咖哩薯仔雞下肶 + 千層蔥抓餅 ( 18-SEP-2025 )

( 18-SEP-2025  THU )

感恩一覺瞓天光呀   瞓到 6 點 53 分都醒醒哋   不過感覺好似仲瞓到   所以瞓到鬧鐘響先起身喇 ~

早餐食茄汁薄餅 + 丹麥條   又鹹又甜都唔錯㗎 ~

巴士差唔多埋站嘅時候   我企喺門口等落車   咁我聽緊歌嘅   但聽到好似司機同我後面個女仔講嘢   之後個女仔按鐘再講唔好意思   原來企喺門口個男人無按鐘呀   我平時一起身都會按鐘但今朝完全唔記得   真係好彩個女仔落車咋   唔係我都唔知喺邊度落車好 lu ~

菇場唔忙   可以做自己嘢 ~

Lunch Time 蒸完飯就出去行下   經過間 Boutique   有個應該係老闆娘嘅人對個客講話妳着到咩 ?!   客人話我着唔到咩 ?!   老闆娘話着到但貼啲囉   最後唔知佢有無買呀   但我覺得真係妙問妙答呀   哈哈 ~

唔忙就繼續做自己嘢   咁就好快放工㗎喇 ~

買埋手抓餅就番屋企   今晚預咗要啲時間   所以唔打比里奧大人   點知佢今晚 6 點 20 分就番到屋企   但要 6 點 40 分先食得   哈哈 ~

其實屋企仲有好多紙巾   但阿花話 Miffy 好靚   咁我又買包啦

是日晚餐 - 咖哩薯仔雞下肶 + 千層蔥抓餅

咖哩薯仔雞下肶 - 前晚整㗎喇   因為只有 3 隻雞下肶   所以加咗幾條雞肉腸   今次食落唔辣喎   但里奧大人話辣囉 ~

千層蔥抓餅 - 里奧大人鍾意食手抓餅蘸咖哩   咁就整比佢食啦 ~

洗埋碗就沖涼   今晚好攰唔做機喇 ~

同里奧大人一齊睇 Youtube   係介紹非洲國家啲生活   睇咗佢都有一段時間㗎喇   好佩服佢夠膽試好多食物   里奧大人話記得比 Like 支持下人哋呀   真係好少聽佢會咁講   咁有時我鍾意嘅 Youtuber 有 IG 同 Facebook 專頁   我都會用埋里奧大人手機點讚㗎   所以佢話奇怪點解會成日出啲佢無睇過嘅嘢   哈哈 ~

睇多陣又已經 10 點 45 分   係時候瞓覺 lu ~