洋蔥炒和牛粒 + 脆肉瓜粒 ( 2-SEP-2025 )

( 2-SEP-2025  TUE )

雖然半夜去咗次廁所   感恩都算瞓得唔錯   但今朝鬧鐘響就唔係咁想起身   好似好攰咁   之後諗緊出唔出去食早餐好呢 ?!   最後都係起身焗麵包 ~

沖埋涼洗埋頭真係精神哂   咁就好喇   頭先真係驚會好攰咁㗎 ~

早餐食栗子千層包   好味呀 ~

食完就早啲番工   但我話想坐多陣先   里奧大人問坐幾耐 ?!   我答佢兩分鐘   之後佢話兩分鐘咁大把 ?!   笑死我呀   其實我係想講兩個字呀   哈哈 ~

里奧大人問件衫係咪我熨 ?!   因為好縐   我話我真係熨得唔好㗎   好求其 "辣" 下咋   下次我負責熨底衫褲睡衣毛巾同襪   出街着嘅衫就留比佢熨就算喇   哈哈 ~

菇場忙下停下   好快又到 11 點 45 分了 ~

Lunch Time 蒸完飯就出去一田買嘢   呢期嘅指定動作 ~

J Farm 泰國急凍雞下肶 ($119.9/2 包)

3M 細滑牙線捧盒裝150支 ($35/盒) - 阿花星期六先比我試用   所以好感恩今日買到   因為本身要叫佢幫我買㗎

擺完啲嘢落冰格就拎飯盒啦   但拎出嚟只係微暖   可能頭先個制無插得好呀   但再蒸就無咁多時間   所以都係叮 3 分鐘就算喇 ~

阿齋買咗好多點心未拎   所以我睇下有無位先買   之後再擺番好啲位置   不過都再擺唔落嘢   其他同事唔可以買急凍食品住 lu   呵呵

唔忙就做自己嘢   啲時間先易過嘛 ~

船頭喺一田買咗個日本網紋瓜   但一個人食唔哂   所以拎番嚟比我哋一齊食   真係好甜好多汁

唔係雪到出水   係本身咁多汁

放工即走   番到屋企都即刻預備晚餐 lu   里奧大人 6 點幾番到屋企   之後係咁食零食   但如果佢放假喺屋企等我煮飯   又唔會食㗎喎   好搞笑 ~

船頭話呢啲櫻桃李嘅味道係酸酸甜甜   所以比我同阿花試下

阿妹送比我嘅日本手信   話一見到就覺得好襯我呀

是日晚餐 - 洋蔥炒和牛粒 + 脆肉瓜粒

洋蔥炒和牛粒 - 我覺得日本洋蔥係好多水份同埋甜啲咁   今次落鑊煎啲牛肉粒   之後再加啲黑椒炒一陣就搞掂   我都係煮咗半包牛肉粒咋   因為仲要食埋啲薯仔雞肶呢 ~

脆肉瓜粒 - 加埋薑蔥蓉係好食啲嘅   所以先分開煮   本身諗住用嚟炒牛肉粒㗎 ~

洗埋碗就煮蕃薯糖水   之後做小清潔就沖涼 lu ~

今晚唔做機喇   唔想咁趕咁   所以叫里奧大人自己去做喇 ~

等里奧大人沖埋涼就食蕃薯糖水   煮呢個糖水真係非常簡單   最緊要係里奧大人鍾意食   咁我就最開心喇   哈哈   始終佢番工都攰   佢話食番啲糖水係開心啲呢 ~

呢隻蕃薯嘅口感好粉糯同埋無渣   唔錯唔錯

依家里奧大人見我玩上海麻雀   佢又會玩幾舖   初初話好易之嘛   兩隻疊埋就得   我話唔係咁簡單囉   依家佢玩過就知喇   哈哈 ~

睇多陣 Youtube   差唔多 10 點 40 分瞓覺   但之後同里奧大人傾到傾到 11 點先瞓 ~