煎鮫魚 + 甜豆炒臘潤腸 + 叉燒蔥粒炒飯 ( 10-APR-2013 )

( 10-APR-2013  WED )

今朝里奧大人要見客   所以早 d 番公司   我就瞓到 7 點 45 分先起身呢 ~

仲係陰陰天   同埋有 d 凍   好想見到陽光呀 ~

早餐食雪菜肉絲炒蛋米粉   點知黎錯咗炸菜肉絲   仲要之後等 15 分鐘添   之後見其他客人都話 d 食物好耐   鬼咩   入錯哂單   唔漏單已經好好彩架喇 ~

菇場淡季   超級靜   好想聽歌呀   不過真係有同事一路帶住 ear phone 聽歌一路做嘢架 ~ 

終於 lunch time 喇   其實諗住今朝食米粉   lunch 就食麥皮   但次次真係早餐食米粉反而更快餓   所以我出去行陣再買炒米粉番菇場食呢   食完好滯   有 d 反胃添呀   慘 ~

媽咪煲咗豬腳薑   又買咗榴槤  香梨  蔥  鮫魚  雞扒同雞翼比我   所以叫同工人拎比我   唔係聽晚我拎唔到   因為好重呀   之後去太興買埋 $20 叉燒就番屋企 lu ~  

番到屋企就預備晚餐先   洗洗切切要唔小時間嘛   之後就熨衫   又唔知里奧大人見完客未   所以我都煮飯自己食先喇 ~

真係好彩食咗先咋   里奧大人成 9 點先放工呀   咁我都沖埋涼先喇   唔想佢食飯時我就沖涼   變咗無時間傾計呢 ~ 

是日晚餐 - 煎鮫魚 + 甜豆炒臘潤腸 + 叉燒蔥粒炒飯

煎鮫魚 - 媽咪比架   今次好有心機煎   煎到脆卜卜架   最開心係無痴底   之後加埋蒸魚豉油   好味道呀 ~

甜豆炒臘潤腸 - 依家菜貴呀   所以食住豆先   $8/半斤   不過我都好耐無食甜豆   都唔知幾錢斤   不過心理上覺得單位數就叫平架喇 ~ 

叉燒蔥粒炒飯 - 炒飯對我黎講係一件好難嘅事   次次痴底   仲要係明明 3 碗飯  炒埋得 2 碗飯  因為痴哂底   同埋唔夠乾身咁   但今次雖然都有痴底   但覺得好好食呀   都幾乾身   加埋叉燒又甜甜地   又有蔥花爽爽地   正呀   希望下次都可以炒到咁啦 ~