蜜汁焗雞下肶 + 洋蔥炒牛仔骨 + 超甜粟米 ( 4-SEP-2025 )

( 4-SEP-2025  THU )

感恩一覺瞓天光呀   仲要無發夢添呀   感謝主 ~

早餐食雞尾包   呢期又鍾意食番   所以里奧大人成日話我變得咁快   哈哈 ~

里奧大人朝早放假   但會喺屋企食完飯先番工   所以我叫佢可以食咗飯先   下午茶先食雞尾包就最好   我預佢 10 點幾起身   整得個飯都 11 點   無理由食完個包   隔一個鐘又食午餐嘛 ~

菇場唔忙   阿蟲同西瓜上工廠   咁老粗話喺下面等   因為唔知係大堂定停車場等嘛   阿爽衰衰咁話下面等妳呀  哈哈 ~

Lunch Time 蒸完飯又去行一田喇   好在呢排唔駛買菜   唔係就無咁多時間行一田 lu ~

3M 薄荷木糖醇牙線捧136支 ($35/盒) - 我覺得好平所以問家姐要唔要 ?!   估唔到佢話要呀   激死我   之得尋日買哂 4 盒牙線啦   不過我都買 4 盒比佢   雖然佢話要 2 盒   但咁平就買多 2 盒啦   反正都要用嘛

不倒翁真拉麵5包裝 (辣味) ($20/包) - 又係好抵   所以就買喇   呢個牌子囓麵質都 OK 㗎

OP 蒜蓉多士醬 ($20/支) - 喺 AEON 好似要 $2X   但唔知係咪同一牌子   依家見到 $20 就即買   我都鍾意食蒜蓉多士   但又唔想買牛油   次次過哂期要掉   真係好浪費囉

番到菇場即開餐   但今日可以慢慢食到 1 點呢 ~

我係啫喱狀態倒入飯兜嘅   無諗過蒸完之後咁多汁   好在無帶飯咋   唔係變湯飯一定好難食   我已經食咗第 5 餐薯仔雞肶   開始有啲驚   哈哈

唔忙就上網   難得西瓜唔喺度嘛 ~

阿爽請食蘋果   食完成個人凍哂   哈哈

放工即走   番到屋企都即刻預備晚餐   之後再煮蕃薯糖水   因為要清哂啲蕃薯 ~

心血來潮睇下煲飯   原來我按咗制但無插到插蘇   好在里奧大人未放工咋   哈哈 ~

今晚里奧大人 7 點先番到屋企   佢一入屋就話因為我比阿妹鬧呀   話今日有人請食蛋糕仔   里奧大人唔食   但同阿妹講話我太太為食   想比佢試下   之後阿妹就拎咗 4 個   仲話呢啲唔係叫為食   我哋呢啲係叫做鍾意試新嘢   哈哈 ~

我前晚先想買盒蛋糕仔比里奧大人食   但佢其實係鍾意食紙杯蛋糕   所以都係唔買   之後佢話頭先食咗紙杯蛋糕呀   初初買焗爐嘅時候   真係諗過整紙杯蛋糕比里奧大人食㗎   但原來要買個模先做到   我就唔焗 lu

是日晚餐 - 蜜汁焗雞下肶 + 洋蔥炒牛仔骨 + 超甜粟米

蜜汁焗雞下肶 - 用叉燒醬醃㗎   因為真係唔想又用燒汁   里奧大人以為喺買番嚟㗎   因為真係有啲似紅燒雞肶   哈哈 ~

洋蔥炒牛仔骨 - 尋晚食剩啲牛仔骨   今晚加埋個洋蔥一齊炒   又可以當一個餸都唔錯 ~

超甜粟米 - 星期日買㗎   所以今晚都要食啦   食剩半條仲有 1 條未食   咁用嚟整沙律喇 ~

洗埋碗抖陣就同里奧大人去做機   都係做咗 25 分鐘就夠皮 lu ~

沖埋涼就食蕃薯糖水   食埋今次就停一停喇 ~

我問阿妹啲蕃薯糖水食唔哂可唔可以留番聽晚 ?!   佢話可以㗎   糖水舖都係咁   我話之得早啲問妳啦   佢話妳唔係倒哂呀嘛 ?!   我話係食哂啫   哈哈

睇下 Youtube 又打下機   今晚 10 點 45 分都瞓了 ~