豉油王雞膇 + 煎鮫魚 + 西蘭花 ( 14-APR-2013 )

( 14-APR-2013  SUN )

今朝同里奧大人一齊 9 點半起身   又係去金姆指食早餐喇 ~

去埋超市買菜就番屋企抖陣   沖埋涼就番教會喇   諗住聽完道就去鴻星搵位   之後先叫媽咪同家姐落黎   點知媽咪 12 點半打黎話有位   早餐未落格又要食第 2 餐   勁呀 ~

娥姐潮州粉果 - 好味道   其實鴻星有 d 點心都幾好味   不過唔鍾意佢地服務態度差   所以好小黎飲   

煎瑤柱韭菜薄餅 - ok 啦

金粟煎魚餅 - 好味呀   因為個皮脆卜卜 

鮮蝦炸雲吞 - 好味呀   必食   其實好感動架   因為媽咪第一樣就搵炸雲吞   知我上次好想食呢 

煎韭菜角 - 唔掂呀

迷你南瓜排骨煲仔飯 - 媽咪 & 里奧大人要食飯 @.@

燒鴨瀨粉 - $20 碗咋   所以里奧大人叫一碗   大家 share 食

蛋撻仔 - 推車仔阿姐問我要唔要   我話唔要   點知里奧大人又話要 @.@  


懷舊馬拉糕 - 次次飲茶都叫   里奧大人真係好鍾意食   但呢 d 飽肚嘢就唔係咁啱我喇


我鍾意食 d 魚仔   但唔鍾意食花生   咁推車仔有得賣   咁我問有無 d 係無花生   佢話一定有花生架   話 d 客鍾意食花生呀   呃我咩   鍾意食花生就買一包花生啦   唔駛買埋 d 魚仔啦

珍珠奶茶 & 百香果寒天 @ 貢茶

只從上次里奧大人喺家姐手中拎咗 2 塊蝴蝶酥比我之後   家姐一有蝴蝶酥就比我   不過家姐今次實比我啦   因為姐夫個妹買咗 4 盒比家姐呀 @.@

飲完都 3 點 lu   送埋媽咪同家姐就番屋企   里奧大人做公司嘢   我就煲中藥   煮埋雞翼   浸下菜   再出廳抖陣   6 點幾煮飯   7 點前有得食呢 ~

是日晚餐 - 豉油王雞膇 + 煎鮫魚 + 西蘭花

豉油王雞膇 - 今次又係跟高師傅食譜   不過佢整雞翼   我就整雞膇   但我落多咗豉油   所以鹹咗 d   唔係就 perfert 喇 ~

煎鮫魚 - 之前媽咪比架   今晚煎埋去食   等里奧大人即場食   可以脆卜卜呢   但可惜今次無咁脆 ~

西蘭花 - 懶呀   就咁淥熟算喇   好在真係淥咋   因為 d 雞翼鹹   要食 d 清淡嘢中和番呢 ~

搞掂哂   沖埋涼就睇電視食榴槤   飽到震呀 ~