麻辣手撕雞 (外賣) @ 屋企 ( 12-APR-2020 )

( 12-APR-2020  SUN )

今朝里奧大人要番工   我瞓到 9 點幾都醒咗   不過就頭痛囉   因為開咗冷氣   蓋冷氣被又凍   但蓋里奧大人張被又熱   所以其實瞓得都好唔好呢 ~

沖埋涼就去超市買嘢   之後買埋早餐就番屋企喇 ~

頭痛到個人呆呆滯滯咁   同埋無咩胃口   不過要食藥   所以點都要食啲嘢 ~

呢份早餐只係 $28 都好抵   因為就咁食個細嘅銀針粉已經好飽   炒麵留番 lunch 先食   其實我睇餐牌   以為係得炒麵一樣咋

抖陣又抹下嘢   之後仲熨埋 2 機衫   咁樣可以分散注意力   哈哈 ~

里奧大人 2 點幾番到屋企   又可以喺屋企食舒舒服服食午餐喇 ~

我同里奧大人講話已經熨咗 2 機衫   佢碌大對眼好愕然咁   我話做咩咁嘅樣 ?!?!   佢話假期休息下嘛   無諗過我會做嘢   我話其實我自己喺屋企   好多時都會做下家務   咁講真   唔駛番工而做家務   其實係無咁攰嘅   同埋佢今日咁早起身都攰啦   我做得到都會做嘅 ~

佢食完都沖涼瞓覺喇   我就睇 Youtube   其實個人仲係呆呆滯滯咁   所以話可能今晚唔煮飯呢  ~
  
里奧大人瞓咗 2 個鐘   佢一起身就叫佢飲湯   佢最驚   哈哈   因為成日叫佢食呢樣飲嗰樣   佢知道份量一定係多呢 ~

6 點幾去買外賣   今晚飯都唔煮喇   買多一個白飯就搞掂 ~

7 點左右開飯   里奧大人見到碗湯   即話咁頭先咁早飲來做咩 ?!?!   嘩哈哈哈哈    笑死我   我話頭先早啲飲   係因為想比你夜晚再飲多碗啫 ~

洗埋碗就即沖涼   之後休息 ~

同里奧大人講話想睇笑片   佢極力推介周星馳嘅 "回魂夜"   成日話係笑片嚟㗎   唔驚㗎 ~

我好記得我有晚住醫院   就係播回魂夜   嚇到我死死下   果時住公立醫院   里奧大人 8 點就要即走   咁我當然之後都唔會睇啦   但都已經好鬼驚啦 ~

咁今晚再睇   其實係幾好笑嘅   最經典係果句: 我係妳奶奶呀   哈哈哈哈哈哈 ~

但最尾係用電鋸殺人   所以睇完之後要睇番 "無心法師 3"   冷靜一下 ~

今晚又係差唔多 12 點先瞓   希望一覺瞓天光啦   哈哈哈哈 ~