蒜蓉豆豉蒸排骨 + 腐乳通菜 ( 24-may-2011 )

( 呢碟係里奧大人 lunch 食唔哂嘅上海粗炒   無厘味道嘅 )

( 24-may-2011 tue )
呢排唔知做乜鬼   瞓得唔係咁好咁喎   所以唔多願起身番工呢 ~
今朝里奧大人應該要上大陸嘅   但鬧鐘無響到   所以就唔駛番喇 ~
天氣涼涼地   同佢一齊搭地鐵番工   真係好耐無試過喇 ~
早餐食餐蛋治   正想影相嘅時候   有同事過黎一齊坐喎   咁我都唔影喇   雖則知我成日上網   但佢唔知我寫 blog 嘛   佢同老闆又 friend   都費事講咁多嘢咯   雖然佢都係一個正常好人 ~
晏晝有 lunch box   食完本來想瞓   但又瞓唔到喎 ~
差唔多 3 點先 pack 箱   pack 完之後個人都散散地呀 ~
放工去超市買菜就番屋企煮飯 lu ~
是日懶餐 - 蒜蓉豆豉蒸排骨 + 腐乳通菜
蒜蓉豆豉蒸排骨 - 我真係想里奧大人有住家飯食架   所以點都整 d 餸囉   蒸就最好喇   因為我煮完嘢要出街嘅話   我唔想開鑊炒嘢囉   硬係覺得件衫好似有油咁   周身唔自在咁架 ~
腐乳通菜 - 見到通菜幾靚就買黎食喇   今晚里奧大人夾好多次菜   我扮嘢話今晚食好多菜喎   佢即刻話不嬲都鍾意食菜   我即刻話因為有腐乳啫   下次我就咁淥通菜   你應該唔會食得咁多囉   佢無出聲啦   講中嘛 ~
今晚番教會牧養課程   所以食完飯真係無時間洗碗   里奧大人都好識做   幫手洗   我番到屋企 check 個廚房   真係好乾淨噃   仲開心係唔駛我執手尾嘛   如果次次係咁就好 lu ~