焗叉燒 + 蠔油燜節瓜 ( 10-JUL-2014 )

( 10-JUL-2014  THU )

尋晚半夜三更里奧大人去廁所   咁我又去嘛   之後同佢講話頭先發夢阿根廷贏荷蘭 2 : 1   佢居然問我邊個入球   笑死我啦   大佬   發夢架咋   同埋我話發夢都係睇報紙先知道賽果囉   佢話驚我睇到係馬勒當拿入球喎   痴線 ~

咁今朝佢起身   睇下錄唔錄到波   之後佢話我無發錯夢   整佢咩   講比我聽做咩喎   我唔要知賽果家嘛 ~

今次食早餐嘅時候都照睇電視 lu   反正一陣番到菇場都會知賽果 ~

邪啦   番到菇場都未見阿賓   唔睇賽果佢就講   睇咗反而佢又遲到   哈哈   算啦 ~   

菇場唔忙   可以做自己嘢   今朝飲熱檸茶   所以有 d 眼瞓咁呀 ~

Lunch time 出去食   搭 lift 有人話阿根廷贏   哈哈   即係我係咪都會知賽果   但其實要避都避到嘅   出街就全程聽歌   唔睇報紙   番工就唔上 FB 同上網   番到屋企唔開電視   無消息收到喇啩   除非里奧大人口多多唔覺意講比我知囉 ~

食完行陣就買飯比 PMS 喇   大熱天時出街真係好辛苦   成身汗呀   慘 ~

終於放工   今晚又去徑步   不過好焗   所以徑 3 個圈就番屋企 lu ~

沖完涼預備好晚餐   今晚 7 點半就開飯喇   我自己食先   因為里奧大人要  8 點先放工呢 ~

是日懶餐 - 焗叉燒 + 蠔油燜節瓜  

焗叉燒 - 其實諗住買半肥瘦梅頭   不過佢比咗瘦嘅   咁是但啦   今次都 ok 喎   無咁鞋   同埋我加咗 d 汁   里奧大人話甜甜地幾好味 ~ 

蠔油燜節瓜 - 今次煮到好深色   所以有 d 鹹呀 ~

里奧大人食完嘢都差唔多 9 點   之後我洗埋碗   沖埋涼都 9 點半   叫里奧大人都快 d 沖涼   因為要睇波嘛 ~

經過尋晚巴西嘅慘敗經歷   阿根廷同荷蘭都係守嘅居多   所以有 d 悶   咁又係嘅   攻未必贏   但唔守就一定輸囉   之後睇埋射 12 碼   果下真係好刺激緊張   因為我今朝睇電視只留意邊隊贏   無留意 12 碼係幾比幾呢   阿根廷終於贏啦   里奧大人不知幾開心 ~

睇完都 12 點   要即刻瞓覺喇 ~