八星報喜團年飯 ( 5-FEB-2013 )

皮蛋酸薑

美極煎海蝦

咖哩魚蛋魷魚

生菜螺片


叉燒 / 豬腳仔

Bihun Goreng 炒飯

雪耳紅蘿蔔雞湯

糖不甩

( 5-FEB-2013  TUE )

春天一到   潮潮濕濕咁   又要長開抽濕機喇   但唔記得擺 d 花入廁所   所以 " 我抽到花兒也謝了 " ~

早餐又係奶油脆脆豬 + 拉茶   呢間餐廳最吸引係坐得好舒服   真係可以靜靜地睇報紙呢 ~



忙到 10 點就 hea 過喇   執下嘢   其實無咩好執   因為我張枱好整齊   有 d 同事張枱好似打仗咁   d 紙係黃架   即係好舊   同埋其實搵嘢都唔方便啦   做咩唔執到整整齊齊喎   亂七八糟真係好難頂 ~

無啦啦好餓   所以出去食牛丸米   食完行到 1 點 20 分就番菇場喇   出面好鬼熱呀 ~   

媽咪煲咗雪耳湯   家姐又買咗生果比媽咪   所以叫工人黎交收   咁就最好啦   我晏晝同佢講   今晚會整團年飯   之後家姐就話黎我屋企食飯喇   所以我放工即走   要趕去街市買餸   因為我今晚要整 6 樣嘢呀 ~

番到屋企即入廚房打仗   家姐 7 點到   叫佢食薯片打機等開飯啦   里奧大人打黎   我叫家姐聽添呀   佢同里奧大人講我煮 6 樣嘢   里奧大人以為講笑   之後佢 8 點半先番到屋企   見我仲煮緊   就知我堅料啦   嘩哈   不過我要佢地再煮多 15 分鐘先食得呀   我第一次由 6 點 15 分煮到 8 點 45 分呢 ~

是日晚餐 - 八星報喜團年飯

皮蛋酸薑 - 家姐鍾意食   所以就整喇 ~

美極煎海蝦 - 第一次買海蝦   $64 / 斤   我唔識睇靚唔靚   佢比咩就咩囉   好感恩只係得 3 隻霉咋   今次 d 蝦都幾大隻   我要分 2 次煎   好在用美極煎咋   唔駛教汁嘛   里奧大人同家姐話最好食係呢樣餸   我好開心呀 ~  

咖哩魚蛋魷魚 - 又係家姐鍾意食   所以買咗半斤魚蛋 ( $10 ) + 魷魚 ( $14 )   估唔到魷魚咁鬼貴   今次用蒜頭同乾蔥頭起鑊   再用咗 3 湯匙利川沙爹醬 + 2 隻指天椒   家姐話我煮得好味過佢工人添呀 ~ 

生菜螺片 - $10 有 2 個生菜   再加罐 " 金御膳 " 鮑汁螺片   螺片完全唔掂   下次都係買番 " 海明珠 " 好 d ~

叉燒 / 豬腳仔 - 媽咪買架   因為知家姐鍾意食叉燒 ~

Bihun Goreng 炒飯 - 家姐話個炒飯好香   以為我用咩嘢炒   其實我用馬來西亞買嘅醬汁咋   不過唔好問我係咩醬   我話唔識 ~


雪耳紅蘿蔔雞湯 - 媽咪煲架   比我地大家一齊飲   如果媽咪無煲湯   我仲諗住滾芫茜皮蛋魚片湯架   依家慳唔小時間呀 ~

糖不甩 - 跟食譜整   人地搓 20 粒   我搓咗 25 粒   5 粒唔係差好遠   但當大家超級飽嘅時候   每人食多1  粒真係好難頂   我唔太鍾意食椰絲   所以就咁用花生 + 白芝麻 + 糖   用片糖 + 薑煲滾   嘩   口感好煙韌呀   雖然唔難整   但我都好有滿足感架   不過最搞笑係   食剩 10 粒嘅時候   個個靜哂   因為真係幾滯下   要深呼吸先可以再食囉 ~

今晚 8 點 45 分開飯   食到 10 點幾呀   無計啦   食完飯   我洗埋碗先煮糖不甩嘛   家姐食完抖陣   捧住個大肚腩走 lu ~

我就再執下嘢   掃下地   之後就沖涼   再做埋按摩   11 點 15 分就瞓喇 ~點 15 分就瞓喇 ~