( 9-APR-2013 TUE )
仲係幾凍咁噃 仲有小小雨添 所以個天又係灰灰暗暗 勁唔想起身呢 ~
早餐食菠蘿油 好耐無食喇 但其實麻麻地鍾意食菠蘿油 不過唔想食三文治同麵餐 所以就食佢喇 ~
我習慣係將牛油搽勻個包黎食嘅 一見到咁多牛油都覺得好多咁 心諗又幾闊佬喎 點知 ~~
原來得咁細塊咋 又薄喎 不過我都無咩所謂 因為太多牛油會好漏咁呢 ~~
唉 潮濕天氣真係令人好易攰 加上菇場又靜 又無嘢做 真係坐喺度都瞓得着 但我一定唔敢瞓 因為我依家鼻寒聲好勁呀 醒果下一 chok 肯定會發出鼻寒聲 因為我上次去韶關喺車度就係發生呢單核突嘢呀 領隊話團友瞓得好香甜 咁比大家一齊抖下先呀 講到幾好聽呀 香甜 ~
終於等到 lunch time 今次勁啦 叮孜然雞翼 叮完出黎果下真係 "香" 到震呀 下次都係咪搞 比人殺呀 ~
菇場真係超級勁凍 我 d 手指係凍到硬哂 所以我依家搵緊 d 手襪 咁我唔駛咁辛苦呀 ~
又等等等 等到放工 去街市買菜 諗住買菠菜 要 $20/斤 呀 我之前買都係 $8/斤 貴到痴哂線呀 所以買甜豆同粟米就算喇 ~
番到屋企開機洗衫再拖地 開冷氣等個地快 d 乾 乾咗即熄冷氣喇 好鬼凍 ~
里奧大人差唔多 9 點先番到屋企 不過我等埋佢一齊食啦 分開 2 次淥餃子仲煩 ~
是日懶餐 - 韭菜豬水餃子 + 超甜粟米
韭菜豬水餃子 - 上次食唔哂呀 所以放冰格 呢檔餃子皮真係好正 煙煙韌韌咁 加上我又鍾意點醋同蒜頭 下次一定再整黎食 ~
超甜粟米 - 想食好耐架喇 食咗 2 條半 滿足到呢 ~
今晚 11 點唔夠就瞓喇 如果 8 點食完飯 11 點瞓就最 perfect 但 9 點先食完飯 11 點就瞓 就好似未消化完就瞓咁 好在我都眼瞓可以瞓到 我好記得以前同事講 人地話早睡早起身體好 佢就話早睡早起早 d 死 幾咁衰呀 ~
沒有留言:
發佈留言