( 28-SEP-2025 SUN )
今朝同里奧大人一齊食早餐 食完之後我就去家姐屋企喇 ~
星期日坐車好少睇電話 比對眼休息下 同埋我鍾意周圍望 睇下有咩餐廳都好嘛 哈哈 ~
又嚟落車先落雨
一入屋當然比 Berry 撲到顛咗 有時想洗手都唔得 因為唔摸佢 佢係咁嗚嗚聲又尖叫呀 ~
等佢冷靜之後就好似唔識我咁 幾咁有性格 哈哈 ~
好眼瞓嘅眼睛
咁樣就當堂後生哂 哈哈
望下左
又望下右 但就唔會望中間 哈哈
9 點咋噃 咁快就眼瞓 ?!
家姐話好似細個嘅樣 我話邊似呀 個鼻咁長
開始想瞓覺
無奈嘅眼神
家姐同姐夫入屋 Berry 又係無吠佢哋呀 家姐就即刻問有無吠我 ?! 我話有啦 仲嗚嗚聲好似廿年無見咁激動咁呀 我話下次錄比妳睇 ~
因為家姐就嚟生日 所以我都比定生日利是比佢 我唔想遲比佢呀 ~
家姐成日未講先笑 搞到我同工人 工人朋友都一齊笑 工人朋友同家姐講話笑完先講 我真係覺得佢哋廣東話好叻 哈哈 ~
Berry 又周身抓 但我話佢頭先完全無抓到喎 家姐話工人又係話家姐喺度先抓 係咪真係咁古靈精怪呀 係都要家姐擔心咁 ~
同家姐傾偈嘅時候 咁 Berry 黐住我瞓覺 所以叫仍講嘢唔好咁大聲 同埋無咩必要唔好去廁所 哈哈哈哈 ~
家姐會同糟糟講好多嘢 有一日佢同糟糟講話想同妳講啲嘢 但都係驚妳嬲所以遲啲講 糟糟碌大對眼話要即刻講呀 我話妳唔講遲啲先講呢句都好啲 妳咁樣講搞到仲更加想快啲知呀 哈哈 ~
家姐仍然鍾意八哥 所以糟糟送呢個電話套比家姐 好似要 $600 定 $700 㗎 我話真係唔知原來電話套要咁貴喎 哈哈
10 點進入熟睡狀態
Berry 發夢呀 所以要摸一摸去
咁睇個鼻哥窿好似好細 但我伸隻手指喺佢鼻哥窿前面 吹氣嗰下都幾大風咁㗎 哈哈
之後仍然發夢 個頭係咁郁 個咀又好似食緊嘢咁 我第一次見到佢咁樣咋
我托住佢個頭
之後又全程挨住我隻腳度瞓覺 咁多肉地一定舒服啦 因為佢瞓咗成個鐘呀
對眼好搞笑呀
差唔多 11 點 10 分 家姐諗住換衫出門口 點知 Berry 挨個頭仔落我膊頭度呀 所以同家姐講話遲少少先走呀 哈哈 ~
Berry 係咁黐實我呀 仲將個頭仔挨落我膊頭 真係第一次咁咋 搞到我唔敢起身
叫家姐幫我影呀 因為 Berry 真係從來無咁樣黐住我㗎
同家姐一齊搭地鐵 咁傾開 Pantry 洗嘢 家姐公司有個男同事洗碗洗成 10 分鐘 洗唔係問題 但係全部人排緊隊就洗快啲啦 ~
家姐話有個同事仲離譜 家姐讓佢洗杯啦 點知佢倒啲水落家姐隻杯度 家姐要再洗 我話妳做咩唔拎起隻杯 ?! 佢話已經擺開咗 我話下次直頭拎起好過 ~
因為家姐落車先 咁佢要行前搭扶手電梯嘛 到列車開出 佢企定定同我揮手 好在我都係一路望實佢 佢話估唔到我咁遠都望 我話呢啲喺我哋由細到大嘅習慣 我唔會改呢 哈哈 ~
見有時間就去 AEON 超市 之後買午餐去里奧大人公司喇 不過我要番屋企放低嘢先呢 ~
托家姐工人朋友喺印尼買 咁啱做特價 好似 HK$3X/支 因為佢係買優惠裝定咩 家姐叫佢總知平就買就得㗎喇 哈哈
里奧大人要開會 咁我食完都走喇 ~
辣子雞拚生炒骨飯 + 蘿蔔牛腩拚黑椒牛扒飯
我陪阿妹去搭車 佢話送我番屋企 大餅聽到好愕然 心諗做咩要送我番屋企 哈哈 ~
之後佢話多謝我聽佢呻 我話其實我都有咁嘅情況 所以會好了解佢心情囉 ~
番到屋企即熨 2 機衫 搞掂就出發去 AEON 喇 雖然 4 點幾又無咩太陽 但都覺得好熱咁呀 ~
拎完壽司再兜一個圈 之後買埋粟米湯同杯麵就走 lu ~
本來唔拎購物車 但拎住盤壽司同圍睇嘢好唔方便 哈哈
成個人都係汗 呢個時候就最驚見到識嘅人㗎 真係見到都要辦見唔到呀 哈哈 ~
一入屋即刻開大冷氣 之後即刻沖涼喇 ~
里奧大人 7 點 10 分先番到屋企 佢話想食完先沖涼 我話今晚食壽司之嘛 梗係沖埋涼 舒舒服服咁食啦 佢話驚我要等 我話我都預咗你沖埋涼先食㗎 ~
好多時佢都會話驚我呢樣嗰樣 搞到我好似好惡咁 不過我都覺得有時係自己衰嘅 懶係好咁但又比說話佢聽 其實真係衰過直接鬧佢呀 哈哈 ~
同里奧大人一齊睇埋下半 Part "封神第二部 戰火西岐" 成日以為做完點知原來未做完 估唔到係咁呢 ~
紅豆砵仔糕 ($18/5 個) 真係好抵食 最緊要係好味道呀
估唔到今晚無得睇 "臥底旅行團 5.0" 呀 咁唯有睇 Youtube 啦 都睇到 10 點 45 分瞓先呀 ~
沒有留言:
發佈留言