脆爆雞腿包套餐 + 麥香雞 (外賣) ( 13-SEP-2025 )

食剩哂啲薯條   又要留番聽晚食 lu

( 13-SEP-2025  SAT )

臨醒之前個夢係同 CC 去旅行買衫   見到條藍綠色扳肩好靚   但間店舖得 1 條   所以我即刻淘寶買   因為想一齊着出街呀   之後鬧鐘響 lu ~

以前真係會同 CC 每年買一次衫   佢仲唔比我食午餐添㗎   因為要爭取時間   放工即去買   又呢度行下嗰度行下   要買夠先食晚餐㗎   依家真係無呢啲精力 lu ~

今朝同里奧大人出去食早餐   之後我就去家姐屋企喇   開心開心 ~

Berry 當然熱情歡迎我啦   但最得意係如果一日見 3 次   佢都會咁   我即刻諗   如果里奧大人番咗屋企 3 次   我唔會每次都咁熱情咁歡迎佢囉   哈哈 ~

坐定定

Berry 聽到鎖匙聲就已經預備跳梳化   之後家姐 姐夫入到嚟   佢居然只係撲佢哋但無吠呀   我真係第一次見咋 ~

家姐話 Berry 轉咗老犬糧   所以成日周身抓

抓到啲毛甩哂

我同家姐傾偈   Berry 瞓喺我隻右手掌上面   我隻手好似隻企鵝隻手咁樣擺咗成 10 分鐘呀   好在無手痺咋 ~

家姐話阿打間唔中會揸車去深圳   我話有車就方便囉   如果無車就要來回兩個鐘   其實都攰   所以我鍾意兩日一夜囉   之後問我有無去街市 ?!   我話未至於去咁地道嘅地方   哈哈 ~

講講下街市   可能令家姐聯想起超市   所以即刻拎啲 Cash Coupon 出嚟   話係姐夫朋友比㗎   我話唔駛比咁多我啦   之後佢話佢多數上網買嘢   我話如果要去百佳買嘢就搵我   我幫佢買   無理由比完我又用番自己錢去買嘛

黑毛啤梨

唔望我唔緊要   最緊要唔好走開   哈哈

佢其實好眼瞓

家姐依家每個星期日都要去何文田   咁我都同佢一齊搭地鐵   又可以一路行一路傾   一舉兩得呀 ~

諗住唔去 A1 買包   但原來家姐想換嘢   咁我就買啦   反正聽日都要買   咁依家買完   聽日唔駛特登去買呢 ~

見有時間就去黃埔 AEON 超市買下嘢   再買埋砵仔糕就走喇 ~

台式菜心 ($14.9) - 我特登行去睇咩價錢   我諗住最多都係 $10 㗎咋

經過 Boutique 買咗 2 件薄身外套   本身 $90 減到 $30 呀   上次已經想買   不過拎住好多嘢無買   今日真係忍唔住買咗 1 件黑色長身   本來再買多件黑色短身   但又覺得無咩分別   所以買件白色喇 ~

買完就接到里奧大人話放工   咁食埋午餐先番屋企 lu ~

我同里奧大人講話出親街就想買嘢咁   你覺得無事出街少破財係咪真呀 ?!   定係賤物鬥窮人呢 ?!   佢話無事出街少破財係真喎   唔出街點買嘢呀 ?!   我話賤物鬥窮人即係點都要用錢買嘢   咁嘅邏輯係啱嘅   哈哈 ~

宮保雞丁飯 ($48) - 味道 OK 喎

花生好味道呀

口水雞飯 ($52) - 今次唔辣嘅   同埋多咗麻醬   我唔係咁鍾意

食完就番屋企   里奧大人就瞓晏覺   我抖多就去參加 LA 活動   差唔多 4 點 45 分先完畢   我就直接去里奧大人公司搵佢喇 ~

我番崇拜   完畢就去里奧大人公司幫手   搞到 8 點半呀   之後同阿妹 阿一傾偈   麥記個 Apps 又唔得   所以阿妹叫我哋行去買喎   成日要人陪佢番屋企   已經唔係第一次   哈哈 ~

番到屋企即刻開餐喇   原來已經 9 點 15 分   因為我早瞓   所以真係唔鍾意咁晏食晚餐   但唔食又餓喎 ~

食完抖陣就沖涼   睇下 Youtube   今晚 11 點 10 分先瞓覺 ~