海景粥店茶餐廳 @ 九龍灣 ( 11-MAY-2014 )

楊州炒飯

菜遠牛河

好立克 / 柯華田 - 無厘味道   不過我都預咗   嘻嘻

( 11-MAY-2014  SUN )

今朝 9 點 45 分起身   meme 摩摩差唔多 10 點半先出去食早餐   食完番上屋企沖埋涼諗住番教會   但真係太趕喇   所以又無番教會 lu ~

喺屋企執下嘢    里奧大人就執自己 d 裇衫   之後無啦啦話真係唔可以再買裇衫喎   佢咪一樣見平就買   成日話我買買買 ~

佢仲有差唔多 10 件裇衫未拎出黎添呀 @@

之後就睇飲食男女   其實都學到唔小嘢   不過只係果下記得囉   嘩哈 ~

睇到好餓呀   要去食嘢 lu   勁想食雲吞炸魚皮河   所以又去叙苑   之前有個侍應好衰格   話過唔再去   點知依家成日去食   無 style ~

食飽就去百佳幫媽咪買脫脂奶   之後我又買咗士多啤梨   買完就番屋企喇   個天黑哂咁呀   但又無落雨   之後一落就勁大架喇   一陣實會貴人出門招風雨呢 ~

抖陣再飲湯   家姐工人煲嘅青紅蘿蔔湯真係好清甜   但媽咪煲果 d 就太多料   所以好多時飲完湯係比較飽飽滯滯咁囉 ~      

同里奧大人 5 點 40 分出門口   真係落超勁大雨喇   不過點都要去東海堂買 2 件 cake   之後就打的去探媽咪 ~

去到已經見到家姐   媽咪又啱啱食完飯   所以就即刻食 cake 喇   唔想留咁耐   醫院多菌嘛 ~

喺東海堂買嘅藍梅 tart 同鮮果 tart 都唔錯   唔太甜

媽咪隔離果位阿婆真係好煩   之前叫工人幫佢擺好對拖鞋   又幫佢擺好把遮   咁算啦   見佢無人探佢好慘咁   點知今晚見到原來有人探佢   應該係佢個女   仲帶埋工人添   之後佢地走咗   又係咁叫家姐做嘢   幫佢掉麵包皮   佢用紙巾包住咗嘅   之後叫家姐倒水   倒完又要斟滾水   仲要係斟兩啖水嘅份量   唔係斟一杯   即係佢飲完之後又要人斟   大佬   叫人斟就斟一杯啦   同埋我地唔係服侍妳架   要人服侍就叫個工人留低   無理由叫我地做囉 ~

之後里奧大人同我講   佢個女都話佢煩   話佢係都要飲熱水   凍咗又要倒   又要斟到啱啱好份量   咁無人喺度斟比妳   妳都飲凍架啦   佢個女又講得啱喎   同埋佢個杯係保暖杯   妳唔飲嘅時候唔好打開蓋   咁 d 水就唔凍架啦   同埋真係要記得呢度係醫院   唔會有人貼身服侍妳囉 ~

7 點 45 分走喇   家姐約咗姐夫同朋友喺 APM 食飯   咁我就同里奧大人搭 13X   因為家姐話 8 點左右會有車呢   真係好感恩   家姐同我都同一時間有車呀 ~

里奧大人想去海景食嘢   佢講咗好多次話要食架喇   所以就今晚食啦   今晚母親節應該有位   哈哈 ~

又落勁大雨   所以即番屋企喇 ~

沖完涼就一齊睇電視   尋日買咗元朗合興 d 糕點  $30/7 件   不過都唔好食嘅   因為無厘味道呢 ~

頻旗樸樸好攰呀   所以 11 點半瞓喇 ~