上海婆婆 360 @ 九龍灣 ( 29-FEB-2016 )

酸辣湯 (位) - 夠酸夠辣   但最緊要係夠熱呢   所以覺得好好味呀    

松仁糯香牛肉粒 - 原來係年糕   咁就開正我嗰瓣喇   哈哈  

上海粗粉 - 里奧大人最愛      

( 29-FEB-2016  MON )

好感恩一覺瞓天光呀   連瞓 8 個鐘真係好正   起身都唔覺點攰呢 ~

今朝見到陽光超勁精神啦   同埋又凍凍哋   呢啲天氣最好   但就乾燥囉   洗衫一流   我最驚洗冬天衫   件件厚嘢   里奧大人仲會着燈芯絨褲同抓毛衫   每樣洗兩件都已經一機   所以呢   次次都會押到最後先洗   哈哈哈哈   佢又話我衰㗎喇   成日洗自己啲衫先   但無計啦   我負責開機家嘛   呵呵 ~

估唔到有啲餓   所以又食芝腿治喇   之後收到 8 卦 Whatsapp 話一陣嚟   佢差唔多落車就會 Whatsapp 佢食嘅早餐   xx 麵   腸蛋 Run Bread 同 HOT   我問佢 HOT 乜呀?! 佢話係 Hot O Tea 熱檸茶呀   呢下真係諗唔到   哈哈 ~

菇場唔太忙   可以博命 Load 相同揀相   因為要用好多時間整㗎   難得有時間就快快手整呢 ~

諗住出去食 Lunch   點知醫院醫生打嚟   真係嚇鬼死   原來佢講媽咪嘅情況比我知   話媽咪個肺葉摺埋咗   加上本身心衰竭又哮喘   腎又唔好   所以想 Check 下媽咪個肺有咩問題   點解會肺發炎   同埋驚可能係腫瘤   但落顯影劑嘅手術就一定唔會做㗎喇   因為可能會導致急性腎衰竭 ~

咁醫生話有個氣管內窺檢查   大約 15 分鐘左右   就係由喉嚨入條管   再會抽啲嘢出嚟驗   但過程當中可能有爆肺引發哮喘   甚至流血不止   因為有病人都試過   嘩   聽到都驚啦   因為媽咪食緊隻藥真係會有流血不止嘅情況出現嘛   就算之前做白內障手術   醫生都問有無食嗰隻藥㗎   之後醫生話以媽咪身體狀況   風險都算高   但如果其他老人家就係半高風險   同埋話如果驗到有腫瘤   以媽咪身體狀況都做唔到電療化療   咁我覺得其實 Check 嚟都無幫助   所以我話問埋家姐先覆佢呢 ~   

之後醫生話媽咪呢個星期會出院   依家係等緊部氧氣機   一有就可以出院㗎喇   呢個醫生非常之好人   講解又清楚   好難得喺電話可以問咁多嘢㗎   多數要妳約見醫生家嘛   所以非常感恩呢 ~

咁傾完就打比家姐   佢都話唔好做好啲囉   媽咪一聽就已經驚啦   唔血壓高就有鬼   不過我今晚都問問媽咪先   始終身體係佢嘅 ~

差唔多 1 點先沖杯麥皮   上網睇下嘢   話咁快又要開工 lu ~

放工去探媽咪   諗住上車同冰姑 Whatsapp   點知高妹話陪我一齊坐小巴 ~

去到見到媽咪坐櫈   但個頭中哂落嚟瞓覺   係咪真係咁攰呀 ?!   其實我好慶㗎   等咗佢 10 分鐘都係合埋眼   我話妳再瞓我就走喇   妳自己唔珍惜   嚇到工人即刻叫醒佢   之後佢又望我囉   又講下嘢   里奧大人今日叫我唔好發脾氣話媽咪喇   但見到佢咁真係好鬼慶   我話妳係咪真係覺得我哋探妳   一啲都唔攰㗎 ?!   覺得我哋唔駛做呀 ?!   家姐今日 Lunch 都無食呀   要交 Report 比老細睇呀   妳好心就自己珍惜下啦   有啲人無得郁呀   妳有得郁都唔郁 ~

其實我知媽咪都唔做手術㗎喇   所以我話醫生話想好番   一係做運動一係做手術   佢話做運動   我話妳係先好   懶到出汁   機能唔郁就郁唔到㗎   妳真係以為好得意咁 ~            

之後有個護理阿姨唔知 Check File 啲咩   佢話媽咪晏晝好精靈㗎   又睇電視   呢兩句就即觸動我神經喇   我好大聲同阿姨講話我次次探佢佢都係瞓   可能佢唔想見到我咃啦   所以我唔探佢   妳咃都唔好怪我   我唔係山長水遠嚟睇佢瞓覺嘛   阿姨之後笑笑口話可能呢個精神狀況要瞓覺呢   我心諗   咁仲衰啦   明知我哋探妳   妳咪自己調覺啲時間囉   所以我同媽咪講話出院先探佢   同埋我話無人嚟探妳係應該   係妳自己攞嚟 ~

到我走嘅時候   佢又睇電視咁架喎   對眼係好精神咁㗎喎 ~

咁里奧大人 7 點 15 分打嚟話放工   咁我都即走喇 ~   

唔知食咩好   咁里奧大人話想食上海粗炒   清清哋喎   居然用清清哋嚟形容上海菜   哈哈 ~

去到九龍灣都 8 點   一見里奧大人   我就即刻話我忍唔住話媽咪呀   佢話都叫妳唔好話咯   之後我比媽咪中眼瞓幅相佢睇   佢即刻唔出聲啦   只係好無奈咁笑   話媽咪自己唔珍惜   算吧啦 ~

食完都番屋企喇   好在里奧大人頭先開機洗衫   咁我沖埋涼   晾埋衫就休息下喇 ~ 

打下機   又等埋里奧大人 Load 相   11 點半先瞓呀 ~