黑椒焗三文魚 + 新鮮蝦卷 (外賣) + 旺菜 ( 10-DEC-2019 )

( 10-DEC-2019  TUE )

感恩今朝起身都精神   搞掂哂見時間早咗   所以同里奧大人食早餐呢 ~

呢排唔知做乜鬼   食完嘢抖陣之後   個胃就會有啲脹   成日想嘔想嘔咁   煩 ~

菇場勁忙   所以好快又到 Lunch Time ~

去完銀行入票   之後去買菠蘿叉燒包   再買份三文魚同雪梨就番菇場喇 ~

影份三文魚比阿 mi 睇   話佢知只係 $15 咋   佢話好平   之後問邊度原產地 ?!   食完因住肚痾   搞到我都驚驚哋   聽日經過問下咩原產地先   衰 ~

仍然勁忙   放工前未做哂㗎   但留番聽日做 lu ~

買埋菜就番屋企   煲埋雪梨茶就拖地   里奧大人 6 點半放工   我都要預備晚餐喇 ~

是日懶餐 - 黑椒焗三文魚 + 新鮮蝦卷 (外賣) + 旺菜

黑椒焗三文魚 - 估唔到份量都幾多   我加咗啲黑椒去醃   不過今次時間關係   唔係焗得咁好   但好在都脆卜卜 ~

三文魚份量都好多

新鮮蝦卷 (外賣) - 尋日喺荃灣嘅牛丸哥哥買㗎   $30 有 14 條都抵   因為都好大條   又好味道   下次再買多啲   擺落冰格做儲備都唔錯 ~

旺菜 - $7.5 一棵仔都貴呀   今晚終於清哂啲辣菜甫喇 ~   

洗埋碗就清潔個廚房   再開機洗衫   之後就沖涼喇 ~

一望個鐘已經 9 點半   食埋生果就休息   里奧大人居然叫我幫手睇酒店   真係火都嚟   大佬呀   我做到 9 點半先停呀   比我坐低休息下都唔得 ?!   一坐低就要幫手搵嘢   你好唔好意思呢 ?!   之後佢都無再叫我睇   驚我發顛   哈哈 ~

搽完痴孖筋藥膏   再用艾燻肚   里奧大人話咁快燻完   我話細細支   唔會太耐啦 ~

睇埋阿爺廚房   11 點 15 分都自己瞓先喇   今晚好攰呀 ~