中午食剩嘅口水雞 今晚要食埋去
( 20-JAN-2024 SAT )
尋晚一瞓上床 簡直係天旋地轉呀 不過無同里奧大人講 唔係佢一定要我今日喺屋企休息呢 ~
感恩都一覺瞓天光 6 點 50 分都醒咗 咁都起身沖涼洗頭喇 ~
其實都仲有啲暈暈哋 總知洗頭唔好 "dup" 低頭就可以 ~
今朝 7 點 50 分都去到家姐屋企 好在今日工人唔係放假 如果唔係驚嘈住佢瞓覺嘛 雖然我都係自己開門 ~
Berry 一見到我就尖叫啦 工人話 Berry 係開心喎 話開心嘅叫聲同惡嘅叫聲係唔同喎 講到似層層 ~
又話 Berry 有三個男朋友 白色狗 拉布拉多同柴犬 話 Berry 見到佢哋嘅時候 啲叫聲係唔同㗎 又話如果家姐叫 Berry 佢就會越叫越走 呢樣我都知 所以 Berry 真係有啲痴痴哋線咁 哈哈 ~
好攰嗎 ?! 都明白嘅 7 點幾就比人嘈住哂 哈哈
精神啲好無 ?!
側臉睇又幾精神咁噃
對耳仔真係好大隻
一見零食就當堂醒哂
哈哈哈哈哈哈 家姐話好似貞子
其實我好細力㗎咋 如果大力 佢一定咬我
坐到直不甩
唔知望到咩
之後又即瞓低
9 點唔夠家姐打嚟叫我去食早餐喇 食下傾下又 10 點 ~
好耐無食呢兩個早餐 味道一樣咁好味呀
食完去屈臣氏睇嘢 買滿 $188 有 88 折 咁啱家姐想買舒適達牙膏又做特價 買四支 (每支 $39) 送福麵 / 蛋卷 / 三包洗衣珠 咁買多支牙膏就滿 $188 好過買其他唔等駛嘢 ~
家姐話今朝特登拎起個環保袋 點知有嘢買 不過我話唔驚啦 我可以幫手拎嘛 其實都係拎嗰 5支牙膏 呵呵 ~
不過我都叫家姐慢慢行 因為我有啲頭暈呀 之後佢又話我耳水不平衡 ~
番到屋企 Berry 又怪叫 真係好得意呀 哈哈 ~
家姐搵耳環 之後話我好耐之前送咗一對男女鑽石耳環比佢 我真係完全唔記得送過噃 之後再搵番糟糟送比佢嘅 Isabella 耳環 我就可以戴佢新買嘅 Isabella 耳環 其中一隻係十字架 話我一定鍾意 所以佢根本係預咗比我咁 哈哈 ~
執下執下 佢比咗條 Swarovski 水晶頸鍊比工人 工人見到好開心呀 之後又係咁影相 咁就好啦 唔好浪費嘛 ~
之後又話比鑽石手鍊同戒指比我 我話唔要啦 我都唔戴嘅 ~
搵咗好耐終於搵到啲耳環 咁家姐就即戴佢啲舊耳環 哈哈 ~
咁我本身右耳窿有時都會痛 所以會叫里奧大人幫我唧啲嘢出嚟 咁先唔痛 家姐就叫工人幫我試下戴隻耳環 因為家姐話有嘢唧出嚟 咁即係唔係密咗啦 佢講嘅係有道理嘅 哈哈 ~
工人好細力咁幫我戴 感恩終於戴到喇 ~
咁到左耳嘅 2 個耳窿 我同家姐話應該密咗 之後工人又試下幫我戴啦 佢係好細力咁慢慢 "吉" 入去 之後突然間把聲好沉重咁講 "穿咗喇" 嚇死咩 因為我同家姐都以為左耳一定密咗 工人無啦啦咁講 以為穿咗啲咩呀 哈哈 ~
大家都戴完耳環 又坐低傾下偈啦 ~
家姐話好似幾好味咁 所以叫埋工人一齊食
糟糟之前買咗好多 係都要比部家姐
工人將 Berry 過手比家姐抱 之後家姐過手比我抱啦 佢咬我呀 真係次次都無可能抱到佢囉 咁工人之後話佢啦 佢即跳上梳化 個頭仔挨哂落我度扮慘呀
家姐今晚同糟糟 6 點半食飯 咁午餐食蛋糕麵包就夠了 之前我比咗啲百香果比佢 佢就加梳打水一齊飲 我就咁齋食㗎咋 當飯後果呢
1 點要走喇 我話要拎臘腸 之後家姐話仲有梅菜同蠔豉呀 真係唔講唔記得添 呢排真係擔心里奧大人 搞到無哂記性 ~
家姐同工人一齊同 Berry 行街 咁順便送我搭巴士 好在工人識行 Short Cut 去到巴士站啱啱有車 真係差 1 秒都趕唔切呀 感恩感恩 ~
里奧大人話去十二味 咁就好喇 因為呢排佢都只會話無胃口 叫我諗食咩呀 ~
食咗 2 件咋 所以幾乎成個套餐打包番屋企 哈哈
今次嘅酸菜魚份量 又多番咁噃
食完都番屋企休息 我都唔做家務住喇 ~
家姐比嘅貓山王榴槤
家姐叫燴燴買嘅蠔豉 / 梅菜 / 臘潤腸 再加埋三隻耳環 今日送比我嘅嘢接近 $2,000 我話耳環就係生日禮物 所以今年唔好比利是我 之後又話生日還生日 呢啲只係新年禮物 真係咩都任佢講 哈哈
家姐買呢支洗頭水比我 因為佢唔係成日出寶琳 但佢就成日記得要買 上星期工人咁啱出寶琳 所以家姐即刻叫佢幫手買呀 所以都要感激工人幫我買呢
睇下 Youtube 好快又到 6 點半 係時間預備晚餐喇 ~
是日晚餐 - 蝦肉炒飯 + 豆苗
蝦肉炒飯 - 今日中午食剩碗白飯 咁整炒飯啦 里奧大人鍾意食嘛 材料係六隻蝦 + 兩條海鮮卷切粒 炒完先記得無加雞蛋 ~
豆苗 - 終於食哂 我都鍾意食豆苗 下次見到再買 哈哈 ~
洗埋碗就沖涼 之後就休息喇 ~
之前喺 Big C 買嘅零食 順便買埋比家姐工人同佢朋友 好在好味咋 哈哈
睇下 Youtube 又打下機 今晚 11 點幾先瞓 ~
沒有留言:
發佈留言