ME.N.U @ 九龍灣 ( 5-MAY-2014 )

我真係無胃口食呀   夾咗 2 次咋   每次仲係半碗   之後同里奧大人講佢好勁   差唔多食哂   佢話因為佢真係好餓呀   哈哈

( 5-MAY-2014  MON )

超勁眼瞓呀   呢排頻頻樸樸超勁攰呀 ~

食飽早餐再飲埋咖啡都勁想瞓   不過唔知係咪因為餐廳焗得滯呢   哈 ~   

菇場做完 report   諗住抖下   點知勁多嘢做   嗚嗚 ~

今日晏晝 off 呀   因為要去拎護照   但我就食埋 lunch竹 先番屋企   因為之前留咗電話見醫生   所以唔餓都要食   咁我就可以隨時 ready 走嘛 ~

食完就番屋企   勁攰呀   所以 2 點 15 分瞓到 2 點 45 分   我仲叫埋家姐 3 點一定要叫醒我呀   拎唔到護照我就死梗   哈哈   不過其實我都教咗鬧鐘   不過都係雙重保障穩陣 d 呢 ~ 

雖然約咗 4 點拎護照   但我都醒咗   所以我都出發 lu   去到佢地比即場籌我呀   所以我等咗 20 分鐘就搞掂   好感恩呢   因為上次里奧大人等咗 1 個鐘呀 ~

呢排個人比較攰   所以想去買衫   感恩又比我買到 3 件 tee 同 1 件 one piece   仲買咗件 tee 比家姐   個袋太重喇   所以走人 lu ~

我搭地鐵去官塘   咁順便行下 Aeon 買嘢飲   咁啱媽咪打黎話要買王林蘋果同脫脂奶   又係好感恩啦   因為我本身諗住由藍田直接去醫院   但又唔見醫生打黎   所以就去 Aeon 行陣   因為喺病房出面坐真係好辛苦囉 ~

坐 van 仔去醫院   5 點都到咗 lu   咁就打機解悶啦   6 點一開門即入去咯 ~

頭先聽到廣播   醫院依家取消咗 12 點至 1 點探病時間   咁我見到媽咪即講比佢知   唔係一陣叫工人黎拎嘢比佢   我講完之後   佢 d 語氣好差咁同我講話今日心臟病發   食咗粒脷底丸   果下有 d 驚   但佢 d 語氣唔多好   所以都無理佢   咁我咁啱隻手摸個鼻   佢以為我喊   我話我唔會喊喎   之後佢無啦啦又話驚想見下我地   都唔知想點   驚就咪鬧人丫嘛 ~

之後佢個朋友黎探佢   不過媽咪好攰   同埋想抹身   所以佢個朋友坐到 6 點半都走喇 ~

咁我去問當值姑娘   媽咪今日係咪心臟病發   姑娘話唔係心臟病   係血糖太低   所以暈   之後又話頭痛   呢樣痛果樣痛   咁醫生巡房嘅時候   媽咪話心口翳住唔舒服   所以醫生開咗粒脷底丸佢食囉   因為姑娘話頭痛醫頭   腳痛醫腳   咁最嚴重係心臟問題   咁當然第一樣行先啦   之後仲抽咗 2 次血   我唔記得話驗 d 咩酵素   只記得佢話心臟病發就要驗呢樣嘢囉   但 2 次嘅報告正常   所以唔係心臟病發 ~

好在我問一問姑娘咋   之後講番比媽咪聽話佢唔係心臟病   佢無咁驚啦   之後仲有胃口食嘢添   又話我駛咩見醫生丫  妳識 d 咩   一陣講咗 d 嘢   醫生唔理佢就慘   嘩   佢講呢句我真係發火啦   大佬   我關心妳先想見醫生咋   同埋我話如果醫生真係聽我講   果個就唔係醫生啦 ~

之後佢無啦啦發工人脾氣   話佢好話比朋友知佢入院   我話得啦   總之咩人打黎都唔好聽   之後佢又繼續講講講   9 唔搭 8 係咁嘈嘈嘈   搞到我發顛   佢講咩   我都話得啦得啦   又話唔舒服仲咁多嘢講   留番啖氣啦   唔係一陣又話無氣依樣果樣   丫   點知佢又再嘈第 d 喇喎   真係激到我顛   我即 whatsapp 比家姐   話媽咪痴痴地   係咪嘈嘈嘈   我叫佢一陣唔好打黎   等我喊完先好打黎   因為我真係好激氣   正想叫埋里奧大人唔好打黎   點知佢打黎問媽咪有無事   我即刻喊咗出黎呀   嚇到佢死   以為媽咪有事   我話媽咪無事   不過媽咪係咁嘈嘈嘈   激到我喊啫   我話喊完先再打比佢 ~

我呀   激到喉嚨兩邊好脹呀   抖唔到氣咁   勁想叫姑娘比粒脷底丸我食添呀 ~

差唔多 8 點 15 分走呀   媽咪成日 8 點先叫工人拎嘢   搞到我地比姑娘話探病時間過咗   唉 ~

同工人一齊打的番屋企   最搞笑里奧大人話同我食部隊鍋   因為我尋晚想食嘛   所以佢咪今晚特登陪我食囉   食完之後我話   人地今晚慶合合   仲同我食部隊鍋   嫌我未夠慶咩   哈哈 ~

里奧大人想買 headphone   所以就去商場睇下   感恩買到 Beat Monster   咁唔駛成日再去搵 headphone 呢 ~

番到屋企沖涼喇   之後休息   雖然聽日假期   但 11 點半都瞓喇 ~