上海婆婆 360 + 滿記甜品 @ 九龍灣 ( 19-FEB-2016 )

椰菜回鍋肉 ($70) - 我好鍾意食呀   甜甜哋好味   

上海粗炒 ($68) - 估唔到份量都幾多   OK 好味啦   

砂鍋雲吞雞 ($48/位) - 佢嚟錯一鍋比我   我話我 Order 一碗咋喎   咁佢無反應   等我以為真係咁鬼大鍋   哈哈   味道唔錯   但唔夠熱囉 

芒果白雪黑糯米 ($33) 另加 2 球黑糯米 ($10) & 1片芒果 ($8) - 一碗甜品要 $51   我真係覺得貴囉   之後先知原來本身已經有 2 球黑糯米   咁其實唔加都夠   因為姑奶成日都加多份黑糯米   令我地錯覺以為得 1 球唔夠食囉   哈哈 

( 19-FEB-2016  FRI )

又黎天陰陰   仲話會落雨添   唉   太陽呀太陽   快啲出嚟啦  ~

食食下早餐收到晴晴嘅超級好消息   當堂精神哂呢   有啲想喊出嚟嘅衝動添呀 ~

菇場唔忙   又可以抖下 ~

今晚探媽咪   所以 Lunch 都係食飽啲   又食酸辣米線喇   阿齋仲話我今日應該唔會食啦   因為佢諗住我唔會前日食完今日又食   哈哈   咁我話我去買   順便出去行下   佢話我成日都咁講   但我話真係想出去行下嘛 ~

好嘢   仍然 Hea 過等放工   最驚放工前先嚟忙   大佬   聽日 Off   今晚又探媽咪   所以唔想遲放工呢   哈哈 ~

本來今晚約咗阿 mi 食飯   不過醫院話媽咪今日出院   所以取消飯局啦   點知醫生唔比媽咪出院   家姐今晚又 OT   咁我探一探佢啦   我都想知做咩又出唔到院囉 ~

晴晴今晚又 Whatsapp 我同里奧大人   話我哋一定要去參加畢業禮   機票佢出   但我哋買咗先   佢過番數比我哋   我話咁快就養我哋喇 ?!   佢話都差唔多㗎喇   咁我話我係咪依家可以退休 ?!   佢話未得住   要等佢出嚟做嘢先   哈哈   講講下我都唔記得佢仲讀緊書   因為佢成日話比番錢我   入哂腦以為佢做緊嘢添   哈哈 ~

佢真係由細到大都話養我㗎   嗰時我仲未係佢舅母添呀   但佢已經好鬼黐我   有時我未到餐廳   佢就同媽咪講話等埋我先   我食乜佢食乜   真係氹死人   但依家就知道佢原來由細到大都係二仔底死跟   哈哈 ~

傾完都差唔多到醫院   仲落毛毛雨   好煩呢 ~

去到見到媽咪睇緊電視   佢話肚屙同埋嘔   所以要照 X 光   要星期一睇埋報告先可以出院   咁我話無問題啦   最緊要安全 ~

今晚佢都唔錯   有傾有講   但我驚佢都攰   所以佢唔講嘢   我都由佢啦 ~

感恩姑娘 7 點幾番到嚟   我可以問媽咪咩情況嘛   佢話照 X 光係驚媽咪個肚有炎症   大佬   有入無出   唔肚痛先奇   咁媽咪成日咁眼瞓   冰姑問我係咪食藥有關   因為佢咁樣而提醒我呢個問題   但姑娘話啲藥無話令到病人咁眼瞓喎   所以我好大聲講話   咁即係懶啦   無理由可以一日可以瞓足 23 個鐘零 50 分鐘家嘛 ~

咁媽咪話佢有睇電視   咁我其實想鬧佢   睇電視又睇   我地嚟到又瞓   似乎佢真係唔識得咩叫珍惜   不過唔鬧佢㗎喇    我同自己講過要慳番啖氣   佢唔珍惜唔緊要   我唔嚟探佢之嘛 ~

佢話佢瞓嘛   咁我同工人都走 lu ~

7 點 25 分走   8 點 02 分先有車   唉 ~

今晚里奧大人 7 點 45 分放工   不過我差唔多 9 點先番到嚟九龍灣   佢話想食上海粗炒   所以去上海婆婆喎 ~

姑奶成日話滿記個芒果白雪黑糯米好好食   咁我話我都想試下   咁就去食啦   咁里奧大人話 Send 張相引下佢   之後我食食下見到個背影好似姑奶   再睇埋佢對鞋   堅係姑奶呀   不過見佢同舖頭同事傾緊嘢   所以我哋唔叫佢住   到我哋食完先過去打招呼   我已經用手掩住個口行埋去   但佢舖頭同事居然認得我   仲諗住嚇佢哋添 ~

傾下傾下   原來都差唔多 11 點   要走喇 ~

番到屋企即沖涼   抖多陣都瞓 lu ~