( 8-JUN-2024 SAT )
尋晚半夜去完廁所 之後都瞓得唔係咁好 不過我都預咗㗎喇 ~
今朝出去食早餐 食完就去里奧大人公司坐下 坐到架巴士差唔多到就走人 lu ~
亞麻籽包嘅口感好煙韌
但我仍然食碎蛋 呵呵
我都叫里奧大人食下其他 佢食炒蛋多士
菇場完全唔忙啦 傾下偈又整下其他嘢咁 阿花話好少見我着褲 不過連里奧大人啲同事都成日咁講 因為我真係多數着 One Piece 呢 ~
放工即走 因為約咗探訪對象見面 本身約佢星期五去佢屋企 之後佢醒起仔仔星期六要補習 所以就今日見面喇 ~
我星期三約佢嘅 咁佢星期四 4 點幾打比我 我真係好驚咩事呀 因為好少會咁打比我嘛 之後佢話驚我放工坐成個鐘頭車會好攰 如果塞車要個幾鐘添呀 佢話唔駛番工都覺得辛苦 何況我要番工 佢話更加唔好意思咁辛苦拎糭比佢 不過我話如果真係要去佢屋企 我都無問題嘅 因為我都預咗係咁上下時間嘛 最緊要有車到就得 ~
之前牧師講過事奉係要用行動去做 我嗰下即刻諗起自己 探訪對象搬得遠 我之前真係唔想去㗎 加上我呢排真係攰到不得了 但唔想藉口多多囉 咁同工又咁啱問我會唔會派糭去探訪對象 ?! 我都即刻答應會派啦 但感恩整個過程真係神為我預備 我唔駛去咁遠但又可以同探訪對象傾偈了解 最開心係比到糭同其他嘢比佢呢 ~
我哋由 1 點 45 分傾到 2 點 15 分 係比我想像中耐咗好多 感恩感恩 ~
里奧大人差唔多 2 點半先放工 之後同佢一齊買午餐番屋企食 lu ~
腸粉+咖哩魚蛋+魚肉燒賣
唔記得呢個叫咩名 但好味道呀 雖然加甜辣醬之後個賣相有點兒恐怖 哈哈
食完睇下 Youtube 但睇睇下都瞓咗 20 分鐘 咁啱里奧大人兒生仔打嚟話買糖水比我哋 所以里奧大人就要落樓拎喇 ~
原來得兒生仔一家人咋 仲諗住係姑奶叫佢買埋比舅父添 呢下感動 呢個兒生仔係好錫舅父 以前佢放工經過里奧大人公司 會接埋里奧大人番屋企㗎 ~
Share 食咗一碗先 我叫里奧大人食哂啲涼粉 所以佢話好飽 哈哈
差唔多 5 點半就出發番崇拜 咖啡哥見我剪咗頭髮 佢叫我做蘑菇頭呀 哈哈哈哈 因為我實在太懶 前面一定剪到好短 咁唔駛成日去剪髮呢 ~
崇拜完畢有小食會 我本來諗住走 但小浪係咁叫我食 仲話我可以第一個食 咁唔食唔得啦 ~
關東煮好味呀 不過我只係食咗蒟蒻同白蘿蔔
傾下偈又已經 8 點 係時候走人 lu ~
今晚唔太餓 但又要食糖水 咁我話 Share 食杯麵同糖水當晚餐算喇 ~
食完抖陣就沖涼 之後加拿大姑姐打嚟傾偈 不過都係傾下會幾時番嚟 所以都好快傾完 同埋電話窒下窒下咁 傾得比較辛苦呀 ~
睇多陣 Youtube 今晚 10 點半都瞓覺 lu ~
沒有留言:
發佈留言