黑椒吞拿魚扁意粉 + 四川擔擔麵 + 豬腳薑 ( 18-APR-2013 )

( 18-APR-2013  THU )

今日里奧大人唔駛上大陸   所以又一齊出門口   因為我依家都轉番 7 點半起身喇   雖然瞓小 15 分鐘   但就可以陪里奧大人買麵包   行下傾下到地鐵站囉   無計啦   佢平時咁夜放工   唯有喺朝早爭取時間見面啦 ~

早餐食五香肉丁炒蛋公仔麵   今次要個麵唔好煮咁淋   好味好多囉   太淋真係好難頂架 ~

菇場忙呀   充實到呢   眨眨眼就 lunch time 喇   有 lunch box 唔駛煩   因為出面落雨   買完嘢食之後成腳濕哂真係好唔舒服呢 ~

忙呀忙   忙到 4 點就搞掂哂喇   終於可以抖抖呢   對眼好攰呀 ~

放工去超市買豬肉同醬料   行下買下都半個鐘   要快 d 番屋企喇   大把嘢要做嘛 ~

醃完肉就開機洗衫   嘆埋杯中藥就抖陣   正想抖嘅時候先醒起要熨衫   熨完就即刻煮飯喇 ~

呢排晚晚睇 "Just For Laughs "   見到 d 人比人嚇   笑到我呢   點知報應喇   我右手拎碗中藥   左手開煮食爐   點知一開就聽到一下巨響   嚇到我倒瀉咗小小中藥喺地呀   好在無成碗趺落地咋   定神之後再望一望發生咩事   原來係針板拍咗落熱水壺度   但平時拍落去都無咁大聲家嘛 ~  

今晚自己食先   之後沖埋涼就坐定定等里奧大人   佢 9 點半先番到屋企呀   如果等埋佢先食   我覺得自己係食宵夜呢 ~

是日懶餐 - 黑椒吞拿魚扁意粉 + 四川擔擔麵 + 豬腳薑

黑椒吞拿魚扁意粉 - 其實係聽日嘅 lunch box   反正里奧大人又唔鍾意食吞拿魚   所以就清埋佢啦 ~

四川擔擔麵 - 用四川擔擔麵醬炒肉碎   再加埋壽桃牌嘅四川擔擔麵   好味又方便 ~

豬腳薑 - 媽咪知我鍾意食   所以特登煲架   比咗 2 樽我   都比咗個幾星期 lu   希望 2 個月內食哂啦 ~