牛肉飯 + 雞扎 ( 外賣 ) @ 屋企 ( 12-MAY-2014 )

( 12-MAY-2014  MON )

瞓晚瞓得唔錯噃   今朝都幾精神   好難得星期一會精神架   哈 ~

早餐食芝腿治烘底   點知佢比錯芝腿蛋治烘底   最勁係我食嘅時候都唔覺   食咗幾啖先望下   原來佢地比錯咗   呵呵 ~

菇場勁忙呀   好在 11 點幾搞掂 ~

晏晝同 PMS 食 lunch   我講明話想食酸辣米線   估唔到佢就係想食酸辣米線先約我呢   之後我話今次要小辣同埋唔食雲吞   因為食雲吞食到好悶   佢咁啱又係咁諗   搞笑 ~

食完就去行 Mikiki   有間舖頭買飾物做 Promo   $99/3 件   超勁抵呀   我同佢買咗全場最大嘅頸鍊   所以加埋一齊拎都好重囉   無啦啦買到平嘢   真係好鬼開心呀 ~

菇場唔忙   實在太好   我唔太鍾意晏晝忙   因為樣樣都變得好急趕咁   同埋我想準時走嘛   所以咩都快快手做哂   但其實係唔趕咁囉 ~

放工搭 13D   差唔多 5 點 50 分先有車   架巴士焗到暈呀   唔明司機點頂得順 ~   

6 點 20 分先到醫院   家姐無耐都黎埋 lu   媽咪話本來今日出院   因為媽咪肺炎   所以吊緊抗生素藥水   咁但醫生話睇下可唔可以用藥丸代替藥水   搞咗 1 個鐘   同媽咪講唔好意思   因為無得將藥水代替藥丸   所以唔出得院   嚇到媽咪喊   因為明明話出得院   之後話唔可以出院   驚自己有咩事嘛   不過其實如果無咩問題   都應該呢一兩日出院架喇   因為媽咪都精神嘛 ~

8 點走人   又係打的送埋工人番屋企先   但里奧大人又未放工   我又唔想煮麵   所以沖埋涼先再諗食咩   不過就唔會出街食囉 ~

里奧大人差唔多 8 點 15 分先放工   咁我叫佢買唐記牛肉飯番屋企食算 lu ~

我覺得自己好衰咁   雖然我探媽咪好攰   但其實里奧大人做到 8 點都好攰啦   仲要買外賣   慘 ~

食完就睇電視   又係 11 點半先瞓 ~