三文魚扒 ( 20-SEP-2025 )

( 20-SEP-2025  SAT )

尋晚去完廁所都好快瞓得番   今朝直頭比個鬧鐘響嚇醒咁滯   平時唔覺咁大聲㗎噃 ~

早餐食餐蛋包   我鍾意食腿蛋包多啲   但好多時都無   仲要係好多間都係咁 ~

去到菇場附近見到辣姐   咁真係要傾下偈喇   因為我無去茶記食早餐之後都好耐無見佢了 ~

菇場唔忙呀   又做自己嘢   但好少人番   所以菇場好似雪房咁凍 ~

肥仔豪同西瓜傾電話   話聽到佢後面有把女人聲   肥仔豪話無女人講嘢喎 ~

傾完之後   阿蟲話係你背後唔係背脊   肥仔豪話背脊同背後有咩分別 ?!   阿蟲解釋咗但我唔記得佢點講   哈哈 ~

放工即走   今日約咗石頭食飯呀   開心開心 ~

佢話想食越南嘢   我無咩所謂   最緊要佢想食就得㗎喇 ~

開餐

我食香茅牛肉撈檬 ($72)

石頭食越式香茅豬扒湯粉 ($67)

腐乳通菜 (+$18)

佢兩星期前發生咗件大事   之後講番哂個情況比我知   真係我意料之外呀   因為佢唔係想比咁多人知嘛   所以好感恩佢咁信任我呢 ~

食下傾下   佢就拎手機出嚟合照   呢樣真係估佢唔到   哈哈 ~

呢餐係我請佢嘅生日飯   佢係 7 月生日   不過大家都唔得閒   8 月佢又忙   所以拖到今日先食呀 ~

食完就一齊去 LA 活動   完畢就要 Debriefing   差唔多 4 點 45 分先走得   咁陪佢買埋糖水同等車   我就去里奧大人公司坐陣先 lu ~

我見到蘭子企喺里奧大人房門口   我唔行入去啦   因為頭先里奧大人頭先話一陣先搵我   咁應該有嘢要傾嘛   點知蘭子係都叫我入去   原來係比個冰皮月餅比我   真係有口福喇   哈哈 ~

隻兔仔肥嘟嘟好可愛呀

今晚番崇拜   之後就番屋企煮飯 ~

里奧大人 7 點 45 分番到屋企   因為我仲焗緊張   所以叫佢沖涼先呀 ~

我食埋咖哩撈麵   煮個辣味拉麵比里奧大人就搞掂 ~

是日晚餐 - 三文魚扒

三文魚扒 - 人生真係無咩幾何焗三文魚焗得咁靚仔   魚皮係脆卜卜㗎   下次再去樓上買三文魚先   睇下係咪次次都焗得咁靚   哈哈 ~

洗埋碗就開機洗衫   之後沖涼休息喇 ~

睇緊 Youtube 又忍唔住執櫃桶   估唔到又比我執好哂所有嘢   之後再望個鐘原來執咗個幾鐘呀   真係唔覺咁耐喎 ~

搞掂哂就打下機   今晚 11 點先瞓 ~