芝士焗豬扒飯 ( 25-SEP-2025 )

蛋炒飯確係好味啲嘅

一個裝飯一個裝餸真係好好   因為好怕啲汁整到啲飯腍劈劈

( 25-SEP-2025  THU )

尋晚半夜去完廁所   算係好快瞓得番   但今朝鬧鐘未響都醒醒哋   正想望下個鐘幾點   鬧鐘就響 lu ~

早餐食燕麥方脆 + 朱古力奶   我真係食好少就夠   可能飲朱古力奶同埋半支咖啡   所以都好飽下 ~

加咗朱古力奶就變成一大碗

菇場唔忙   又做自己嘢喇 ~

Lunch Time 蒸完飯出去行陣   難得無落雨嘛   諗住買菜   但仲係最平要 $15/斤   咁我唔買 lu   不過就要買 3 個蕃茄 ($9)   再加個洋蔥 ($4)   我記得洋蔥平時係 $5/2 個㗎咋 ~

唔忙就做自己嘢啦   之後又傾下偈咁   咁啲時間就真係過得好快喇 ~

放工即走   買埋麵包就即番屋企喇   今晚晚餐好大工程呀   哈哈 ~

快快手咁切哂蕃茄洋蔥就焗豬扒   之後煮蕃茄蓉再炒飯   咁都用唔少時間呀   但今晚真係好想整豬扒飯囉 ~

里奧大人今晚 6 點 25 分就番到屋企   不過仲未食得呀   之後我一擺低碟飯   佢話好好味咁喎   咁就乖啦   未食讚定先   哈哈 ~

是日晚餐 - 芝士焗豬扒飯

芝士焗豬扒飯 - 之前喺一田買咗芝士   都係想整焗豬扒飯   咁里奧大人好鍾意食出面嘅焗豬扒飯   所以我又想整囉   佢話好食呀   不過今次我都信喎   因為佢好快食哂呀   哈哈 ~

洗埋碗已經 7 點半   里奧大人話唔做機   咁問佢食唔食蕃薯糖水 ?!   佢諗一諗就話食   因為驚我特登要煮   我話無咩所謂   今晚煮哂啲蕃薯   食唔哂就聽晚食都得 ~

煮完糖水就即開機洗衫   之後沖涼喇 ~

呢排鍾意睇 Youtuber 直播   因為講廣東話唔駛睇字幕   個人真係無咁攰㗎 ~

諗起以前覺得煮咩都難   蕃薯糖水呢啲更加唔會煮   但依家就覺得蕃薯糖水係超級易煮   哈哈

今晚唔係咁眼瞓   所以 11 點 25 分先瞓覺呀 ~