焗燒排骨 (外賣) + 菜心苗炒巴馬火腿肉塊 ( 16-JUN-2024 )

( 16-JUN-2024  SUN )

今朝里奧大人鬧鐘 6 點 45 分響咗   佢未起身   咁我都唔起住喇   之後到我鬧鐘 7 點響   感恩係出奇地精神   咁可以同里奧大人食早餐喇 ~

我其實想食芝士吞拿魚   不過比錯都照食啦   咁我都鍾意食芝腿治嘅

食完即去里奧大人公司幫手   今朝好多嘢做呀 ~

我崇拜完之後再去幫手   差唔多 11 點半先走   即搭車去成興隆買凍肉   再去聖安娜換麵包   之後買埋菜就番屋企 lu ~

話咁快又已經 12 點半   抖到 1 點鬆啲就同里奧大人食午餐 ~

豬扒炒烏冬好味呀

里奧大人話想食涼瓜火腩飯   但食剩 2/3 又要留番今晚食 lu

里奧大人要去開會   我就去生果舖買台灣香芒比里奧大人   點知又無開   咁又周圍行啦 ~

今日焗熱到不得可了   我真係行到出哂汗   所以去惠康嘆陣冷氣先再行   行下行下又買咗薯片   環保袋放 3 包   自己個袋放 4 包   我仲要留位放雞翼   所以唔敢再買 ~

買完再去樓上買嘢   最後去埋大生買啤酒就番屋企喇   好驚個袋爛呀   哈哈 ~

樓上職員話有得試食   但我立一立個牌係葡萄乾   所以唔去睇啦   咁我排隊比錢嘅時候   見有人拎包帶子話好抵   我又過番去試食位置睇   原來係帶子做特價呀   怪不得一入去已經聞到好香嘅味道啦   我心諗點解煎葡萄乾會煎到咁香嘅味道添   哈哈   之後職員話啱啱煎完可以試食   咁熱辣辣真係好味嘅   同埋食完唔會黐牙

急凍日本煮原隻帶子 ($35/包) - 呢個價係 "忽然驚喜預購價"   對我嚟講真係忽然驚喜呀   因為我好少去樓上買嘢   本來已經拎咗包急凍雞翼   但帶子咁抵   所以唔買雞翼改為買 3 包帶子   之後聽到話每人只可以限購 6 包咋

番到屋企已經 3 點半   即刻開定冷氣再沖涼洗頭呀   今日非常焗熱 ~

亞麻籽藍莓扭紋包   見 $18.5/包就買嚟試下

$50/6 (55g) 送 1 包蔬菜小食混合裝 (96g) - 里奧大人話今晚睇波要食薯片飲啤酒   咁屋企本身有薯片嘅   但家姐話用埋惠康劵仲抵   咁就買啦

燜好個餸就徹底大清潔屋企同埋執衣櫃   難得有精神體力同時間呀   每月一到咗咁耐   我都只係做簡單清潔咋   力不從心無計啦 ~

做呀做   一做就做到 6 點   我都估自己做咗 2 個鐘㗎喇   因為條腰開始痛喇 ~

咁其實都要停㗎喇   因為要預備晚餐呢 ~

里奧大人 6 點 15 分番到屋企   咁啱我都整緊晚餐   等佢沖埋涼就食得 ~

是日晚餐 - 焗燒排骨 (外賣) + 菜心苗炒巴馬火腿肉塊

焗燒排骨 (外賣) - 呢碟係例牌 ($40)   諗住比里奧大人做 Lunch Box 先買咋   不過我覺得都幾貴   但里奧大人話好味呀   咁都好   因為好少地方買到燒排骨呢 ~

菜心苗炒巴馬火腿肉塊 - 特登開嚟試下   鹹鹹香香都幾好味 ~

食完抖陣就洗碗   搞掂就開機洗衫   之後沖涼休息 ~

特濃朱古力切餅 ($24) - 1 張餅劵係 $60   咁買咗 2 Pack 麵包   所以我補多 $3 就有件切餅   今日又係父親節   所以買件切餅孝敬里奧大人啦

里奧大人話好味道

今晚 9 點同里奧大人一齊睇 2024 歐洲國家盃   荷蘭對波蘭   我估荷蘭 2 波蘭 1    估唔到 30 分鐘已經 1:1   所以一定好睇   不過里奧大人睇到 10 點半就瞓覺   佢頭先食薯片飲啤酒   所以眼瞓囉   佢仲話佢一瞓覺就會有波入   哈哈 ~

我就繼續睇   之後荷蘭真係入多球呀   不過我唔記得佢係咪話波蘭會贏囉 ~

今晚睇到 11 點先瞓   但都係睇埋呢一場   想睇其他就要睇收費電視台   咁我唔會睇 lu ~