嘉豪酒家 @ 九龍灣 ( 15-DEC-2019 )

10 個人叫 8 個餸   因為唔想叫套餐



白飯 8 個 ($112) - 白飯價錢已經 $14/碗了   我好耐無喺酒樓叫白飯食喇

紅燒雜菌豆腐 ($98)



北菇扣鴨掌 ($108)

瑤柱扒豆苗 ($128)



沙爹金菇肥牛煲 ($118)

菠蘿咕嚕肉 ($108)



翡翠炒伎蚌 ($138)   仲有嘉豪鎮江骨 ($108) + 瑤柱粉絲什菜煲 ($105)   不過無影

( 15-DEC-2019  SUN )

今朝里奧大人好早起身   鬧鐘響完之後   我都瞓番   之後唔知幾點醒咗   望下鐘好似 8 點   咁繼續瞓   但又瞓唔到   因為一覺瞓咗 8 個鐘   咁再望個鐘係 8 點 15分   其實我都好精神   所以即問家姐係咪飲緊茶 ?!   佢話飲緊   咁我就即沖涼   之後即飛去酒樓搵佢哋喇 ~

紫金名醬豉蒜蒸鳳爪 - 我話唔知食咩好   家姐話食醬汁鳳爪   哈哈



干蒸牛肉賣 - 好少酒樓有呢個點心了

香煎畔塘馬蹄糕 - 呢個好味道



我同家姐講話佢好似阿呆   佢話邊個阿呆 ?!  我話藍色帶眼鏡果個卡通人物呢   佢話果個叫阿愁呀   笑死我呀   哈哈哈哈哈哈哈哈 ~

飲完茶就去拎個玫瑰鍋比姑奶   順便買咗 2 個熱辣辣嘅菜肉包比佢   佢又比咗啲龜苓膏比我   咁我拎比里奧大人啦   傾咗 15 分鐘左右都要走喇   我趕住番教會呢 ~

家姐好搞笑   問我有無同佢傾偈 ?!   我話有呀   家姐話咁咪好囉   我話我對佢都好嘅   係把口衰啫   之後家姐話: 妳要當佢係我呀   知唔知呀 ?!   我即覆話無人可以代替妳同媽咪   而事實佢又未去到好似我家姐同媽咪咁愛我喎   其實根本係無得比   天同地囉 ~

手機無哂數據   所以睇唔到邊個巴士站   行咗好大段路   真係行到出汗    終於都係遲咗番教會呀   激死我 ~

崇拜完畢就同里奧大人食 Lunch   之後佢要開會   我就去 APM ~

黑椒汁雞肶煎蛋飯 ($48) - 我好鍾意食啲什菜   可能爽爽哋啦

蔥油雞翼 (+$18) - 我唔太餓   所以食啲小食算喇



食完就去 Trade-in 部 LGV30   估唔到有$1,030 呀   勁開心   咁我部手機又無跌崩同刮花呢   因為我覺得手機好貴   所以會好好愛惜部手機呢 ~

搞掂哂就去烘焙店買嘢   之後去淘寶拎嘢   左右手都一大袋   好在唔係話太重咋 ~

番到屋企都 4 點幾   抖陣就開機洗衫   之後再熨 2 機衫   其實開始有啲攰   但唔敢瞓覺   因為一陣要出去 ~

搞掂哂都接近 6 點   抖陣就出發去九龍灣喇 ~

里奧大人 6 點 10 分開完會都即走喇   今日係開心組弟兄姊妹即興做冬呀   可惜組長唔得閒   如果唔係就齊哂人呢 ~

7 點一齊出發去酒樓   我掛住傾   之後喺里奧大人手上拎起佢對筷子夾嘢   我正想夾餸嘅時候   佢話妳唔好以為呢對係公筷喎   我食緊㗎喎   哈哈哈哈 ~

話咁快就 9 點   之後再一齊去弟兄 R 屋企坐下   佢屋企裝修   所以喺九龍灣住大半個月   佢今日又難得得閒   所以要搞個即慶飯局   因為我崇拜無睇手機   原來里奧大人已經覆咗佢哋今晚會出席 ~

我地無飲檸檬茶呢啲   反而試飲藥水  哈哈 ~

佢哋話對鼻敏感好呀   所以叫里奧大人試試

傾到 10 點半就一齊走人喇   今晚突然即興飯局   真係好開心 ~

Berry 姐呢排嘅睡姿真係好得意   之後我同家姐講   平時 Cushion 係打直放   依家打平放   Berry 姐似乎幾鍾意咁   哈哈



番到屋企即沖涼   睇多陣電視   11 點半先瞓呢 ~