明星海鮮酒家 @ 官塘 ( 21-SEP-2025 )

歡聚宴 (半席 $948)

錦繡燒味拚盤 - 我只食燒肉咋   因為好耐無食

碧綠花姿蚌片 - 呢個好味   食剩一大半   姑奶們打包

芝士焗蝦球伊麵 - 無食   又係食剩一大半   姑奶們打包

蟹肉豆腐海皇羹 - 呢個都好味   冷氣地方鍾意飲啲熱嘢   哈哈

脆炸吉列大蝦 - OK 啦

金瑤扒雙蔬 - 無食   呢碟幾乎無食過咁滯   因為樣樣嘢嘅份量都好多   所以又要姑奶們打包了

欖豉蝴蝶蒸沙巴龍躉 - 啲肉唔 "鞋" 呀   同埋估唔到咁多蔥   我最鍾意

明星貴妃雞 - 無食   呢個我要打包呀

菠蘿雞粒炒飯 - 無食   又係我要打包   因為里奧大人鍾意食炒飯

合時生果 - 哈蜜瓜好甜   甜品仲有蟠桃   但無鹹蛋黃嘅   唔知邊個問有無人要 ?!   估唔到里奧大人話要呀   哈哈

( 21-SEP-2025  SUN )

今朝起身都精神   所以同里奧大人一齊食早餐喇   我本身諗住如果瞓到就瞓到自然醒   之後先食早餐同做家務呢 ~

食完即番屋企做大清潔   執哂所有嘢   抹哂所有門   連牆都抹埋呀 ~

9 點幾就去街市買嘢   去到半路勁大雨   之後差唔多番到屋企就無咁大雨喇 ~

放低哂嘢再去百佳   咁無咩雨就去埋惠康   點知買完就落勁大雨呀   好在番屋企都近   唔係就慘喇   因為買咗好多嘢   我驚個環保袋爛   諗住捧住走   但要開遮就唔得囉 ~

番到屋企已經 11 點半   再繼續大清潔同熨 2 機衫   差唔多 1 點幾先搞掂   要即刻沖涼喇 ~

里奧大人放工買外賣番屋企   原來都已經 2 點   不過我又唔係好餓   所以叫里奧大人買 1 個午餐 Share 食就得喇 ~

川辣尖椒炒牛肉套餐 ($55)

食完就睇下 Youtube  里奧大人就瞓陣先 ~

4 點左右出去九龍灣買電話   之後再行陣德福 ~

HONOR Magic V5   用哂所有優惠就減到 $9,199

去 UNIQLO 行下   又買咗條 One Piece   我諗住拎個環保袋出嚟   里奧大人話佢比錢   我笑住話其實我係拎熨個環保袋出嚟咋   哈哈 ~

特價 $199 (原價 $249)

今晚去牛頭角食飯   但太耐無坐小巴去牛頭角   所以都係坐地鐵去酒樓算喇   落雨濕濕真係唔想周街搵車呀 ~

因為姑奶們想開個家庭會議   所以尋晚臨時約今晚食飯   咁又好呀   我唔駛煮   哈哈 ~

傾下傾下   里奧大人都發火   我真係第一次見咋   後尾我打圓場   始終有啲嘢係要講清楚嘅   唔好成日單係睇一面嘛 ~

我哋其實講多過食   里奧大人姐夫話佢老婆做咩飲咗佢隻酒杯 ?!   再話里奧大人又做咩飲咗佢老婆隻酒杯 ?!   真係笑鬼死呀   哈哈   掛住傾偈真係無留意呢 ~

8 點幾走人喇   感恩趕到巴士 ~

番到屋企即沖涼   之後可以坐定定睇"臥底旅遊團 5.0" 喇 ~

睇多陣 Youtube   今晚 10 點 50 分都瞓覺 lu ~