傻佬炒飯 - 好味呀 啲飯粒係煙煙韌韌
干煸四季豆 - 我叫㗎 因為我鍾意食 甜甜辣辣好鬼正
招牌燻魚 - 姑奶必叫 如果喺金滿庭唔見呢碟餸 就即係呢晚一定唔係同姑奶一齊食 哈哈
擔擔麵 - 我無食呀
蔥爆三樣 - 我叫㗎 因為我鍾意食京蔥 哈哈
啫啫時菜煲 - 好重蝦醬味 我麻麻哋
宮保雞丁 - 又係姑奶必叫 50 年不變嘅餸 因為佢遲嚟嘛 所以我同佢講話己經叫咗個宮保雞丁比佢 佢真係超勁開心 之後話唔怪得晴晴咁錫我喎 成日會記住人鍾意啲咩 其實我想話 食咗咁多次金滿庭都係呢個餸呀 哈哈
片皮鴨一食 - 今晚係最遲先上枱 所以食剩 1/3 佢哋打包拎走呢
@ 滿記 我同里奧大人講話見到呢張相 覺得好濕熱 因為樣樣都係芒果 哈哈
( 20-FEB-2016 SAT )
今朝瞓到差唔多 10 點就自己醒 之後刷牙沖涼就去食早餐 lu ~
諗住行山 但天陰陰咁 所以唔行喇 咁改去深水埗同旺角買嘢 ~
番到屋企抖到 11 點半就去深水埗 里奧大人就去黃金買 Keyboard 我就周圍行下 之後差唔多 1 點就 Join 埋里奧大人去食狗仔粉 估唔到要排隊 好在排咗 5 分鐘就有位呢 ~
火鴨翅 (細 $20) - 估唔到好味喎 口感唔似漿糊 同埋我鍾意有好多木耳絲呢
香辣魚蛋 ($10) - 個汁越食越辣 正呀
狗仔粉 (大 $27) - 我一定加辣菜甫 但其實唔加都好味嘅 哈哈
雜燴 ($23) - 比多次機會佢先 不過下次都唔會叫嚟食 無乜味囉 但荃灣果間好好味㗎喎
食完再去睇下電腦 我話行去旺角 不過里奧大人話唔知咩方向 所以搭番地鐵啦 ~
去花園街買鞋墊 但無開檔 咁再周圍行下 之後里奧大人話攰 咁晴晴買衫嘅舖頭又要 4 點先有人 咁去食個下午茶啦 順便坐下 後尾家姐話媽咪唔食嘢 醫院驚佢無營養 所以要吊葡萄糖水 反正今晚 9 點先食飯 咁睇下佢啦 ~
今次隻雞翼烤得好金黃 西多士又熱辣辣 真係無乜幾何咁鬼正 哈哈
食完就幫晴晴去買衫 普普通通一件白色有帽衛衣都要 $399 佢仲話價錢 OK 我話直頭貴啦 之後佢話咁 Hold 住唔買啦 但我話已經買咗喇 佢幾鬼開心 ~
買完再去信和買 Ear Phone 都已經 5 點 之後即搭巴士去醫院喇 坐成個鐘 其實勁想瞓 但里奧大人又瞓 我驚唔知醒落車呢 ~
去到同媽咪傾咗幾句 之後佢無啦啦串串共話我做咩唔鬧佢 我好平心氣和話頭先咪鬧咗囉 其實我見佢吊葡萄糖水咁慘 我費事鬧佢 同埋佢咁講 我已經決定呢兩日唔探佢 等妳串吖嗱 反而里奧大人就激氣話佢 好想人鬧妳呀 ?! 工人又話唔好講呢啲 ~
家姐 6 點半到喇 咁啱姑娘又嚟咗 佢話媽咪唔食嘢可能情緒有問題 頭先見完醫生喺度喊 話驚死喎 姑娘話呢啲控制唔到 又話唔知咩肝腎指數 50 正常係個位數 但就要睇番報告先知點解 之後里奧大人都好大聲話媽咪話唔驚死㗎喎 姑娘都笑 咁又係呀 我叫媽咪唔好食 佢話死咪死囉 成日鬧鬧鬧 依家又同人講驚死 真係唔知咩心態 ~
姑娘叫我哋最好日日探 之後家姐都話係咁啱呢幾日開 OT 所以無探 同埋話妳都有探 不過次次探佢 佢都係瞓 咁探嚟其實無意思囉 ~
家姐無啦啦比生日利是我 又比 $200 萬寧 Cash Coupon 比我 發達咯 哈哈 ~
7 點半走人喇 家姐車埋我哋去九龍灣 里奧大人話尋晚食完個芒白黑之後 個喉嚨無咁痛喎 所以又去食喇 ~
芒果黑糯米甜甜 ($28) 另加芒果黑糯米 ($18) - 試下椰汁底同熱球 都係覺得凍球好食啲 因為無咁腍 Pat Pat 但其實話時話 我地食兩球黑糯米咪得囉 唔駛食 4 球咁多囉 一陣要食飯家嘛 我估里奧大人可能入哂腦要加多份芒黑都未定 哈哈
食完就番屋企抖陣 8 點半出發去金滿庭 本來係九龍幫補足姑奶生日 點知姑奶話請番我哋 因為晴晴今次成功咗 所以佢超級開心 一定要請我哋食飯慶祝喎 ~
今晚 2 姑奶又比我生日利是 實在太開心喇 今日好多錢收咁 ~
食完都 9 點半 姑奶居然又話食芒白黑 佢話呢個係佢減壓嘅甜品 咁好啦 陪佢食啦 我都希望佢食完之後 可以放鬆啲呢 ~
食食下 里奧大人無啦啦比利是我 仲以為佢玩嘢 第個比都作下狀唔要 佢比就即收 哈哈哈哈 ~
食到差唔多 11 點就走喇 番到屋企就即沖涼 抖多陣諗住瞓 估唔到晴晴 Whatsapp 講開會啲嘢 11 點 45 分喇 即係佢果邊零晨 3 點 咁夜都未瞓 咁肯定佢諗唔通啦 所以叫里奧大人唔好瞓住 教哂佢點做先好瞓 里奧大人即刻話我 有嘢就搵佢幫 着數就我攞哂 哈哈 我識鬼咩 識就即教晴晴啦 黐鬼線 ~
好在晴晴之前問咗佢 Daddy 點解決 方案同里奧大人諗嘅一樣 如果唔一樣都幾搞笑 都唔知聽邊個好 哈哈 ~
我哋呢兩個老嘢就慘啦 1 點先瞓呀 攰鬼到呢 收線完即上床瞓喇 ~
沒有留言:
發佈留言