咖哩薯仔腸仔 + 撈麵 ( 19-SEP-2025 )

( 19-SEP-2025  FRI )

尋晚係咁發夢   搞到個人都瞓得唔係咁好添 ~

第一個夢係去萬寧買嘢   女職員話買多 $10 就可以送啲咩   好記得我話等我再睇下再買啲咩   咁妳幫我 Hold 住先   我最後拎咗 $11 嘅盒裝棉花捧   到比錢嘅時候   男職員話要買多 $18 先得   我好緊張咁即刻拎多幾盒細盒裝棉花捧 ~

第二個夢係鄰居同我一齊行   但佢係有啲問題嘅   少少嘢唔啱佢心意就會發顛   所以諗緊用咩方法話走   但佢點都跟住嚟 ~

第三個夢係我番到以前屋企   我坐喺門口等里奧大人   但木門位置見到家姐得個頭咁同我講 Hello   嚇到我撐哂腳同係咁叫人幫我開門呀   但我個袋放喺屋入面   我驚一入屋拎就關咗門呀   之後醒咗   起身嗰下個心仍然卜卜跳好驚呀 ~

呢幾個夢嘅場景都令我精神緊張   我起身真係有啲攰呀 ~

今朝里奧大人同我一齊起身   明明話 9 點半先番工   做完就番屋企嘛   之後佢話醒咗都番公司做啲嘢先 ~

我同里奧大人講話發夢家姐係鬼呀   佢話聽到我叫咗一下   我話喺夢入面係叫咗好多下㗎 ~

早餐食燕麥方脆   今次飲朱古力奶   當堂好味好多 ~

里奧大人怕熱氣   所以會浸 15 分鐘先食   但個心仲係有少少脆嘅   我就一定唔會浸嘅   好在佢都話浸到腍劈劈好難食咋   哈哈

菇場唔忙   咁做自己嘢 lu ~

Lunch Time 蒸完飯就出去行下   去完萬寧買潤唇膏再周圍行多陣   行夠半個鐘就番菇場開餐喇 ~

新聞報導話鰂魚涌濱海街地盤發現有炸彈   即話比家姐知啦   佢話佢同事食完個飯諗住加糖落杯奶茶度   突然有警察叫佢快啲走呀   家姐話做咩唔將奶茶外賣拎走 ?!   佢同事話等嘅期間爆炸咪死   所以拿拿聲走呀 ~

唔忙繼續做自己嘢   家姐話今日放 4 點半呀   咁都好呀   早啲走無咁驚 ~

放工去買雞骨草比里奧大人   再買龜苓膏比家姐   咁我拎嘅時候   阿姐話我隻手好凍   個身仲要震一震呀   何想而知菇場真係有幾咁凍呢 ~

今晚同家姐交收   所以叫里奧大人幫手蒸熱啲咖哩   佢話好易喎 ~

番到屋企見里奧大人熨緊衫   之後我開個煲嚟睇   啲咖哩好似座山咁   我話要灘番平先平均受熱嘛 ~

是日晚餐 - 咖哩薯仔腸仔 + 撈麵

咖哩薯仔腸仔 - 食埋聽晚先食得哂   其實一個星期就咁一日煮咖哩同一日蠔油燜餸   咁可以食足 5 日   哈哈 ~

撈麵 - 唔想嘥時間呀   所以整撈麵   不過里奧大人真係麻麻哋鍾意食   我話仲有好多咖哩汁   但我無倒落去   因為我驚食一到一半要去交收   唔想啲麵索哂咖哩汁會腍哂呀 ~

洗埋碗就同家姐喺地鐵站交收   時間啱啱好 ~

家姐拎住咁重都唔傾咁耐   喺 Whatsapp 傾算喇 ~

我屋企仲有生果   所以每樣要 2 個就可以了

同里奧大人一齊去做機   我一路做機一路 Whatsapp   所以好快就 25 分鐘   同埋頭先行咗好多路有啲攰   唔想做咁耐 ~

家姐話 12 個桃要 $990   但因為要送貨就貴啲呢   我話咁貴唔捨得食呀   家姐話我買比妳食咪得囉   我好捨得買嘢比妳同姐夫 Berry 食㗎 ~

 

我話係人都知妳錫我㗎   連我同事都知   佢話妳咁少同同事講嘢都知 ?!   我話我同阿花阿齋都有成日傾偈嘅   同埋之前去親一田都買好多嘢   我話買埋比家姐㗎   我一個邊要得咁多喎 ~

家姐話咁妳啲同事都知妳錫我囉 ?!   我話係呀   佢哋一見我買一大袋嘢   就會即時話買比家姐 ?!   好搞笑㗎 ~

番到屋企即開機洗衫   之後沖涼休息喇 ~

日本水蜜桃 + 新甘泉梨   無可否認   日本嘅生果真係有甜有多汁   就算係香蕉都好好食㗎

睇多陣 Youtube   今晚 10 點 45 分都瞓覺 lu ~