住家飯 @ 媽咪屋企 ( 11-APR-2013 )

煎鹹魚 - 點沙糖喼汁真係超級好味   全晚最好食係呢個餸 ^^

蒸撻沙

薑蔥生蠔 - 媽咪第一次整蠔   我覺得好食   可能係想食好耐   但之後媽咪真係整到每況越下   所以我話唔好再整蠔 @.@

荷蘭豆芹菜炒鮑片鮮魷 - 話咗幾百次唔好成日整鮮魷   膽固醇高   對老人家唔好嘛   所以我都無食鮮魷  

鮑汁炒生菜

榴槤 - 媽咪比人呃啦   果個人又話識揀   點知毫無味道可言 @.@ 

( 11-APR-2013  THU )

仲係回南天 + 毛毛雨   個人攰唔在講   最慘係成日要袋住把遮骨遮   整到個袋重上加重 ~

今朝去完大家樂食早餐   抖陣就幫菇場掃貨   差唔多 10 點就番到菇場   所以覺得 d 時間過得幾快咁噃 ~

晏晝食 lunch box   衰里奧大人食唔哂 d 炒飯就比埋我   明明人地唔想食咁多飯家嘛   點知又要食埋佢食剩果 d   滯到我呢 ~

忙咗陣又 hea 喇   放工去媽咪屋企食飯   例牌飲咗碗巨湯先   之後家姐 7 點番到黎就開飯喇 ~

今餐膽固醇完全爆哂燈   蠔 + 豬肚 + 鮮魷   媽咪又買埋榴槤添   但其實血壓高一定唔可以食榴槤   上次姑姐話佢鄰居血壓高食榴槤   即刻唔舒服咩定   所以我姑姐鍾意食都唔敢食呀   仲話錫 d 仔女   最緊要自己身體好   唔好要 d 仔女擔心   如果媽咪好似姑姐咁識體諒仔女就好啦   之後千叮萬囑叫我唔好比媽咪食   我話咁大個人點會控制到丫   我一星期番媽咪屋企一次   佢平時食我都唔知啦   不過我見到實會鬧佢架   我仲衰到話攞黎賤添呀   因為真係好鬼激氣   家姐都話我講得好 hurt 人呀   不過咁   我都知自己把口好衰   所以會同媽咪講對唔住嘅   因為覺得自己真係好衰女呢   但其實最好都係唔好咁鬧佢啦   哈   因為我鬧完佢   自己又火   佢又係唔聽嘅   死哂我 d 細胞   但我又唔可以心平氣和話架喎   因為話咗 n 咁多次都係咁   唔發火先奇   所以我最後果句仍都會話   個身體係妳嘅   唔舒服係妳自己受   最緊要最緊要唔舒服時   唔好怨呢樣怨果樣就得架喇 ~

同家姐 8 點 15 分就走喇   里奧大人就差唔多 8 點半先喺大陸放工   番到黎都 10 點幾   咁沖完涼   再開機洗衫等佢啦 ~