2015年9月11日星期五
苦瓜炒豆豉鯪魚 + 西洋菜鹹鴨腎豬骨湯 ( 11-SEP-2015 )
( 11-SEP-2015 FRI )
尋晚瞓咗無耐 無啦啦門鐘響 原來管理員問我地有無燒燶嘢 因為走廊有好大陣燶味 其實之前都試過 走廊又係好大陣燶味 問我地有無開火燒燶嘢 果次真係一開門就聞到燶味 今次就無囉 但比佢咁響一響 真係嚇鬼死呢 ~
一起身就眼痛 真係瞓得唔好咯 嗚 ~
里奧大人依家逢星期五會早 10 分鐘起身 咁佢就可以喺公司附近嘆個早餐 relax 下咁話 咁即係話我都要早 10 分鐘起身啦 哈哈 不過難得佢咁想嘆早餐 我早 d 起身都無所謂嘅 ~
早餐食腿蛋治 其實唔想食 但一陣要 pack 箱 所以想食飽 d 囉 ~
番到菇場抖到 10 點就 pack 箱喇 以前就快手快腳 pack 得好快 所以次次 pack 完就成身汗 依家唔喇 慢慢 pack 真係無咩汗啊 呵呵 pack 到 12 點就抖下先 lunch 之後再 pack ~
今日有 lunch box 但其實唔餓 同埋實在太大盒 食到我好辛苦呢 ~
真係太飽 所以出去行下 買咗 6 pack 紙巾 勁驚同事見到 哈哈 ~
分別喺惠康同百佳買架 $14.9/pack (18 包) + $1 有多 pack (18 包) 即係 $15.9/pack (36 包) 平時最平都要 $19/pack 架 上次姑奶黎我屋企見到好多紙巾同廁紙 同阿奧講駛咩買咁多呀 屋企樓下就係超市 衰奧話我計埋 d 師奶數呀 哈哈
行行下收到家姐 whatsapp 話今日玩漂流 我勁擔心啦 因為佢唔識游水家嘛 之後佢話唔係激流 漂流係細路仔玩咁囉 喺個海到漂下漂下咁 哈哈 咁都好 d ~
抖陣又即 pack 箱喇 4 點搞掂 真係了咗心事喇 因為其實 7 月要 pack 好哂架 不過我唔想 pack 咋 ~
放工去媽咪屋企拎湯 已經叫咗工人喺巴士站交收 之後工人問我上唔上去 以為有咩事添 佢話無呀 問下我 咁好啦 我都上啦 同媽咪祈禱 丫 之得唔叫工人行黎行去啦 ~
工人話媽咪今日食好大碗粥 真係好喇 同埋見佢臉色都好咗 所以我都好開心呀 不過我坐到 6 點半就走喇 趕住煮飯呀 哈哈 ~
里奧大人 7 點 15 分放工 咁我抖多陣就煮嘢 lu ~
是日懶餐 - 苦瓜炒豆豉鯪魚 + 西洋菜鹹鴨腎豬骨湯
苦瓜炒豆豉鯪魚 - 冰姑話用苦瓜炒都好食架 其實咁都好 唔駛成日油麥菜同生菜咁悶 但 d 苦瓜好苦 不過我都接受到架 話明苦瓜梗係要苦啦 但其實應該係甘甘地 苦盡甘來 哈哈 ~
西洋菜鹹鴨腎豬骨湯 - 媽咪叫家姐工人煲架 好好飲呀 我覺得家姐工人煲呢 d 菜湯係好飲過媽咪煲果 d 呢 ~
洗埋碗就叫里奧大人陪我去華潤買低脂奶比媽咪 咁我就唔駛心掛掛 又唔駛我聽朝番工之前去買 真係好感恩 咁啱頭先工人話媽咪得番 1 pack 咁啱我之前見到做特價 $32/pack 所以即買 4 packs 喇 咁星期日可以比埋佢呢 ~
番到屋企即沖涼 食埋生果就睇電視 差唔多 12 點先瞓呀 ~
訂閱:
發佈留言 (Atom)
翠绿巨峰提子?甜5甜啊?
回覆刪除唔係巨峰提子呀 只係普通無桃青提黎咋 唔太甜但多汁囉 ~~~~
刪除