大阪王將 @ 九龍灣 ( 17-FEB-2016 )

元祖大阪小丸子 ($28) - 味道一般

粟米牛油味噌叉燒拉麵 ($68) - 無味嘅 

咖哩吉列豬扒鍋 ($78) - 估唔到連咖哩都無味   佢哋今晚咩事呀   

( 17-FEB-2016  WED )

尋晚半夜熱醒   唔知係咪食咗豬腳薑呢   之後好似咳   咁里奧大人攬住我   但我覺得好熱   今朝我問番里奧大人係咪有攬住我   佢話無   咁即係發夢   因為我都覺得好怪   我咳緊點會攬住我㗎   拍我背脊就差唔多   哈哈 ~

今朝個天又灰灰暗暗啦   又凍又濕咁   真係好唔鍾意呢啲天氣呢 ~

早餐食奶醬多   唔想咁飽呀   因為我想 Lunch 食酸辣米線呀 ~

菇場唔太忙啦   所以越坐就越凍 ~

Lunch Time 去買酸辣米線番菇場食   食到出汗呀   不過我又唔鍾意堂食   因為次次食完都成身酸辣米線味   好難頂囉 ~

里奧大人 2 點去深圳見客   所以 4 點半都番到屋企 lu   不過今晚我探媽咪   所以都唔會咁快番到屋企   真係邪   我出親街佢就早番屋企   哈哈 ~

放工去探媽咪   今晚搭小巴   真係差啲唔記得叫落車   勁驚 ~

唉   落毛毛雨呀   等我今朝仲拎番把遮出嚟添   所以要急步行呀 ~

感恩一去到就見到姑娘   咁問媽咪咩情況啦   佢話醫生計劃星期五比媽咪出院   咁都好   我哋唔駛咁頻樸 ~

見到媽咪都係瞓㗎喇   不過佢都同我講話醫院送咗個新年禮物袋比佢   又叫我飲湯   但佢唔知點解硬係唔鍾意坐喺度   所以我又頂唔順話佢   叫佢郁多啲啦   工人話佢唔食嘢   我直頭話唔食嘢唔緊要   郁先最緊要呀   工人自己都話平時放假都唔想瞓咁耐啦 ~

咁我同媽咪講話如果星期五出院   一定等埋我番嚟分藥先好出去   媽咪話得啦得啦   之後工人話番媽咪   話唔好話得啦得啦   太太同妳講嘢呀   我覺得佢好搞笑   不過佢次次都係善意話媽咪嘅   因為佢好驚我同家姐好激氣㗎   哈哈 ~

之後我叫媽咪唔好成日瞓   佢話佢唔係瞓   因為一陣要食藥   但我唔明點解我地嚟度妳都係瞓喺度囉   我話妳咁樣   人地真係唔會嚟探妳   由朝瞓到晚   瞓到 6 點起身傾下偈都好啦   同埋都瞓夠啦   係咪呀 ?!

家姐今晚真係忙到嚟唔到   咁媽咪又話瞓   我同工人都 7 點走喇   真係唔好諗住個個坐喺度望住妳瞓   望到 8 點走囉   一個鐘可以做到好多嘢   之後我見佢又望住我哋走   我哋坐喺度又唔望   一係單住隻眼睇電視   睇埋夠 5 秒又合埋番對眼   都唔知想點   不過我唔理㗎喇   佢一瞓   我哋咪走囉   自己唔珍惜就算數 ~

搭巴士番九龍灣   咁家姐打嚟問我識唔識落車   之後又傾下偈   佢話今晚喺公司喊呀   因為真係好多嘢做   做極唔完又有其他新嘢做   阿頭又唔比佢 7 點走   最搞笑佢話喊喊下   突然有幾個同事企喺佢後面安慰佢   佢話可以自己可能喊得好激動   啲同事驚佢黐咗線   有個同事直頭叫家姐請病假   話聽日唔想見到佢   因為佢知家姐真係好多嘢做   最慘係其他同事又唔做   呢個幾月佢又晚晚探媽咪   根本啲嘢堆住哂做唔得   已經星期六番工㗎喇   都做唔切囉 ~

所以我都話如果媽咪錫我哋   真係會愛惜自己身體   唔駛我哋咁擔心   咁佢有事又要人頻頻樸樸探佢   但佢又唔珍惜   成日瞓   所以我話唔探佢都係好事   等妳唔珍惜吖嗱 ~

今晚勁想食吉列豬扒飯   所以叫里奧大人去大阪王將攞位先   但真係好奇怪   今日食米線都好飽   反而夜晚仲更加快餓咁   好驚囉 ~

食完就行陣   番到屋企都差唔多 9 點   即沖涼喇   之後熨衫  抖多陣   11 點即瞓 ~