黑椒牛肉炒烏冬 ( 21-JAN-2024 )

( 21-JAN-2024  SUN )

尋晚又係咁   一瞓上床又天旋地轉   我要用隻手托住個枕頭   托咗一陣無咁暈先再放平呢 ~

今朝 7 點起身   但仲係見暈   所以灘喺床抖多陣先落床   里奧大人話我肯定唔舒服   因為我未試過咁㗎   不過我話想陪佢食早餐   最多食完唔舒服先再番屋企休息呢 ~

食完就去里奧大人公司   不過今朝都無咩點幫手   只係同阿妹傾偈咋 ~

崇拜完之後就去買餸同麵包   買完都已經 12 點幾咁滯   要即番屋企喇 ~

我無咩胃口   真係食哂盒酸辣鳳爪就算喇   咁睇個盒以為好多鳳爪啦   點知得嗰三小隻   仲要細細隻   真心有啲失望   所以基本上我係食洋蔥同蔥咁   哈哈   最後將個迷你雞飯   一半留番比里奧大人聽日午餐   一半就比我做聽晚晚餐呢

煲薑茶比里奧大人   但怕太辣   所以即加幾粒圓肉   等佢一陣開會可以飲 ~

搞掂都 1 點   要去買午餐喇 ~

咁啱鴛鴦見到我   話今日開會其實我都要出席㗎   我仲以為唔關我事添   之後佢話都估到㗎喇   因為我同 KY 姐姐都無出現   哈哈   仲話一年基本上會開三次會嘅   咁我依家知道啦   下次必定會到   哈哈 ~

去里奧大人公司一齊食午餐   里奧大人食完開會   我就買埋黑糖先番屋企 ~

估唔到半日都行咗 12,000 步   但又唔覺攰喎 ~

番到屋企抖陣就做大清潔   做完又抖下   5 點左右就煲蕃薯糖水 ~

今日無開會都有小禮物   所以好開心呀   哈哈

里奧大人開會開到 7 點半   本來走得㗎   但佢啲同事知里奧大人呢排唔舒服   所以一齊傾下咩問題   傾到 7 點 45 分先走 ~

感謝父神   里奧大人公司好多同事都為着里奧大人身體禱告   因為佢啲同事見到我   都會問里奧大人身體點樣 ?!   佢哋都好擔心里奧大人呢 ~

本來講好今晚食豬潤米粉   但食店 7 點半收   所以我話我煮飯啦   唔想食外賣 ~

是日晚餐 - 黑椒牛肉炒烏冬

黑椒牛肉炒烏冬 - 完全唔記得前晚已經解凍咗牛肉   所以今晚煮埋去就仲好添   煮呢個烏冬真係最多 10 分鐘   人生第一次覺得自己煮嘢咁快手呀   哈哈

洗埋碗都即沖涼   抖到 9 點就食蕃薯糖水 ~

同里奧大人一齊睇 "臥底旅行團"   今集都幾搞笑   最難得係里奧大人都一路睇一路笑   佢呢排成日唔舒服   好難見到佢笑呢 ~

睇多陣 Youtube   今晚 10 點 15 分都瞓覺喇 ~