粉 + 菠菜苗

蕃茄肉碎意粉 - 用現成蕃茄醬汁   但我加咗乾蔥頭同蒜頭   再加幾棵高山小香芹   咁味道就提升好多啦   哈哈 ~

菠菜苗 - 又轉下食呢啲菜   最緊要輕呀   不過就要浸耐少少   因為好多泥呀 ~

  

洗埋碗就開機洗衫   搞掂就沖涼 ~

里奧大人幫手熨衫   我就可以休息一下喇 ~

睇 "深圳地圖" 同睇陣 Youtube   今晚 10 點 40 分都瞓覺 lu ~

煎釀三寶 (外賣) + 臘味蘿蔔糕 + 菜心苗 ( 30-JAN-2024 )

食剩一半   聽晚再食

( 30-JAN-2024  TUE )

尋晚半夜又比里奧大人嘈醒   又要起身塞耳仔 ~

今朝都起身做運動   雖然有啲攰   但呢刻都要堅持去做   哈哈哈哈 ~

早餐食牛油窩夫   焗到脆卜卜真係好味道   依家唔會搽牛油花生醬   因為本身都好夠牛油味呢 ~

菇場唔忙   又做下自己嘢先 ~

問家姐要唔要黑糖 ?!   之後問佢會唔會去買增城片糖 ?!   佢知道我想要   就叫工人即刻去買   我已經強調話唔急㗎   無都無問題   但佢話記得新年前先有得買㗎   所以最後買咗 4 包   每人 2 包

Lunch Time 出去行陣   食完墨丸河又周圍行   差唔多 12 點 40 分就番菇場喇 ~

阿齋話我做咩空手而回   我話今日真係無嘢好買   哈哈 ~

唔忙就做自己嘢   咁啲時間就好快過㗎喇 ~

放工即走   因為今晚只係食蘿蔔糕   所以叫里奧大人買煎釀三寶   之後諗諗下都係唔好買   我買麻辣手撕雞好過 ~

咁差唔多落車啦   里奧大人打比我   話買咗煎釀三寶   我話好彩打比我咋   唔係我買手撕雞㗎喇 ~

佢話本身想比驚喜我   因為我好少叫佢買嘢食   咁即係代表我想食   好在最後都係驚我會買嘢   所以打比我話買咗呢 ~

因為蒸糕要時間   我叫里奧大人沖涼先 ~

是日懶餐 - 臘味蘿蔔糕 + 菜心苗 + 煎釀三寶 (外賣)

煎釀三寶 (外賣) - 里奧大人揀㗎   每款 2 件啱啱好   佢話買嘅時候係新鮮熱辣   所以好想我快啲番到屋企食呢 ~

臘味蘿蔔糕 - 家姐之前比嘅奇華臘味蘿蔔糕   估唔到好味喎   仲有一條條嘅蘿蔔絲   其實本來諗住遲啲先食   不過家姐擺咗落冰格   我冰格又無位放   所以就要今晚食囉   里奧大人都好奇怪咁早就食糕   哈哈 ~

菜心苗 - 終於清哂   又要轉下食第啲菜喇 ~

洗埋碗就開機洗衫   之後沖涼 ~

叫里奧大人熨衫先   咁就可以一路食蕃薯糖水   一路睇 "長命百二歲" 同開電視嘅 "深圳地圖" 喇 ~

影相就唔會落咁多糖水   里奧大人以為係無哂糖水   哈哈

里奧大人話好似南瓜湯

睇多陣 Youtube 又打陣機   話咁快又 10 點半   我都要瞓覺喇 ~

鵝肉炒米粉 + 菜心苗 ( 29-JAN-2024 )

剩番一堆骨同皮   但呢啲先好味呀   哈哈

( 29-JAN-2024  MON )

尋晚半夜比里奧大人鼻寒聲嘈醒   真係一瞓着就比佢嘈醒   如是者都有半個鐘   我頂唔順好大力起身   順便校番鬧鐘到 7 點 25 分同埋去廁所 ~

里奧大人都問咩事 ?!   我話你啲鼻寒好嘈呀   最後我都係塞耳仔瞓   你知啦   星期一無精神番工好慘家嘛   哈哈 ~

今朝都唔做運動啦   唔夠瞓做運動好危險㗎 ~

尋日家姐比咗合桃包同芝士包   咁今朝早餐就一定食佢哋啦 ~

合桃包口感好 Soft   反而芝士包就無咁 Soft   家姐話因為佢壓扁咗   我話關咩事   佢真係好好笑   次次比我嘅嘢   一壓扁咗又或者整爆咗   佢就好唔開心㗎喇 ~

依家要煲薑茶   所以就要多啲時間   不過最緊要里奧大人飲完覺得舒服就得㗎喇 ~

呢排都係遲咗 3 分鐘先番到菇場   估唔到里奧大人同家姐都話 3 分鐘咋嘛   我話咁都叫遲到嘛   始終西瓜又好早番   基本上我哋 8 點半番到去   佢都覺得遲㗎 ~

咁菇場都唔會話人遲到嘅   因為我算早番嗰批   好多同事 9 點 15 分先見人 ~

之前好擔心里奧大人   之後我隻右手食指濕疹   差唔多兩星期都未好添 ~

菇場忙咗陣就做自己嘢喇   所以好快就到 11 點 45 分 ~

Lunch Time 出去行陣先去食鯪魚球米   食完就去買蔥蒜同韭王   買完行陣就番菇場   原來已經 12 點 45 分喇 ~

唔忙就做自己嘢   咁都叫做有嘢做㗎   哈哈 ~

放工即走   番到屋企都即預備晚餐   今晚算快   6 點 45 分可以開餐 ~

是日晚餐 - 鵝肉炒米粉 + 菜心苗

鵝肉炒米粉 - 唔怪得硬係覺得爭咁啲嘢啦   原來係無加到雪菜粒呀   哈哈   不過鵝肉都好夠味   我炒米粉都唔駛加豉油 ~

菜心苗 - 本來想再淥多啲菜   不過里奧大人話想食蕃薯糖水   咁唔煮咁多菜喇 ~

洗埋碗就煮蕃薯糖水   之後做埋小清潔先去沖涼 ~

等埋里奧大人沖完涼就食蕃薯糖水   之前我焗蕃薯   我話因為買咗太多嘛   佢頭先話我原來真係買咗咁多   我話呃你有鬼用咩 ~

睇陣電視同 Youtube   又打陣機   今晚 10 點 27 分都瞓覺喇 ~

燒鵝 (外賣) + 菜心苗 ( 28-JAN-2024 )

( 28-JAN-2024  SUN )

今朝同里奧大人食早餐   食完就自己去家姐屋企喇 ~

我一坐低就除褸   里奧大人就話妳着短袖咁勁嘅   我話今日應該無咁凍啩 ~

搭車嘅時候   阿妹 Whatspp 問我喺邊 ?!   以為有事搵我幫手   原來佢話次次喺 Pantry 食早餐就諗起我   可以一齊傾偈   我話今朝比佢一個人靜下啦   哈哈 ~

9 點左右就去到家姐屋企   因為我自己開門   Berry 見到我入屋有啲驚咁 ~

同 Berry 玩咗陣   家姐同姐夫都番屋企 lu ~

成日唔理我

要我行嚟行去影相

衰眼

佢可能覺得連星期日都唔放過佢   哈哈

家姐話佢短鼻就得意   我話唔係成日影到

又嚟咁望我喇   哈哈哈哈

佢今朝幾乎全程咁望我呀   之後我同家姐傾偈   我摸下佢啦   佢對眼真係斜啤我咁㗎   家姐望到佢都覺得佢衰呀   哈哈

家姐每次一番到屋企   第一時間換好衫   就會拎佢要比我嘅嘢   真係好驚唔記得咁   哈哈 ~

糟糟送比我同家姐嘅蛋卷

糟糟媽喺 Simply Life 買咗合桃包同芝士包比家姐   佢又每樣比兩塊我   咁我聽朝可以有早餐食   呵呵   佢仲有另一款味道嘅包添㗎   不過我話唔要啦   四塊麵包真係好夠囉

佢買咗開心果同紅/黑瓜子   佢想每樣比啲我   不過我話唔要   因為呢包開心果   如果一開就要好快食哂   唔係腍咗就唔好食啦   佢覺得我唔要就講呢啲   我話真係㗎   我上次買過啦   放喺密封盒都好快腍㗎

傾下傾下   又傾下無聊嘢   我問家姐遲到半個鐘   會食咩早餐 ?!   佢話食個包啦呀嘛   佢同里奧大人又係咁嘅答案   我都係話食包   仲要係餐包呢啲無香味嘅包   我話佢食糯米雞   佢哋個樣都好愕然   哈哈 ~

家姐先搞笑   話我今日係咪特登嚟拎臘鴨 ?!   我話咁急就上次已經文收咗啦 ~

糟糟都好奇怪點解我唔駛番教會   哈哈   家姐就開啓錄音機   話阿妹話依家只係要第 2 同第 3 個星期日事奉   所以第 4 個星期日可以嚟探 Berry ~

其實真係好感恩   因為我今年都想一個月探兩次 Berry   但之前應承咗鴛鴦   所以都係算啦   點知上兩個星期   藍藍姐姐話想我休息一下   唔駛每個主日都番   咁真係太好喇   我其實都有講話唔好意思   始終應承咗鴛鴦嘛   但藍藍姐姐話唔駛唔好意思喎   又唔係番工   哈哈 ~

我估上次我唔舒服無講   但都頂到最後   所以佢哋覺得我需要休息都未定 ~

難得 Berry 比我抱   我叫家姐快啲幫我影相留念呀   之後佢話手機叉緊電呀   我即叫佢拎我部手機影   佢未拎起我已經講定密碼比佢聽   因為 Berry 好衰㗎   我郁一郁佢肯定會跳落嚟   所以同佢鬥快   哈哈

佢個樣幾唔願意呀   依家佢真係好重   我抱咗真係 1 分鐘唔夠   我條腰都有啲痛喇

同家姐又傾下偈   之後先知工人今日放假   只係喺房瞓覺   我話好彩頭先無喺 CCTV 大叫 Berry 咋 ~

今日 Berry 就乖喇   我同家姐坐喺梳化傾偈   佢就全程坐我咃中間   仲瞓埋添 ~

咁講開 Berry 食藥   佢話 44 磅要食兩粒   我話 Berry 肥到 44 磅喇 ?!   上次妳話 37磅 咋喎   之後佢一路笑一路話   因為 Berry 37 磅所以要食 44 磅份量嘅藥   真係吖   講嘢講清楚啲嘛 ~

12 點鬆啲走   因為想趕到呢班車   所以家姐唔帶 Berry 送我走喇 ~

買埋午餐就番屋企   估唔到喺成興隆見到皇太后   咁我捉住佢隻手   嚇到佢以為邊個捉住佢   之後我同佢一齊影張相比里奧大人睇   里奧大人話咁有緣呀   哈哈 ~

本來我都無諗住去買免治豬肉   但去開黃埔就買啦   估唔到咁都見到皇太后   又同佢研究下啦   佢仲問我點睇啲肉新唔新鮮 ?!   我答啱咗   佢幾開心呀   覺得我終於識分啦   哈哈 ~

之後再望佢隔離   原來仲有兩位姊妹   等我仲係咁同皇太后傾偈添 ~

最搞笑佢哋係 1 點半要去安息禮拜   但皇太后 1 點 15 分都唔捨得走呀   我話我四完就走喇   佢先肯走 ~

咁又翹住我手   陪我行去買燒鵝   我話妳好快啲走喇   佢哋兩個都唔知去咗邊   皇太后話唔駛驚啦   佢自己都識行去 ~

真係比皇太后笑死   一行街睇嘢就咩都唔理咁   同糟糟媽一樣   又係一路行一路買圍望   唔會直望   我同里奧大人講話女人多數係咁㗎   鍾意睇嘢買嘢   佢話係妳哋先係咁咋   哈哈 ~

同里奧大人 Share 食叉燒油雞飯

想清冰格   所以蒸哂啲魚肉燒賣   但好後悔   因為每人食兩粒都已經好飽囉   最慘燒賣凍咗好難食嘛   唔係留番晏啲食都得

上次糟糟再去西環   咁啱見到有臘鴨肶   所以家姐即叫佢買四隻呀   我同家姐每人 2 隻

家姐公司派臘味蘿蔔糕   所以佢又比埋我

呢盒係半隻燒鵝 ($190)   家姐話抵呀

里奧大人食完就瞓晏覺   我就睇陣 Youtube 先   不過睇到 4 點都瞓咗   瞓到 4 點半都醒 lu ~

越坐越凍   咁起身熨兩機衫啦   真係暖番啲咁㗎 ~

5 點幾預備晚餐   所以 6 點半可以開餐喇 ~

是日懶餐 - 燒鵝 (外賣) + 菜心苗

燒鵝 (外賣) - 其實都預咗食兩餐   但我唔想買 1/4   因為感覺好似切開整燒鵝飯咁   我依家睇住佢切開半隻   咁樣好啲   哈哈 ~

菜心苗 - 又食番佢喇   今晚加咗啲鵝油上去   當堂好味哂呢 ~

洗埋碗就開機洗衫   之後沖涼休息喇 ~

同里奧大人一齊睇 "臥底旅行團"   睇完又睇陣 "肌肉山山" ~

今晚里奧大人 10 點半都瞓覺   我就 10 點 45 分先瞓覺 ~

梅姐水餃 @ 土瓜灣 ( 27-JAN-2024 )

韭菜鮮肉煎餃 (50) - 呢個好味呀   可能新鮮炸起   最鍾意蘸醋同辣椒醬一齊食

四寶酸辣粉 ($45) - 里奧大人想食酸辣粉   但其實佢唔係咁鍾意食呢啲餸   哈哈   我都覺得啲餸真係麻麻   好在個湯底都夠酸辣

( 27-JAN-2024  SAT )

今朝 5 點半起身去廁所   之後瞓到 7 點先去做運動 ~

同里奧大人出去食早餐   食完就番工喇 ~

菇場得 7 個人番咋   所以好鬼靜 ~

同家姐傾咗大半個鐘頭電話   之後就覺得好快放工咁   哈哈 ~

今日放工要同里奧大人去整嘢   所以一齊食午餐喇 ~

食完去整嘢   感恩 3 點左右搞掂 ~

番到屋企就抖下   之後就做咗陣小清潔 ~

前前後後買咗接近十磅蕃薯   所以又焗嚟食下   里奧大人以為我好肚餓   我話想快啲清哂啲蕃薯呀 ~

一家四口

細隻就甜   下次主攻細隻   哈哈

睇下 Youtube 又到 5 點幾   要出發番崇拜喇 ~

崇拜完畢就諗住食扒   不過食店 Full 哂   所以都即轉場   咁諗住買煎釀三寶啦   但又預備收檔 ~

咁今晚可以試新嘢喇   反正唔係咁餓   食餃子都唔錯 ~

食完都即番屋企   開埋機洗衫就沖埋喇 ~

睇下電視又睇下 Youtube   今晚 11 點先瞓 ~

薩莉亞意式餐廳 @ 紅磡 ( 26-JAN-2024 )

水牛芝士薄餅 ($30) - 我覺得無肉嘅都好味   可能芝士都夠濃味   哈哈

原味雞翼 ($20) - 雞翼好入味   同埋係熱辣辣   我都要灘凍啲先食呀

中華海草 (雙倍) ($18) - 里奧大人必食㗎   我話咁價錢咁份量   真係好抵食

蕃茄煙肉意大利粉 ($30) - 今次都算多煙肉

香焗白汁菠菜 ($20) - 我話想食啲熱嘢   呢個就肯定夠熱

( 26-JAN-2024 FRI )

今朝 6 點半醒咗   但 6 點 45 分先起身出去做運動 ~

整埋早餐再煲薑茶   其實下次我拎番公司飲都好喎   反正煲開   哈哈 ~

里奧大人尋晚發冷無咩點瞓   所以今日要請假呀   不過尋晚我都覺得好凍   可能開大咗個窗呀 ~

早餐食甜餐包搽醬占   好耐無咁食   覺得好甜   哈哈 ~

尋日買咗幾個麻糬   諗住今朝試下   不過最後都係食唔落添

菇場唔忙呀   阿怪 9 點半番嚟   早餐仲係食糯米雞   真係頂佢唔順啦   係人遲到都只會食麵包   因為始終係開工時間嘛   仲點可以咁嘆食早餐呀 ~

Lunch Time 出去行陣再食鯪魚球河粉   食完又行陣   買埋蕃薯就番菇場喇 ~

唔忙又做下 Filing   咁唔駛成日望住電腦   哈哈 ~

放工即走   今晚好攰呀   所以唔煮喇 ~

同里奧大人食完再去屈臣氏   咁諗住買兩件裝嘅積熱清又無貨   咁買一件裝啦   寧願補錢   因為想快啲搞掂   唔駛又再嚟多次 ~

經過見到有得賣煎釀三寶嘅食店   仲只係 $12/4 件   所以買番屋企試   如果好食嘅話   第時叫里奧大人放工買嚟做餸都好   哈哈 ~

買完就番屋企沖涼休息喇   里奧大人就要食埋尋晚食剩嘅蕃薯糖水   我話唔想留咁耐呀 ~

睇 "長命百二歲" 同 "無垠次彊"   之後再睇下 Youtube   今晚 10 點 45 分先瞓覺 ~