黑椒牛仔骨拚椒鹽豬扒飯 + 生炒骨拚糖醋骨飯 ( 3-SEP-2025 )

( 3-SEP-2025  WED )

尋晚半夜去咗次廁所   不過都預咗㗎喇   因為食咗蕃薯糖水   好在好快瞓得番呢 ~

又係鬧鐘響唔係咁想起身   但沖咗涼真係當堂精神哂   起身沖涼洗頭呢個習慣已經好多年   就算無出街無汗都要沖下先舒服咁呢 ~

早餐仍然食栗子千層包   仍然覺得好味道 ~

菇場忙咗陣   之後就可以做自己嘢喇 ~

Lunch Time 蒸完飯出去行下先   今日唔行一田呀   個人好凍要曬下太陽   行夠半個鐘就番菇場開餐 lu ~

唔忙又上網睇嘢啦   全公司啲燈突然間閃一閃   之後又着番燈   阿爽話無交電費   哈哈 ~

但走廊同女廁都無哂燈   咁啱喺女廁見到隔離公司小新   佢問我哋有無閃一閃啲燈呀 ?!   因為佢哋啲燈燒咗呀   我話原來係妳影響到我哋   佢係咁話唔係呀   哈哈   之後話依家有部份係無哂燈   佢另外個同事話佢有盞排燈可以拎出嚟開呀   我話咁仲恐怖啦   小新都話咁樣真係仲恐怖呀   7 月呀   要快啲放工呀 ~

咁我以為佢無拎鎖匙走   佢話有拎呀   廁所仲有人未走   真係人嚟嘅   哈哈 ~

放工去睇中醫   因為呢兩日手指啲關節痛   可能吹得冷氣太多呀   醫師話我小腿肌肉好崩緊   但唔係水腫   不過要繼續調理呢   因為血氣仍然唔係咁好 ~

睇完就去買兩餸飯   番到屋企仲未見里奧大人   所以即打比佢呀   好在佢啱啱走得 ~

食完飯抖半個鍾就去做機   里奧大人以為我唔做   不過我話做 25 分鐘就真係夠喇   頭先行咗好多路呢 ~

諗住食個網紋瓜   點知熟到爛咗   所以唔食得   真係嘥哂   之後里奧大人話唔好再買喇   我話咁啱尋日問咗船頭點揀   下次我都會買嚟食㗎   哈哈 ~

沖埋涼就開機洗衫   抖陣就熨 2 機衫   今次真係熨底衫褲睡裙毛巾呢啲咋   面衫叫里奧大人熨   我覺得咁樣又幾好喎   大家都無咁攰   哈哈 ~

里奧大人話熨衫唔駛用力   但我就成日用力熨   所以我熨到出汗   又要再沖過凍水涼呀 ~

睇陣 Youtube   今晚 11 點 10 分先瞓呀