大阪王將 @ 九龍灣 ( 4-FEB-2016 )

香辣蘑菇汁 吉列豬扒 天津元祖蛋 田園菜飯  - 里奧大人居然將啲汁倒喺豬扒上面   我即黑面話佢啦   成塊豬扒咪腍哂囉   之後佢話鍾意食腍喎   咁我話你係咪食哂 3 塊呀 ?!   激死我 

香辣野菜豚肉醬油拉麵 - 我最鍾意食野菜麵   爽爽脆脆好有口感   

元祖餃子   食埋今次唔食   因為想試下其他小食   哈哈   

( 4-FEB-2016  THU )

成晚發夢   好似無瞓過咁   有啲頭暈暈 ~

平時同里奧大人一齊去買麵包   咁今朝我居然直行直過   到差唔多過馬路發現里奧大人唔見咗   先醒起佢要買麵包   唉   真係好攰呀 ~

今朝坐小巴居然得幾個人   我仲以為自己上錯車   因為呢個鐘數好少會咁少人   可能好多人已經放假 lu   咁我坐喺司機位後面嘛   咁我好攰   所以灘屍咁挨喺度   我聽到司機話瞓覺 ?!   可能覺得就落車   好奇怪仲瞓   我話唔係瞓覺   只係好攰想合埋眼咋   之後佢話都放假啦    我話番到星期六呀   佢話咁都好啦   咁之後再傾唔知咩   佢無啦啦話做人最緊要開心   咁先身體健康   哈哈   多謝佢令我今朝突然間開心番   其實都 feel 到呢個司機係好人   因為啲人一話 xxx 有落   佢就好醒神咁話收到   好多司機唔會家嘛   手又唔舉   無停到車比人落   仲好話妳無叫落車㗎 ~

但今朝好奇怪   居然車程要 20 分鐘   但又唔覺佢開得慢㗎喎   所以到我食早餐要比較趕   食完之後又見到 8 卦   咁等埋佢啦   第個嚟嘅話我就會走   佢黎就會等埋佢囉 ~      

成個背脊好似火燒咁   心口又有啲痛喎   唔知係咪骨火呢   嗚嗚 ~

好在菇場唔忙   因為我完全係遊魂狀態呀   又頭暈暈先慘 ~

其實心情仍然係差   好激氣   好想喊   所以忍唔住 9 點就同阿 mi 呻    呻完舒服好多 ~

之後冰姑又搵我   佢放緊假嘛   好少會朝早 10 點幾搵我   咁就佢唔好彩要聽我呻   之後我呻完又再舒服好多 ~

到 11 點幾媽咪朋友 Fat Fat 打嚟問媽咪點 ?!   我就話媽咪咁咁咁啦   佢聽完之後都知我好激氣   同埋知道我同家姐咁探媽咪都好辛苦   佢都話成日叫媽咪要珍惜   我話嘥鬼氣啦   我依家唔會理佢   妳想問嘢就搵家姐 ~

嘩   真係感受到神嘅保守   讓我最需要人安慰嘅時候   有咁多位天使安慰我   所以我無理由再唔開心啦   哈哈 ~

Lunch Time 出去食   諗住食完番菇場瞓陣   但難得咁好天氣   所以都係周圍行下   好感恩比我去萬寧買到 5 盒朱古力   因為我仲未買年貨   見到啱就即買喇   唔係驚唔記得 ~

仍然 Hea 住等放工   今日里奧大人去太子見客   佢影咗花園街比我睇   勁多人呀   本來想叫佢去奇趣買燒餅比我食㗎   不過咁多人   佢一定唔同我迫   所以都唔叫   之後佢打嚟問我食唔食椰撻 ?!   我話唔食   仲諗住佢都唔會食   點知佢話買一個椰撻同一個蛋撻   因為驚我今晚探媽咪會夜番喎   所以要打定底   成日話我大食   其實佢自己都唔野少囉 ~

放工搭車去探媽咪   有 4 個人一齊入 Lift 同傾偈   之後有個 7x 歲阿伯同個女人講話講過笑話佢知   話尋日佢見到個阿婆   右手篤住拐杖   左手諗住扯高條拉練   但隻手係咁震震震   根本拉唔到拉練 (個阿伯做埋動作比佢地睇㗎)   咁阿伯好心伸隻手出嚟幫阿婆拉啦   點知阿婆打佢   嗰下我都忍唔住笑咗出嚟   之後個女人話可能驚你非禮佢呀 ~

最搞笑係原來頭先 4 個人係唔識㗎   因為我去大堂搭 Lift 嘅時候   全部係分散嚟行囉 ~

本來我都諗住好激氣咁探媽咪   但聽完阿伯講笑話   我又開心番   哈哈   今日出現 5 個天使   感恩感恩 ~

家姐一早已經今晚約咗同事剪髮同食飯   所以我今晚都會睇探媽   唔係家姐又唔去剪髮㗎喇   咁我都想佢去啦   Relax 下嘛 ~

但我今晚一定唔會同媽咪講嘢   真係要比佢知道   有啲嘢妳自己唔珍惜   後悔嘅只有妳自己呢 ~

去到見到佢都 OK 精神   我只問佢一句有無嘢就無再望佢   因為無櫈   所以我坐窗邊   之後佢叫工人拎張櫈比我   又問我食唔食雪梨   飲唔飲嘢   總知佢一問我一答 ~

尋晚就成晚講嘢鬼食泥   好明顯係扮可憐   好在我哋聽唔到都唔會再問佢   今晚講嘢就清楚講每一隻字   不過我都無理佢   因為我唔係一個好惹嘅人   仍唔係好似家姐咁 "林謝謝"   妳要乜就有乜囉 ~

婆婆 7 點又打嚟   諗住同佢講話媽咪出咗院就唔打嚟啦   點知又打   不過我哋唔會同佢講話媽咪又入院   因為佢真係好煩   佢真係要打到妳聽為止   大佬呀   部手機唔係 24 小時痴喺妳心口度   一響要即聽㗎   佢真係黐到舅父無聽電話   就打埋比舅父外母   大佬   睇佢都應該係問舅父有無嘢之嘛   話無嘢就收線啦   因為佢成日都問我   媽咪有無嘢嘛   咁駛唔駛周圍打比人呀   真係好煩 ~                              

媽咪話想聽日食通粉   叫工人買   咁工人話想試下自己煮啦   咁我即上網搵相比佢睇啦   佢好搞笑   成日叫我搵啲好嘅牌字比媽咪食   之後佢就高 8 度話係比媽咪食呀   唔係我食呀   咁佢真係對媽咪好嘅   同埋如果真係食   佢係食少少咁咋   真係留比媽咪食呢   我話佢自己都要食啦   一齊食嘛   食完我再買囉   唔好成日慳住食 ~

之後佢睇到蕃茄湯通粉嘅相   佢就話整呢個   再加啲瘦肉比媽咪   但其實佢唔食豬家嘛   但佢都照煮   等媽咪有啲肉食下   最多佢煮嘅時候分開   妳話吖   工人咁好係咪要珍惜   成日仲鬧   所以我私底下成日會買嘢比工人   慰勞下佢   講真   佢係工人咋   唔係一定要對妳好嘛   但我就一定會將佢成為屋企人一份子   因為佢對我都好好好好   媽咪買咩呢   佢都會買多兩份比我同家姐架 ~

里奧大人晾埋衫   差唔多 7 點嚟到   我哋差唔多 7 點半就出去問姑娘   媽咪情況點   佢話媽咪個心肌酵數高咗   所以有啲肺積水   一陣會打去水針   咁想試下甩貓鬚   但又有啲氣喘   所以我話奇怪囉   尋日醫生又比佢出院   但其實媽咪都話坐得唔舒服㗎喇   咁姑娘都話如果唔舒服可以同醫生講唔出院   唔好夾硬嚟   我咪話係啦   出出入入仲煩 ~

咁就算媽咪甩咗貓鬚   都要觀察幾日   所以應該喺醫院過年㗎喇   不過我覺得最緊要安全   唔係成日心掛掛仲慘 ~       

今晚 7 點 45 分走喇   又凍又餓呀   諗住去大快活食煲仔飯   點知無哂   所以我話去大阪王將呀   因為好想食餃子   哈哈   嗰刻我即時諗到自己   唔好成日話人食嚟食去都係嗰啲   我自己都一樣 ~

好鬼飽   番到屋企要抖一陣先沖涼   咁沖完涼個背脊無咁痛   所以熨衫   里奧大人成日叫我抖   不過我話想郁下囉   咁褲就留比里奧大人熨    因為好重   同埋太多袋   所以我最憎熨佢啲褲   同埋西褲一定留比佢自己熨   因為我次次都熨到雙骨   所以比佢熨番   唔好嘥我心機嘛   哈哈 ~

熨完都 10 點幾   係時候休息喇   再睇多陣電視   11 點半瞓 lu ~