( 15-JUN-2024 SAT )
尋晚去完廁所都好快瞓得番 但天未光就醒醒哋咁 不過繼續瞓啦 最後瞓到 7 點半起身 估唔到都好精神喎 咁可以去家姐屋企 lu ~
同里奧大人食完早餐就去家姐屋企 因為家姐陪姐夫整牙 佢問我驚唔驚一個人喺屋企 ?! 我話梗係唔驚啦 有 Berry 陪住我嘛 原來今日工人放假 我估家姐意思係我一個人喺屋企要自己拎拖鞋同斟水呢啲 要我自己搞掂 工人放假多數喺房瞓覺呢 ~
未開門都已經聽到 Berry 吠 好在我拎定鎖匙 快快開門快快入屋 唔係佢有排吠 哈哈 ~
估唔到家姐開定冷氣等我 咁就爽啦 今日又係好焗熱呀 ~
今朝勁喇 可以安安靜靜咁靈修 Berry 真係無吠㗎 因為佢根本無理我 哈哈哈哈 ~
佢啱啱打完喊露 我好鍾意佢啲牙仔 因為好白同埋無牙石呀 哈哈
我拎緊零食比佢 所以好緊張咁望實
糟糟送比 Berry 嘅鱷魚公仔
陪我靈修
大豬耳 哈哈
之後佢將個下巴托住喺梳化手柄上面瞓 第一次見到咁咋 但瞓我大脾仲舒服啦 不過可能佢會覺得好熱 哈哈
之後就瞓地下 佢望我又辛苦 我望佢又辛苦 做咩唔坐梳化喎
由 9 點半靈修到 10 點 50 分 真係無咩幾何咁乖 ~
家姐差唔多 11 點番到嚟 一坐低就問食唔食呢樣嗰樣 我話我食咗早餐㗎喇 ~
糟糟送比家姐 仲強調話好辣 家姐知我鍾意食米餅但又驚太辣 所以我話比兩塊我得㗎喇 番到屋企試咗 真係超級辣 食完要即食番甜嘢解辣呀 哈哈
家姐朋友 CEO 送比家姐 佢話食唔哂 咁我話同我 Share 啦 我咁啱想買爆谷 呵呵
最鍾意焦糖爆谷
家姐好搞笑囉 佢將爆谷放入食物膠袋 咁我以為佢想易啲倒番入個膠樽入面啦 點知我正想倒嘅時候 佢即刻捉住我隻手唔比我倒呀 之後就將個膠袋放埋入膠樽 佢係咁喺度笑 話唔想整到個樽立黐黐 我話簡直係匪夷所思 哈哈
家姐可能拎開食物 順便拎埋呢個法式麵包玩具出嚟 哈哈 呢個都係糟糟送比 Berry 女㗎
家姐買咗吞拿魚酥 一開個盒真係勁開 我同家姐都鍾意食吞拿魚嘅 但里奧大人就唔鍾意 話好腥喎
傾下呢樣嗰樣 好快又 1 點 咁我都要走喇 順便陪家姐一齊帶埋 Berry 行街 ~
里奧大人差唔多 1 點 45 分先放工 我話想去飯堂食呀 因為好想食魚 ~
我同里奧大人講話好餓 要食哂一碗飯 但我哋多數一碗 Share 食先 之後再食另一碗 好在我拎咗玻璃盒咋 因為最後都係食剩一碗飯
酸菜魚配料越嚟越少
基本上次次都會拎盒檸檬茶番屋企嘅 有次執雪櫃 好奇怪點解會咁多盒檸檬茶 仲諗緊自己幾時買 ?! 之後先醒起係飯堂嘅檸檬茶
食完番屋企抖陣 坐到 2 點幾都要走喇 今日有 LA 事奉 ~
差唔多 4 點半完畢 我陪石頭去買糖水 本來佢想話一齊食 不過我話好飽呀 下次再約啦 兩次都同唔到佢食嘢添 真係遲啲要搵佢食番一次飯 可能輪到佢唔應承我 哈哈 ~
送埋佢搭車就番屋企 仲以為里奧大人仲瞓緊 但原來佢熨緊衫 ~
諗住今晚出去食 里奧大人知我鍾意食脆麵 不過間茶記話收 6 點 咁嗰時都只係 5 點 15 分 里奧大人話依家買番屋企食吖 我話唔啦 我未餓喎 ~
雖然里奧大人都想我抖下 但我話諗唔到食咩 佢本身想買 KFC 我又覺得好熱氣咁 所以我話我煮啦 今晚真係超級簡單呢 好似打風餐 因為兩樣都係罐頭 ~
煮完都 7 點 15 分喇 不過都唔係咁餓 可能中午食咗白飯呀 ~
是日晚餐 - 味噌沙甸魚意粉 + 粟米蛋花湯
味噌沙甸魚意粉 - 我以為買咗蕃茄味添 可能我拎錯咗其他味道呀 不過估唔到個汁都幾好味道 睇個樣成碟白雪雪咁 但其實有味道㗎 ~
粟米蛋花湯 - 無買菜仍都懶去買菜 其實依家都好少買粟米湯 以前最少起碼 6 罐 依家好似得番最後 1 罐咋 ~
洗埋碗就沖涼休息 今日出咗去成日咁滯 都有戰攰 真係好難想像後生嘅時候 每個星期六都會出街 仲要係夜瞓嗰隻 ~
家姐之前喺曼谷買比我㗎 估唔到里奧大人會話開嚟食
腰果好脆 同埋都幾辣 但我最唔鍾意係食啲青豆 因為以前成日食呢啲青豆零食 食到好驚 哈哈
今晚掛住打機 之後再睇 Youtube 睇到 10 點 45 分先瞓 ~
沒有留言:
發佈留言