壽司 ( 外賣 ) @ 屋企 ( 24-SEP-2015 )

( 24-SEP-2015  THU )

尋晚 10 點 45 分就瞓嘛   咁瞓瞓下覺   好似 11 點半左右   有人打電話黎   嚇死人咩   又係 d 不明 call 囉   d 人真係超級勁賤   成日玩電話   又唔夠膽 show 自己電話號碼喎   咁有咩好玩呢下 ?!?!

最搞笑里奧大人以為係鬧鐘響   佢就話覺得點解咁快要起身咁   好在我同佢講話有人玩電話咋   唔係佢諗住刷牙洗臉番工添呀   我話天咁黑   點似 6 點幾呀   佢話落雨嘅時候   6 點幾起身就係咁黑架啦   我無言了 ~~~~

今朝里奧大人上大陸   佢起身之後   我自己一個人瞓覺得凍呀   我張冷氣被又薄呢   之後起身就即打兩個乞痴   個喉嚨有 d 唔舒服咁 @@

尋晚食飯食得飽得滯   所以今朝食奶醬多算喇   咁食早餐嘅時候   有個女人拎外賣  4 話頭先打咗電話黎   阿姐問佢係要咩   佢話係沙爹牛肉通   阿姐就奇怪   因為枱面無呢樣嘢   之後個女人話係雪菜肉絲烏冬先啱   我覺得好爆   完全兩樣嘢來囉 ~

菇場無哂大粒   真係超勁 free ~

越坐越凍   感覺係占寒占凍添呀   所以 lunch 出去嘅時候   特登行去有太陽嘅地方   覺得超級溫暖呀   之後再去食粥   不過食粥都暖唔到身架   因為間粥店又係好凍   不過我今次唔係坐風位   咁都好 d ~   

食完再幫里奧大人拎鞋去整   再行個大運就番菇場 lu ~

放工即走   本來諗住煮飯   但唔多舒服咁   所以去買壽司番屋企食喇 ~                    

超級壽司買壽司番屋企食   最離奇係比一對筷子   我買 2x 件壽司   斷估唔係我一個人食得哂呀嘛   駛唔駛咁鬼 cheap 呀 ~

番到屋企就沖涼   抖到 7 點先食嘢   我仲熄埋冷氣添呀   呢個情境   只有唔舒服先會咁做咋   哈哈   但其實又唔係話好唔舒服   但覺得好凍咁囉 ~

里奧大人差唔多 9 點就番到屋企   無啦啦按幾下門鐘   平時按一下家嘛   之後佢話睇下我有無事   我話如果有事   妳按九萬下我都聽唔到啦   痴線 @@

之後佢仲衰   見到咁多件壽司   問我係咪食唔哂就放埋落去   hey   點解要咁諗我 @@

諗住早 d 瞓   點知同里奧大人一齊睇戲   估唔到又好好睇   所以睇到 11 點半先瞓 ~