薑蔥生蠔 + 泡菜豆腐豚肉湯 ( 24-SEP-2025 )

( 24-SEP-2025  WED )

今朝 6 點 50 分醒咗去廁所   順便開電視睇新聞   原來 2 點 40 分已經係 10 號颶風信號   咁肯定今朝唔駛番工   所以熄鬧鐘繼續瞓喇 ~

雖然無出街   但都感受到好大風力   因為關實哂窗   但都吹到隻房門伏伏聲呀 ~

瞓到 9 點 35 分都起身   之後整早餐 lu ~

早餐食朱古力吐司   我同里奧大人講話好味呀   佢話記得   同埋佢都話好味   咁就好喇   下次再買   哈哈 ~

抖陣就沖涼洗頭   會覺得精神啲咁   因為喺屋企實在太舒服   好多時睇睇下電視會瞓着㗎 ~

咁問家姐嗰邊大唔大風 ?!   佢話張床震哂咁   所以瞓得唔好   反而 Berry 今次唔驚喎   平時落雨會驚到流口水㗎   我話佢依家大個女了   哈哈 ~

無得做機就熨衫當做運動啦   但我會開大冷氣熨衫囉   因為開咗蒸氣熨會比較熱   所以有時熨衫都會冒汗㗎   咁嘅情況就會叫里奧大人熨喇   我唔想再沖多次涼呢 ~

搞掂又睇 Youtube   差唔多 1 點就食午餐   因為我唔想太晏食   變咗晚餐又要遲食   寧願早啲食囉 ~

食剩啲腸同 7 隻雞翼   所以留番聽日帶飯喇

1 點 20 分改發 8 號風球   今次個風都算打得耐   同埋望出去真係好大風呢 ~

睇下 Youtube 又瞓咗一陣   依家睇直播真係好快就過一個鐘咁㗎   聽下笑下都唔錯   始終講廣東話   唔駛坐定定睇住嘛   哈哈 ~

我問里奧大人餓唔餓 ?!   佢話隨時食得   咁我 5 點 15 分都預備晚餐 lu ~

是日晚餐 - 薑蔥生蠔 + 泡菜豆腐豚肉湯

薑蔥生蠔 - 之前喺樓上買咗 1 包特選急凍日本蠔肉   因為實在太想食蠔   又難得今日放風假   所以就整啦   雖然賣相唔好   但味道好好呀   真係估唔到呢   哈哈 ~

泡菜豆腐豚肉湯 - 里奧大人好鍾意食呀   其實呢個餸真係簡單方便又好味   不過就唔想成日食咁多泡菜囉 ~

問里奧大人食唔食蕃薯糖水 ?!   佢話食呀   咁我就煮啦   我話今日煮足 4 餐   所以家庭煮婦真係唔易做   哈哈 ~

洗埋碗就即沖埋涼喇   抖下先食糖水 ~

8 點 20 分改發 3 號風球   希望聽朝番工唔好大風大雨啦 ~

睇下 Youtube 又打下機   好快又已經 10 點 45 分   係時候瞓覺喇 ~