脆肉瓜炒和牛粒 ( 16-SEP-2025 )

( 16-SEP-2025  TUE )

尋晚 12 點幾都起身去廁所   不過都預咗   因為食咗糖水嘛 ~

今朝 6 點 16 分醒咗   之後好難先瞓得番呀   所以起身有啲攰 ~

早餐食煙肉芝士迷你酥   我完全唔記得買過呀   尋晚仲特登去買麵包添 ~

8 點鬆啲就去里奧大人公司坐下   今朝唔想咁早番工呀 ~

菇場忙呀   忙到 Lunch Time ~

蒸完飯就出去行陣   之後買洋蔥同紅蘿蔔   最後買埋粟米同林柿就番菇場喇 ~

忙到 2 點就搞掂   一連衝鋒咁忙   一停落嚟會特別攰咁㗎 ~

放工即走   搭車嗰陣有對老夫婦對話   個男人話工業鞋都唔好嘅   個女人即話人哋講你又信   個男人話咩都試下囉   個女人再話人哋講你又信   仲要係搭車嘅時候聽人講   又唔係識嗰個人   咁你都信   都唔知你買嚟做咩 ?!   個男人再話個地下一年洗一次嘛   女人就話一年先洗一次駛咩買對鞋呀   人哋廚房啲嘢咁乾淨係用完即抹   唔係好似你哋廚房咁多沙沙石石咁污糟   着咩鞋都無用啦 ~

佢咁樣講   我就諗起上次睇 Youtube   有個日本人開嘅賣便當小店   佢個廚房真係好乾淨㗎   爐頭附近係無油漬   同埋佢會將櫃入面啲嘢拎出嚟抹   再抹埋個櫃入面咁呢 ~

其實好多食店寫明係廚房重地   唔係怕啲咩外洩   係怕比人見到個廚房咁污糟咋   哈哈 ~

里奧大人 6 點半番到屋企   佢話本來好早走   但又係比 Melody 捉住   好似真係等佢走先搵佢咁呀 ~

是日晚餐 - 脆肉瓜炒和牛粒

脆肉瓜炒和牛粒 - 上次食剩半包和牛粒   今晚清埋去啦   因為份量唔係好多   所以加幾條雞肉腸喇 ~

洗埋碗就煮咖哩   咁問下里奧大人食唔食蕃薯糖水 ?!   佢話食呀   咁就煮埋啦 ~

搞掂就開機洗衫   之後沖涼休息喇   等埋里奧大人沖完涼就食蕃薯糖水   早啲食好啲呀   雖然都預咗半夜會去廁所   哈哈 ~

里奧大人話蕃薯口感好綿   其實榴槤蕃薯都好食   不過近排食有好多渣就唔買嚟食 lu

家姐有時去超市   見到啲新嘢就會同我講   咁我有時未必即時睇到嘛   今晚 10 點睇到佢啲 Whatsapp   之後又傾咗陣   佢話仲未瞓 ?!   我話 10 點咁早瞓   一係超級攰一係唔舒服囉   哈哈 ~

睇下 Youtube   今晚又係 10 點 45 分瞓覺 ~