滷水雞翼 + 節瓜蝦乾湯 ( 23-SEP-2025 )

( 23-SEP-2025  TUE )

尋晚半夜去完廁所都好快瞓得番   感恩感恩 ~

早餐食甜餐包搽花生醬   里奧大人幫我拎個焗盤出嚟   我話未搽花生醬呀   之後佢話唔搽都得   但我話搽咗好食啲呢   我其實係想快啲清哂啲花生醬 ~

食完就去里奧大人公司坐陣先番工   所以佢啲同事成日以為我唔駛番工   哈哈 ~

菇場唔忙   又可以做自己嘢 lu ~

今日除咗阿 4   我哋帶開飯嗰幾個同事都無帶飯   因為 2 點 20 分改發 8 號風球 (樺加沙)   即係 12 點 20 分都放工   無理由食完飯先走嘛 ~

11 點 45 分準時走人   之後西瓜喺群肆組話正式宣佈 8 號先走得   但其實尋晚政府都宣佈今日 2 點 20 分改發 8 號囉   唔係諗住改為 8 號先走嘛   公司係提前兩個鐘就走得喇喎 ~

因為我都差唔多番到屋企   即問阿花喺邊 ?!   好在佢都搭緊地鐵   咁掛住同阿花 Whatsapp   一路落樓梯一路睇電話   我叉錯腳碌落樓梯呀   好在係最低嗰 4 級咋   同埋順住條樓梯位置跣落去囉   真係勁樣衰   感恩企得番身咋   仍都感恩無整到後腦呀 ~

平時我唔會落樓梯睇電話㗎   就係因為阿 4 喺公司群組個留言好黐線   我先問阿花睇唔睇到囉   之後真係好在大家都睇到   因為睇完佢就 Delete 咗   肯定留錯言啦 ~

番到屋企即睇下條頸有無擦損   感恩無損到   條腰都無痛   但手臂就瘀咗   不幸中之大幸呀 ~

差唔多 12 點半都蒸飯   諗住里奧大人 1 點番到嚟   不過佢仲未走得   咁我都食先 lu ~

奧大人 1 點半先番到屋企   我即同佢講話頭先碌落樓梯呀   佢即刻問有無撞親個腦 ?!   之後就話我成日叫佢行路唔睇電話   依家就我睇手機跌親 ~

食完就睇下 Youtube   之後都瞓咗半個鐘呀 ~

有半日風假   咁可以早啲時間預備晚餐 ~

是日晚餐 - 滷水雞翼 + 節瓜蝦乾湯

滷水雞翼 - 想食滷水雞翼好耐   所以特登買支滷水汁   今次煮咗 12 隻雞翼   但好似好單調   所以加咗雞蛋同雞肉腸   但我食咗少少咋   最後幾乎剩番哂呀   哈哈 ~

節瓜蝦乾湯 - 本來想就咁蒸節瓜   但想清哂啲蝦乾   咁就改為滾湯喇 ~

洗埋碗就沖涼   今晚無得做機   可以休息下呢 ~

呢個包同蓮蓉都好乾   不過我無同里奧大人講㗎   點知佢話好難食   好少壽包係咁難食   哈哈

睇下 Youtube   今晚 11 點之後會改發更高風球   睇嚟聽朝都唔駛番工   不過我 10 點半都瞓覺呢 ~