元氣壽司 @ 九龍灣 ( 13-MAY-2014 )

帶子裙邊

我其實都鍾意將所有壽司放埋隻碟度   好似好豐富咁   不過我就鍾意分類咁擺囉   即係炸嘅一碟   生嘅一碟咁口呢   因為佢咁樣擺   其實等耐咗之餘 ( 等埋炸物 ) 又要快食咗 ( 因為紫菜好快林 )   下次都係分開叫   記得嘅話

玉米蝦船 - 我好鍾意食腐皮壽司架   甜甜地好味道   但最好就有 d 餡咁啦   唔係就好似食嚿飯咁   哈   

炸蝦天婦羅

吉列炸蠔

飛魚子 - 好耐無食喇   今晚想食呀

迷你泡芙 - 里奧大人話食完鹹要食甜喎 

( 13-MAY-2014  TUE )

今朝又落雨喇   所以又帶直身遮   但其實真係好易唔記得拎   因為餐廳會有桶比妳放遮   但如果走嘅時候無落雨嘅話   真係會唔記得拎番把遮囉   咁就蝕哂喇   哈 ~

早餐食奶油脆豬仔包   估唔到又夠飽喎 ~

菇場忙咗陣就 hea   大粒又唔喺度   真係勁上網架   好難得家嘛 ~

家姐 10 點幾打黎話媽咪可以出院   感恩呀   我果下當堂精神哂   因為我終於可以抖下   哈 ~

之後家姐話醫生會打比佢   講 d 新藥嘅嘢   但家姐要開會   所以就飛線去我電話度   咁就唔會 miss call   咁又係呀   難得醫生搵妳嘛 ~

本來諗住 Lunch time 出去入票   依家唔啦   費事一陣落 lift 醫生就打黎   呢 d 好邪家嘛   所以都係留喺菇場食烏冬算喇 ~

家姐特登買比我嘅烏冬   佢講到好好食咁   但其實佢係未食過囉   暈 @@

最後要叮 1 分鐘先熟   雖然幾好味   但我叫家姐唔好再買比我喇   因為又焗又叮好麻煩呀   哈

醫生又話 12 點至 2 點打黎   到 2 點幾都未打黎   我都預咗唔打架喇   但估唔到 4 點打黎   但最搞笑其實係留咗家姐電話   但唔知點解打比我   不過打比我都好   因為我寫好咗有咩要問嘛 ~

原來醫生話媽咪 d 指數係應該要食薄血丸   係預防中風嘅   不過食呢隻藥丸就一定要好有記性喇   因為食多食小唔記得食都會有影響   同埋出血風險好高   如果撞親呀   牙周病呢 d 就會大量出血   最嚴重嘅係會腦出血   做手術都會有出血風險架   好恐怖   同埋每星期要去醫院抽血一次 check 住 d 度數   同埋一定要戒口  比糖尿戒口仲犀利   菠菜呢 d 都唔食得 ~   

咁另一種新藥就要自己比錢喺出面藥房買嘅   $900 一個月   食呢隻藥就唔駛驗血同戒口   講到好好咁   就係因為唔駛驗血   所以如果要做手術呢   就要等藥氣過咗先可以做   講緊嘅係遲幾個鐘先做  咁仲得了咩   所以醫生都唔太建議新藥   但媽咪話自己無記性   所以醫生都驚媽咪食錯份量   所以想我地同媽咪講解下先囉 ~

諗住放工可以番屋企   點知家姐打黎話要上病房幫媽咪拎藥   順便聽埋點樣食   咁所以我放工就行陣先   之後再坐巴士去醫院 join 埋家姐一齊上病房喇 ~

家姐差唔多 6 點半就到喇   即上病房啦   原來係要拎覆診紙 類固醇同抗生素   同埋有一隻藥係唔駛再食   姑娘好好人呀   寫埋另一個名比我地   因為有次又係要拎藥比姑娘睇   又係同藥但唔同名   我鬼識咩   所以要再去醫院比姑娘睇   嘥哂 d 時間   一早寫埋咪好囉 ~

拎完就打的去媽咪屋企   咁家姐話番比媽咪知   覆診日期點點點   媽咪又問駛唔駛抽血又依樣果樣   仲要想發脾氣好話家姐唔問清楚咁   所以我咪話妳依家先黎講   一早講埋我地就問埋姑娘點啦   之後到我講番 d 新藥同薄血丸嘅風險比佢知   我講咗薄血丸呢三個字咋   佢就話叫我唔駛講喇   果下我火都黎即話佢啦   又話叫醫生打比我地講 d 藥點食   依家講妳知妳又話唔駛   咁妳叫醫生打比我做咩呀 ?!   不過我其實都唔主張媽咪食呢兩隻藥   樣樣都要驚住就住   好有壓力   咁樣仲易病   所以我都費左事同佢講   我已經攰啦嘛   仲咁態度   真係好討厭 ~

同家姐一齊走   佢話頭先特登講我咀唇白哂嚇媽咪   我地咁攰仲幫佢拎藥   佢仲咁態度   我覺得家姐好搞笑呀   好在媽咪都叫工人即刻拎鮮奶比我飲   如果唔係真係唔再理佢呀   哈 ~

差唔多 8 點里奧大人打黎話放工   仲話想食壽司   不過我要番屋企放低 d 罐頭先囉   因為我買咗 6 罐粟米湯   3 罐椰果同 1 罐大樹菠蘿   如果要拎到去元氣   我應該會斷氣 ~

估唔到 8 點半都要等位   等到差唔多 9 點先開餐   食宵夜   哈哈 ~

我呢排真係比媽咪激到火滾   但我又學唔到家姐同里奧大人咁冷靜對媽咪   佢地話只要唔出聲就得架喇   但我又忍唔鬼到囉   所以佢地咪話我攞黎激氣囉   哈   之後我問里奧大人我頭先又鬧媽咪衰唔衰   佢都話媽咪唔抵爭呀   幾驚佢話我衰呀   哈   不過佢形容媽咪係日日食飽飯   唔知道咩叫做餓嘅人黎   所以唔珍惜囉 ~

其實家姐真係好忍得架   因為好記得我上年去韶關旅行   咁啱媽咪又入院   咁家姐一定要探啦   果時佢連晏晝同探埋架   買飯比媽咪食   不過媽咪又係咁鬧鬧鬧   家姐打黎同我呻呀   佢好小會咁家嘛   我仲喺大陸添   之後里奧大人偷影我講電話個樣   縐哂眉架我   咁之後要行番去搭車   我仲同里奧大人講係咪行錯路   因為頭先無行過咁喎   佢話我頭先講電話無留意   果次真係傾咗半個鐘都有   無計啦   家姐要呻下嘛   佢仲係喊完先打比我呀   佢喺媽咪同工人面前喊   話點解成日鬧佢呀   家姐咁忍得都喊   可想而知佢幾咁激氣呢 ~

嘩   出面好焗熱呀   最驚呢 d 天氣   所以食完就番屋企   咩都唔做即沖涼喇 ~

睇陣電視   11 點 15 分就瞓喇   早咗 15 分鐘瞓都唔錯   不過我覺得最理想係 11 點就瞓呢 ~