金城小廚 @ 大圍 ( 30-JUN-2024 )

古法焗魚腸 ($128) - 好難得有呢個餸呀   只記我細個嘅時候   婆婆成日整㗎   婆婆煮嘢又係超級好食   第 2 個就係糟糟   我就永遠無可能係第 3 個   哈哈

金城小炒皇 ($128) - 家姐都鍾意食小炒皇 

椒鹽鮮魷 ($128) - 勁好味呀   最鍾意係炸粉唔厚

鳳凰生炒骨 ($100) - 呢個失色咗   因為炸得唔夠脆

楊州炒飯 - 我無食   但佢哋話好味道

粉葛雞腳豬骨湯 (免費) - 好飲喎

( 30-JUN-2024  SUN )

今朝同里奧大人一齊食早餐   之後就去佢公司坐下 ~

陪阿妹食早餐   之後又幫下手做嘢   搞掂就要去番崇拜了 ~

崇拜完畢就番屋企休息下   又睇下 Youtube   估唔到由 12 點半瞓到 12 點 50 分呀   不過瞓醒之後又真係精神好多呢   哈哈 ~

係時候出發去里奧大人公司   等埋佢收工就去油塘喇 ~

今次好感激里奧大人   佢特登早少少放工陪我去拜爸爸媽咪   因為多數佢帶路 ~

其實今次係加拿大番嚟嘅姑姐約埋堂二哥一齊拜爸爸媽咪   我約咗佢哋 2 點 15 分   我哋 2 點鐘已經到   再望個背影好熟   原來真係姑姐 ~

堂二哥就 2 點 15 分先到   我哋食埋下午餐先出發呢 ~

真係好少好少見堂二哥   我初初都好驚唔知傾咩好   但估唔到佢係好多嘢講   哈哈 ~

順化香茅豬扒飯 ($60) - 都幾好味   同埋豬扒份量都算多

 

煙燻鴨胸肉燒汁蘑菇炒意粉 ($71) - 我都鍾意食炒意粉

拉絲芝士菠蘿辣肉腸8吋披薩 ($58) - 都好多芝士   但唔係咁鍾意個餅底

炸蝦餅 (追加 +$30) - 好味呀

安南炸春卷 (追加 $18) & 香茅雞翼 (追加 $30) - 春卷好多餡料   同埋都好大條   諗住追加係細細條咁咋   雞翼就普通咗啲

差唔多 3 點半就去搭的士   今次的士司機喺的士站落車   但就兜咗個大圈呢   因為平時落車位置要行一段路仔   不過今日堂二哥隻腳都整損咗   行路都拐下拐下咁   咁的士站落車都好㗎   因為都近爸爸媽咪個位置呀 ~

今日拜爸爸媽咪   我只係喊咗幾下   因為唔想喺姑姐面前喊得咁犀利呢 ~

我話家姐就每年清明重陽會嚟拜祭   我就唔會同佢哋一齊嚟   因為佢哋係燒好多嘢   姑姐話其實父母合埋眼   都唔知妳哋做咗啲咩   生前孝順先至啱啦 ~

我話係姐夫麻麻煩煩啫   家姐真係好孝順媽咪   結咗婚都晚晚陪媽咪食飯   假期陪媽咪飲茶   自己對比家姐   我真係覺得自己不孝添呀   嗰時家姐仲住元朗   同埋要番工   佢番到屋企都 10 點幾   我反而住得近都無咁做   唉 ~

差唔多 4 點半就走喇   搭的士去油塘再轉地鐵去寶福山 ~

好感恩無落過雨   因為頭先嚟嘅時候已經係咁嘅天色呢

去到啱啱好 5 點   向姑姐默禱之後   我同里奧大人就要坐出面幫手喇 ~

頭先出完一身汗   大酒店冷氣又勁凍   咁里奧大人有着外套   佢叫我帶但我無帶   之後成日問我凍唔凍 ?!   我梗係話唔凍啦   佢仲話我好勁   咁凍都覺得唔凍   真係有苦自己知啦   哈哈 ~

咁我有時都入去傾下偈   咁啱姑姐話想食瑞士卷   佢以為要食哂一盒 5 件呀   始終佢喺加拿大生活咁多年   唔知香港人啲生活習慣   之後我話放心啦姑姐   妳只係食 1 件㗎咋   2 表嫂話食兩件都得嘅   哈哈 ~

我哋 8 點 15 分走喇   大表哥話驚附近食店好早收   所以係咁叫我咃走 ~

今晚同埋堂二哥同姑姐一齊晚飯   其實都係即慶   因為初初諗住姑姐同表哥佢哋一齊食嘛 ~

我對大圍完全唔熟   好在糟糟介紹呢間食店   大家都覺得味道唔錯呢 ~

食下傾下   堂二哥話爸爸養魚   養到直頭係玩物喪志呀   哈哈   不過講講下又記得以前養魚   爸爸成日換水   之後好似買咗條食人魚番嚟添呀   我同家姐好驚囉   媽咪又成日帶我同家姐睇鬼戲   所以我哋好多童件陰影   哈哈～

食到 9 點半左右就走   咁啱表哥佢哋又食完   我同佢講話呢度入嚟食嘅人都係喺大酒店出嚟   因為全部黑衫黑褲   之後佢話仲要同一時間   哈哈 ~

佢哋 1x 個人   所以佢哋喺隔離房食   無諗過佢哋咁早走囉   唔係約埋一齊啦 ~

全部人同一方向去搭車   之後又一路行一路傾   不過大家就唔同路線   所以入閘就各自歸家喇 ~

番到屋企都 10 點半喇   即刻沖涼休息 ~

睇多陣 Youtube   今晚 11 點 15 分都瞓覺 lu   出咗一身汗好攰呀 ~

牛油煎帶子 + 香草炒粟米 + 日式冷烏冬 ( 29-JUN-2024 )

( 29-JUN-2024  SAT )

雖然一覺瞓到天光   但我又好想再瞓   所以忍唔住望下個鐘只係 6 點 50 分   咁真係要繼續瞓啦 ~

今朝同里奧大人出去食早餐   佢要帶我試新嘢   哈哈   其實佢講咗好多次要去食   不過我話唔去   因為我只可以星期六日先食通粉餐   平日食通粉就肯定食唔落午餐囉 ~

即磨咖啡好普通

豬柳漢堡扒通粉 ($44) - 豬柳好味呀   但豬骨湯底唔係咁熱   唔係就會好食好多呢

慢煮雞胸通粉 ($46) - 啲肉 '鞋" 嘅   同埋里奧大人話今次多咗好多通粉呀

我問里奧大人我煮飯有幾多分 ?!   佢話 80 分   我話都算多喎   之後佢好感激嘅口吻話我因應佢口味嚟煮   我再話如果唔好食要出聲呀   佢衰衰格格咁笑住話我心情好就敢講啫   心情唔好仲敢話唔好食呀 ?!   呢兩句好笑呀   真係講中咗喎   哈哈 ~

菇場忙先奇啦   得 9 個人番工   靜英英 ~

西瓜問我哋有無嘢上工廠   司機話無   西瓜話又會你答嘅   我都忍唔住笑咗出嚟 ~

今朝打去診所問子宮鏡細胞抹片報告結果   感恩報告正常 ~

放工即走   番屋企坐陣先去食下午茶 ~

迷你叉燒飯 ($50) - 我覺得飯嘅份量都好多呀

我叫肥叉   但唔覺得肥噃

脆脆肉絲炒麵 ($50) - 今次脆麵部份唔係太多   但仍然好味道

食完就番屋企   我睇福寶   里奧大人就瞓晏覺   不過瞓到 4 點 45 分都要起身㗎喇 ~

今晚有重要人物去里奧大人公司探訪   所以我今日同里奧大人想一齊去接待佢哋呢 ~

今次見面   覺得世界真係好細   哈哈 ~

差唔多 6 點就走喇   番到屋企即刻煮晚餐喇 ~

是日晚餐 - 牛油煎帶子 + 香草炒粟米 + 日式冷烏冬

牛油煎帶子 - 上次喺樓上買咗急凍帶子   咁今晚可以煮新嘢   職員教用牛油煎   煎完落少少鹽調味就可以㗎喇   所以跟足佢教法   里奧大人話好味   家姐話煎得好靚   其實呢個餸係無難度   只係睇有無心機煎   哈哈 ~   

香草炒粟米 - 我覺得煎帶子係西餐   所以唔想買菜心   咁特登去超市買西蘭花又無哂   里奧大人話食粟米得啦   真係第一次聽佢咁講   因為佢同家姐知道我胃唔好   唔可以食咁多粟米呢 ~

日式冷烏冬 - 里奧大人鍾意食呀   咁就好啦   因為佢本身唔係咁鍾意食烏冬   不過幼身烏冬又 OK 喎 ~

洗埋碗就開機洗衫   之後休息休息 ~

睇下 Youtube   今晚 10 點 45 先分瞓覺 ~

明明館 @ 紅磡 ( 28-JUN-2024 )

南乳豬扒菜飯 & 南乳雞翼菜飯 - 我覺得雞翼係超級好味

( 28-JUN-2024  FRI )

感恩一覺瞓天光   又係好似 7 點唔夠就醒咗   但今朝反而想繼續瞓呢 ~

今朝同里奧大人出去食早餐   食完就去佢公司坐下先番工 ~

菇場唔忙   咁又 Skype 過日啦 ~

船頭比㗎   我話唔要喇   佢話佢買咗 10 條有排用   所以係都要比我

Lunch Time 出去睇鈣思寶價錢   之後職員話肯定係 $20/排   所以食完水餃河就去買喇 ~

我要多蔥但其實無多蔥

咁我比錢嘅時候   職員話頭先幫我睇咗價錢   但我走咗   我話上次又係咁   佢話係咪買椰青水嗰次呀 ?!   我話係呀   估唔到佢仲記得   哈哈   今次買 8 Pack   因為真係好抵

菇場忙咗陣又可以抖下   部 Printer 無啦啦又壞咗   其實部影印機換咗無耐之嘛   但成日壞呢樣嗰樣好煩囉 ~

忙完又 Skype 到放工   咁又過咗一日 lu ~

今晚有啲嘢搞   搞掂哂就同里奧大人出去食晚餐 ~

食完再去惠康買鈣思寶   因為可以減 $22   同埋最緊要里奧大人可以幫手拎 ~

番到屋企即沖涼   但之後又要去搞啲嘢   差唔多 10 點先搞掂   咁順便買糖水番屋企食 lu ~

又再買 8 Pack   我叫家姐唔好買   如果佢要就比佢

沖埋涼先食糖水   好在里奧大人陪我食咋   10 點幾食糖水算係食宵夜啦   哈哈 ~

黑糖珍寶仙草 ($38) - 芋圓+珍珠+小丸子+仙草

除咗仙草   樣樣都好煙韌呀

睇陣福寶   今晚 11 點半先瞓 ~

回鍋肉 + 麻辣湯包炒椰菜 ( 27-JUN-2024 )

( 27-JUN-2024  THU )

感恩一覺瞓天光呀   不過今朝起身反而有啲攰 ~

里奧大人今朝晏啲番工   佢話尋晚瞓得唔好   好似無瞓過咁呀 ~

早餐食芝士條   今次無咩芝士味 ~

食完就靈修 15 分鐘   喺屋企出門口係好舒服   因為開咗冷氣   飲熱嘢都唔會出汗呢   但如果唔駛番工   朝早就唔會開冷氣食早餐   因為食完先沖涼   哈哈 ~

菇場唔忙   又可以 Skype 喇 ~

Lunch Time 同船頭一齊行   咁阿花放假   我問船頭食咩 ?!   一齊食啦   最搞笑有間燒肉店開張   佢想入去食   但我話見到食客嘅枱面有紅色膠袋   好似裝拜神燒肉咁   應該係自己人食㗎咋   所以佢話去食台灣嘢   哈哈 ~

台灣鹽酥雞便當 ($63) + 珍珠奶茶 (+$12) - 呢個便當所有食物都好啱我食

一路食一路傾   真係無諗過有呢一日發生   因為阿中喺度嘅時候   船頭係好憎我咁㗎   唔同我打招呼   又成日啤住我   但阿中走咗之後   佢對我 180 度轉變   同我傾同我講笑又請我食嘢   所以我估阿中成日講我壞話   不過我行得正企得正又唔驚呀 ~

傾開公司啲怪嘢   船頭叫阿怪做顛婆   仲話佢詐顛納福   成日扮比人欺凌   但其實係佢欺凌人   阿輸嗰單嘢   里奧大人聽到都以為係阿輸錯添呀   所以阿輸其實係最慘囉 ~

之後又咩都傾下啦   所以好快就 12 點 40 分   但我話食完想行陣   所以再周圍行下先番菇場 ~

原來頭先家姐打嚟都唔知   真係好日唔同同事食   佢就打嚟   哈哈 ~

佢話 Berry 尋晚喺佢床隔離嘅地下屙咗粒 "紙"   我話好在食完嘢啫   佢話一粒都算 "紙" ?!   我話係 "紙" 就 "紙"啦   關形狀咩事呀黐線 ?!

最搞笑佢話以為係巨強   因為 Size 似細細粒嘅日本蕃薯   我初初以為係麥提莎咁細粒咋   咁如果似蕃薯   佢又大近視   咁又真係好似巨強嘅 ~

之後家姐執起粒 "紙"   Berry 即跑去廳   驚家姐鬧佢喎   咁家姐話佢都係慘慘眼咁望住家姐呀   咁樣就真係驚人鬧喎 ~

菇場好忙呀   不過忙咗差唔多 4 點幾先搞掂   咁又好呀   好快放工咁 ~

番到屋企即預備   里奧大人 6 點幾番到嚟   我叫佢沖涼先啦   未咁快有得食 ~

是日晚餐 - 回鍋肉 + 麻辣湯包炒椰菜

回鍋肉 - 因為我只係一碗仔肉碎   如果用一個椰菜   咁應該見唔到啲肉碎   所以用 1/3 椰菜就夠喇   今晚都係用醬料包   夠方便又好味   其實呢個餸都唔知叫咩好   不過我用回鍋肉醬   所以叫佢回鍋肉   呵呵 ~

麻辣湯包炒椰菜 - 里奧大人話一菜兩味   平時佢只會話咁多嘅   今晚佢真係好唔同呀   哈哈 ~

食完抖陣就洗碗   之後沖涼休息   里奧大人熨 2 機衫 ~

我一話睇 Youtube   里奧大人就話睇福寶

今晚 10 點 15 分瞓覺喇   突然覺得好眼瞓 ~

魚香茄子 + 炸魚皮 (外賣) ( 26-JUN-2024 )

( 26-JUN-2024  TUE )

感恩一覺瞓到鬧鐘響   所以今朝起身都好精神 ~

同里奧大人出去食早餐   食完再去佢公司坐陣先番工 ~

菇場唔忙   又做自己嘢啦 ~

以前覺得 2 把風扇仔係太多   依家覺得係啱啱好   咁無電可以即刻用呢一把嘛   其實係呢兩年先用得咁密   因為菇場成日冷氣唔夠咁呀

Lunch Time 出去買菜   買完諗住去 7 仔買咖哩魚蛋烏冬   但無哂烏冬呀   所以又去番食鯪魚球上海麵 ~

我不嬲要多蔥㗎   但有個新阿姐成日都無多蔥   咁幫我落單個阿姐見到無多蔥   就再 "北" 多啲蔥比我   之後仲話我係要多蔥㗎

食完都直接番菇場   依家成日曬   我發覺皮膚好似黑咗咁呀   係時候真係行商場算喇 ~

番到菇場又係成身汗   我真係已經慢慢行㗎喇   里奧大人話我好勁呀   咁熱仲食湯粉麵   我話食店冷氣都夠嘅   食完唔會出汗   只係去買嘢行段路先出汗咋   呵呵 ~

西瓜上大陸   下半日 3D ~

放工去買麵包   我鍾意去麵包舖買包   同埋放工後多數有特價   咁樣好吸引呀 ~

今晚可以慢慢煮   因為里奧大人話 6 點 45 分先番到屋企 ~

是日晚餐 - 魚香茄子 + 炸魚皮 (外賣)

魚香茄子 - 里奧大人一入屋就話好香呀   我話梗係啦   因為用醬料包煮嘛   哈哈 ~

炸魚皮 (外賣) - 好耐無食啦   所以買包嚟食喇 ~

洗埋碗就開機洗衫   之後沖涼休息 lu ~

睇陣 Youtube   睇到 10 點突然好眼瞓   所以最後忍到 10 點 15 分都入房瞓覺喇 ~

招牌鍋貼套餐 + 招牌鍋貼 & 麵線套餐 (外賣) ( 25-JUN-2024 )

中午食咗餃子   所以今晚食鍋貼   依家覺得鍋貼好食過餃子   可能皮薄無咁滯呀   哈哈

( 25-JUN-2024  TUE )

一覺瞓到 6 點 55 分都醒醒哋   不過我又想繼續瞓   但瞓到 7 點 20 分都起身 lu ~

早餐食甜餐包夾芝士   間唔中咁食就覺得好味道   可能我鍾意鹹鹹甜甜呢 ~

食完再靈修 20 分鐘就番工   唔錯唔錯 ~

今朝勁塞車呀   本來諗住最多 9 點 15 分可以落車   但架巴士唔係咁郁咁   所以即刻通知西瓜話要遲啲番   終於 9 點 40 分先落車   之後見到小說同小 A   我哋大家同一方向塞車呀 ~

菇場忙呀   所以好快又到 Lunch Time ~

個天開始黑同埋超級焗熱   諗住買酸辣米線夠方便   不過最後都係去食水餃河   食完又周圍行下 ~

食完去惠康過冷河   又比我買咗紅腰豆 ($28/2 罐)   好少見咁平嘛   所以即買 2 罐   依家天氣咁鬼熱   係時候要食下沙律   哈哈 ~

唔忙就做下自己嘢   但我可能托住個頭瞓着咗呀   出咗一身汗真係好鬼易攰   睇嚟之後食完去商場行算喇   起碼無咁熱又可以郁下 ~

以前成日喺馬莎買呢款 Body Lotion   但用用下覺得唔好又停咗排   依家又突然想用番佢   但已加到 $55 了   薄荷糖就 $28/包   我覺得都幾抵食

咁睇好似臭丸   雖然我鍾意薄荷味   但好怕聞到臭丸嘅味道   因為好刺鼻咁

放工要去整啲嘢   所以要買外賣喇 ~

搞掂就即沖涼休息   之後姑姐打嚟   我又順便約佢哋食晚飯   依家無哂記性   明明應該係尋晚話打比姑姐約食飯囉 ~

今晚 10 點 45 分瞓覺   我發覺呢幾晚都夜瞓咗   可能之前真係受到每月一到影響   成日好想瞓覺呢 ~

雜丸炒意粉 + 豬腳薑醋 (外賣) + 芝麻醬拌青瓜粟米 ( 24-JUN-2024 )

( 24-JUN-2024  MON )

今朝 9 點半起身   所以靈修半個鐘到 10 點   等埋里奧大人起身就去食早餐喇 ~

諗住去試新嘢   但居然無開呀   我同里奧大人講話好失望呀   之後佢話聽朝陪我去食啦   因為我好少講話失望嘛   所以佢成日話食嘢對我嚟講係好重要   哈哈 ~

侍應拎兩碟煎蛋同牛角酥嘅時候   我以為比多咗添   原來腸仔蛋係里奧大人㗎   因為我以為佢食雙餸麵   可能我無得試新嘢無心機呀   哈哈

食完就番屋企沖涼   抖多陣就要出發喇 ~

行到差唔多到巴士站   我掛住同里奧大人講嘢   佢無啦啦望住前面話有車呀   感恩有幾個人上車咋   唔係肯定上唔到車呢 ~

我 Book 咗 12 點   但 11 點 55 分到   我仲同里奧大人講話要等一個鐘都未定   感恩我一去到寫低資料   搞掂就到我睇喇 ~

同醫生講番我嘅每月一到情況   佢話應該係食藥影響   之後如果再有咁形況就要食另一隻藥丸   我即捉住醫生隻手話係咪上次嗰隻 ?!   我直頭話唔想食呀   因為食完之後仲超級辛苦   所以下次再咁樣   就要打嚟睇下要再食邊隻藥   始終每月一到咁耐都唔好囉 ~

我問醫生駛唔駛驗貧血 ?!   之後佢再幫我量血壓   我血壓高呀   佢問我係咪驚得滯 ?!   哈哈   所以檢查之後再量過 ~

咁入房檢查   醫生講咗 2 次話我瘦咗   估唔到佢真係記得我喎   哈哈 ~

醫生話個瘤好實   我即問好唔好啦 ?!   醫生話係好呀   咁問我照唔照下個瘤嘅 X-Ray   我話醫生話事啦   佢答得好快話唔駛喇 ~

其實如果要食血壓藥都無辦法   醫生話有得食好過無得食   起碼有得控制住   仲話最緊要身體好   唔好要個老公要照顧   呢樣我都諗同嘅   仲係咁叫我去旅行放鬆   我話暑假好貴啦   佢話咁又係   將啲錢用嚟買嘢食嘢好過   哈哈 ~

之後再講番個瘤嘅情況   再量血壓仍然係高   因為媽咪爸爸家姐都係   所以我都一定有   不過我以前血壓係 12X 咋   我真係食咗藥就好多副作用出哂嚟   肥咗同埋好多白頭髮又甩頭髮   但可以控制到個瘤   所以我仍然會照食藥   依家我仲係要適應緊隻藥呢 ~

醫生再話我下壓好靚   同埋心跳都好平穩   我話之前報告話我有心律不正   我好驚囉 ~

我話試過搞肚痛而暈低咗   佢話好危險㗎   因為怕撞到後失救   之後講咗個真人真事比我聽   佢個樣都好 Sad    再話兩公婆怕咩   記住一定要開住門呀 ~

最後叫我去驗血 Check 下基本嘢   之後報告就拎去比家庭醫生睇   佢問家庭醫生叫咩名 ?!   我答完佢   佢就話呢個醫生好㗎   所以好感恩每次睇嘅醫生都係好呢 ~

但因為要空肚驗血   所以里奧大人話睇下邊日朝早唔駛開會   就陪我去驗血   我初初以為喺菇場附近添 ~

唔經唔覺傾咗半個鐘   咁走嘅時候   醫生叫我哋去食自助餐啦   但唔好食咁多   呢句好搞笑呀   哈哈 ~

去馬莎睇下嘢   買咗薄荷糖同 Body Cream   之後再行 iSQUARE   行完就出旺角 ~

呢隻樹懶公仔嘅質地係超級 Soft   但可惜要 $198   如果佢做半價就即買   哈哈

LAYERED STAINLESS BOTTLE 減到 $95 就抵喇   所以叫里奧大人買比我

今日好焗熱呀   睇個天色都知   哈哈

我話諗唔到食咩   里奧大人話食牛扒呀   疫情前去過 2 次   估唔到事隔 4 年先再嚟食 ~

開餐

羅宋湯味道都 OK

以前出街飲嘢都會係凍咖啡或者奶茶   依家除非好眼瞓   否則我都會飲檸檬茶   同埋覺得酸嘢好飲   年紀大真係口味都變哂   哈哈

鐵板肉眼牛扒 ($95) - 我以為一塊咋   所以食完就超級飽   始終紅肉比較滯

西冷牛扒配薯菜 ($66) - 本身同里奧大人兩份食嘅   食完之後佢話肉眼扒 Soft 好多   我話以為大家都係肉眼扒添呀    咁我只係比咗幾件肉眼扒比佢   諗住熱啲食咁咋

牛扒底部有好多薯條

食完去聯合廣場買鞋   其實都係以往嘅款   之前好平咋   依家要 $399 了   不過我都照買   因為着得好舒服 ~

咁我只係買白色   里奧大人話買多對黑色啦   我話只係想買白色   里奧大人個樣都好愕然   因為我平時咩都買買買嘛 ~

大廈外牆咁靚嘅

去花園買咗件 One Piece   只係 $129 咋   之後話買 2 件 85 折   所以里奧大人就買咗件 Tee   大家開心   哈哈 ~

差唔多 4 點就番屋企   里奧大人話想買台灣嘢   不過我話番到屋企又唔係即刻食   我又要再焗   咁不如我煮好過啦 ~

番到屋企即開埋機洗衫再沖涼   真係成個人舒服哂 ~

抖陣就我熨幾件衫   之後就由里奧大人接手喇 ~

差唔多 6 點幾先煮晚餐   所以 7 點幾先開餐呀 ~

是日晚餐 - 雜丸炒意粉 + 豬腳薑醋 (外賣) + 芝麻醬拌青瓜粟米

雜丸炒意粉 - 將麻辣湯包同醬爆牛丸切條   再加少少沙爹王 XO 醬炒呀炒   咁都好好味㗎 ~

豬腳薑醋 (外賣) - 過咗期了   所以今晚點都要食啦   家姐之前喺榮華買比我㗎 ~

芝麻醬拌青瓜粟米 - 無買到菜   咁就整呢個沙律 lu ~       

洗埋碗就再沖多次涼   之後休息喇 ~

睇 "福寶" 又睇下其他嘢   今晚 10 點 45 分瞓覺 ~