燻蹄 ( 外賣 ) + 蒜蓉蒸茄子 + 油麥菜 ( 15-APR-2014 )

( 15-APR-2014  TUE )

今朝好好天氣喎   有陽光同埋有風   真係番工都番得開心咁呢 ~

又未餓   不過仍然叫芝腿治烘底   留番一半晏 d 先食 ~

菇場忙下停下   咁樣就最好   唔駛一次過係咁做做做 ~

Lunch 同 PMS 出去食   好多同事都估唔到我同佢會 frd   因為工作上無接觸家嘛   但其實我地上年喺南丫島撞到   之後開始熟啦   不過無人知呢單嘢   我又唔會講   所以 d 人覺得我同佢咁 frd 真係好出奇囉 ~

諗住 hea 過架喇   但 4 點無啦啦勁忙   真係 5 點半先做完呀 ~

今日去鑽石山拎嘢   拎完就搭巴士   都懶得行去地鐵站   去埋百佳買菜   再去太興買燻蹄就番屋企喇 ~

浸完菜就開機洗衫再拖地   勁攰呀 ~

里奧大人 7 點幾放工   咁等埋佢一齊食啦 ~    

是日懶餐 - 燻蹄 ( 外賣 ) + 蒜蓉蒸茄子 + 油麥菜  

燻蹄 ( 外賣 ) - 由細到大都好鍾意食燻蹄   點埋蒜蓉醋   真係好好食呢 ~     

蒜蓉蒸茄子 - 勁呀   隻茄子仲未爛 ~  

油麥菜 - $8 都抵喎   都有 4 棵仔   最緊要係就咁浸就得   唔駛拻芯 ~

之前上網申請特區護照   諗住下個月 off 去拎啦   里奧大人問我有無預約   我話無喎   佢話提咗我喎   但我記得佢只係同我講有無得授權佢拎咋噃   因為咁緊要嘅嘢   我實會落 reminder 家嘛   之後即上網預約   full 哂啦   要特登再請假去拎囉   我話佢衰呀   佢要我提佢做嘅嘢   我會提到佢做完為止   而佢就咁講一次   又唔再問我搞掂未   我話以後提佢做嘢   我都只係講一次   唔好再靠我   仍都唔好賴我無提 ~

搞掂哂就沖涼休息喇   今晚比佢激到我無 mood 睇心計呀   所以 11 點就瞓喇 ~