吉列三重奏定食 (蝦 / 豬柳 / 黃金豚肉餅跟白飯) ($75) - 里奧大人話要食 "新野" 其實呢間嘢好多都係炸物 同埋美中不足係無小食 如果唔係就可以有多啲選擇呢
( 5-FEB-2016 FRI )
星期五又要早啲起身 咁里奧大人先可以去餐廳嘆下早餐 咁我喇喎 都起身啦 ~
早到餐廳就一定要食勁餐啦 唔係坐唔到咁耐 之後食完又見到 8 卦 又等埋佢啦 ~
諗住菇場唔忙 點知 11 點先嚟忙 但其實工廠都收爐 都唔知點解我哋仲要番工 ~
Lunch Time 出去一田買嘢 之後再買嘢食番菇場喇 今日好陽光 所以行到有啲熱添呀 ~
仍然忙呀 好在 4 點左右就搞掂 呵呵 ~
放工去探媽咪 諗起自己都好笑 成日把口話唔探唔探 唔會理佢 里奧大人都話我得個講字 點會唔理媽咪 哈哈 咁又係 激起氣嚟 真係乜都講㗎啦 唔係點發洩 不過都係嗰句 講咗唔聽 我真係唔會再講 ~
好感恩好快有車 所以 6 點去到醫院 見媽咪食醫院飯 咁工人又煲咗豆腐魚肉湯佢飲 咁都好 無咁悶嘛 ~
媽咪都精神 感恩感恩 6 點 40 分家姐 Whatsapp 問我喺邊 我話出咗街 之後佢話咁算啦 仲想唔嚟 咁我即打比佢啦 因為佢唔嚟都無所謂 我到咗嘛 點知頂佢 原來佢呃我 之得唔打比佢啦 哈哈 ~
佢話覺得我今日好奇怪 平時去唔去媽咪度都會 Whatsapp 佢 今日見我失蹤咗 但佢又忙 都唔得閒問我 我咪話囉 我知妳忙 又無係特別嘢 都唔 Whatsapp 妳 lu ~
之後佢話婆婆打比佢 但我話唔好講媽咪入院 費時早午晚 3 次 大佬 星期六日可能 5 次 我想清靜下 同埋我叫家姐同婆婆講 不如叫佢去做平安鐘義工啦 咁鍾意打電話打到人地聽到為止 係咪先 ?!
我同佢講話婆婆尋晚都打比我問媽咪點 我話無嘢 之後佢串串共咁話 : 妳住好近喎 我即刻都好串咁話好近又點呀 ?! 放工番屋企煮飯㗎 唔駛做呀 ?! 之後佢笑住話係呀係呀 都黐鬼線 咪以為我唔敢話妳呀 如果今晚佢再係咁打比家姐阻住佢做嘢 我仍都會鬧佢㗎 係咪一世都唔駛做嘢 時時刻刻拎實部手機 等妳打嚟要即聽呀下 ?!
家姐話我好勁呀 我話勁咩呀勁 我最憎人講嘢啲語氣 好似奉旨去做咁 如果佢好好聲氣話 妳同媽咪都住得近㗎喎 會唔會探下媽咪呀 ?! 咁我條氣都順啲 同埋我話我唔明點解佢咁早打嚟做咩 一個鐘頭前同一個鐘頭後 答案都係一樣 仲有之前已經打咗比工人兩次㗎喎 咁打嚟做乜 Q 呀 ?! 練指力呀 ?!
關心一個人唔係咁日以繼夜 夜以繼日咁樣打打打 人哋只會覺得妳好煩 ~
家姐 7 點幾嚟到 又話好餓 工人即刻比湯佢飲 又比番啲蕃茄通粉家姐食 最搞笑我話 7 點 45 分走喇 祈禱先 家姐隻手拎住碗湯 之後工人即刻拎走家姐碗湯 可能佢覺得咁祈禱唔尊重呀 咁祈禱完之後佢第一時間即刻拎番碗湯比家姐 動作好快㗎 好搞笑 ~
個人好凍呀 所以勁想食熱鍋 又叫里奧大人去吉豚屋攞位先 好在佢攞位先咋 要等 4 張枱 好感恩我去到就有位呢 ~
之後家姐話佢 Whatsapp 阿姨話媽咪入院 最搞笑家姐同阿姨講話婆婆每日打嚟 3 次問媽咪點 唔聽就連打 8 次 阿姨話佢都係 搵唔到就會即刻打埋比大細表妹甚至姨丈 都幾煩 我覺得佢話婆婆都幾煩 好搞笑囉 因為我成日以為得我覺得婆婆煩咋 照咁睇 我估應該好多人都覺 但其實都唔知要咁急搵到一個人做咩 睇佢有無事嘛 如果佢暈咗 妳又點做呢下 ?! 喺電話入面飛去救佢呀 ?!
咁之後大食表妹打比我 問我初一係咪同婆婆拜年 但佢話婆婆只係話 12 點飲茶 11 點半要喺佢屋企坐一陣 點都唔講邊度飲茶 大食咪慶囉 要個個圍住佢嚟行 最搞嘢係婆婆都無問我同家姐初一嚟唔嚟 可能要我哋親自打比佢啩 大佬 妳要 Book 定位 即係好早要知人數家嘛 同埋我哋依家成日探媽咪 真係好鬼攰 我依家年貨又未買 利是又未包 仲得鬼閒記得問妳年初一點咩 ?!
要人尊重妳 但妳都要睇下自己點對人先得嘛 妳唔預我飲茶堅無所謂 我拜完年就走 反正紅磡大把嘢食 食得仲開心 ~
里奧大人無啦啦又話食雪糕 不過我唔食呀 好鬼飽 ~
番到屋企就開機洗衫 之後沖涼 抖陣就熨衫 睇多陣電視 11 點幾瞓喇 ~
沒有留言:
發佈留言