豆豉鯪魚炒油麥菜 + 香煎司華力腸 ( 9-feb-2012 )

( 9-feb-2012 thu )

好凍丫   我以前唔怕凍架   可能因為甲狀腺影響   但依家好感恩好番哂   終於有凍嘅感覺   所以我屋企人同里奧大人成日都會話   如果我覺得凍就真係好凍架喇 ~  

好餓呀   又食麵餐   仲諗住食五香肉丁麵   原本無咗喇   咁又係   依家五香肉丁罐頭咁貴   唔入貨都正常嘅   我都唔買啦   我真係覺得唔抵囉   罐頭黎架咋 ~

番到菇場忙到頂點   做到 lunch time 呀   今日食 special k + 鮮奶   真係好鬼怕飲鮮奶   但又唔想飲朱古力奶喎 ~

諗住買齋滷味做餸   點知原來自家素食執咗喎   打亂哂我嘅陣腳 ~  

里奧大人上咗大陸又無咁早番   所以我就去超市慢慢買嘢喇   因為要買獨立包裝蛋糕比里奧大人   佢每次上大陸   我都會放蛋糕入佢 Backpack   咁如果好夜放工   都叫做有 d 嘢落肚   佢又煩喎   又話餅乾熱氣   又話唔好買有朱古力面嘅蛋糕   唔係食到好烏糟   我次次都係買同一牌字嘅朱古力蛋糕比佢架咋   真係佢食唔厭我都買到悶呀   今次買咗朱古力味同藍莓味   因為無理由買兩個唔同牌字嘅朱古力味嘛 ~ 

番到屋企都唔駛預備餸菜   所以就拖地    之後開機洗衫   咁打比里奧大人問佢走未   佢又話未走得   所以我都煮飯自己食先 lu ~

是日懶餐 -豆豉鯪魚炒油麥菜 + 香煎司華力腸

豆豉鯪魚炒油麥菜 - 之前食剩嘅油麥菜   又唔想蒜蓉炒   所以就諗起用豆豉鯪魚炒喇 ~

香煎司華力腸 - 好在突然間諗起冰格仲有 d 咩嘢未清咋   唔係佢又唔知幾時先出場 lu ~

食完飯好鬼飽   所以又熨衫當做運動喇   里奧大人差唔多 9 點幾先番到屋企   見我煲緊嘢好開心   以為食麵   我話豆豉鯪魚點送湯麵呀   同埋我話妳知唔知煮飯又煮麵係好煩架   我都有番工架   我都好攰架   之後佢笑笑口無再出聲 ~