蒜頭豆豉蒸排骨 + 豉油王炒麵 + 蕃茄薯仔紅衫魚湯 ( 18-MAY-2014 )

( 18-MAY-2014  SUN )

今朝 10 點起身   梳洗完就落去食早餐   之後番屋企沖埋涼   仲可以抖多陣先出發去教會   今朝終於番到教會喇   實在太耐無番   唔係咁好啦 ~

里奧大人要做公司嘢   所以崇拜完之後都番屋企 lu   本來我想去街市買餸   不過開始落毛毛雨   所以都係番屋企   里奧大人係都叫我唔好煮   但我真係想煮囉   唔想成日出街食飯   好無益囉 ~ 

差唔多 2 點半去食 tea   我要飲凍咖啡   所以講明要去大快活   佢 d 凍咖啡真係好好飲呢   早午餐都喺大快活   好在里奧大人話 ok 啫   嘻嘻 ~

食完就自己去街市買餸   買兩晚餸架   不過我拎嘅時候都覺得好奇怪   平時買兩晚都唔會咁重家嘛   所以番到屋企拎哂 d 嘢出黎睇   原來買多咗 2 pack 娃娃菜同 4 條粟米   咁算啦   星期二唔駛特登去街市買菜   咁都好   哈哈   因為呢排成日落雨   真係唔想成日去街市呢 ~   

丫   出面真係好鬼焗熱呀   又忍唔住沖個涼   立痴痴真係好難頂呀 ~      

家姐姐夫今日上咗大陸玩   4 點幾 whatsapp 我   咁啱我就想抖抖   之後佢直頭打電話黎傾計   即係我無得抖啦   哈 ~      

好喇   5 點幾開始煮嘢   我勁啦   其實隻右手好痛架   屈一屈都痛   之前喺泰國買咗支 cool 按摩膏   d 人又話好有料   都唔係嘅   哈哈 ~

7 點幾有得食算快啦   不過今餐其實都好簡單呢 ~   

是日晚餐 - 蒜頭豆豉蒸排骨 + 豉油王炒麵 + 蕃茄薯仔紅衫魚湯  

蒜頭豆豉蒸排骨 - 上次整得唔好食   所以今次再接再厲   最緊要記得蒜頭豆豉加豉油囉   所以都幾好味道   同埋講真   我無諗過 d 豆豉係無味囉 ~  

豉油王炒麵 - 里奧大人話想食炒麵   初初其實我諗住煮飯嘅   因為蒜頭豆豉汁應該送飯家嘛   後尾我煮飯嘅時候根本唔餓   所以都唔想食飯   咁就扮好人扮麵比佢食   佢見到碟麵都好出奇   因為我之前話唔會炒麵嘛  ~ 

蕃茄薯仔紅衫魚湯 - 本身諗住蕃茄薯仔排骨湯嘅   咁之後就將 d 排骨炒兩炒就當一碟餸   不過見到有 $20/份嘅紅衫魚仔   所以忍唔住買呢   最正係佢幫我劏埋魚肚   買開果間唔劏架   所以我下次都黎埋呢檔買   買咗 3 個大蕃茄 + 1 個中型薯仔都要 $18   依家買嘢真係好貴囉 ~

搞掂哂都係 8 點幾   沖埋涼就休息喇   同里奧大人一齊睇電視   11 點半就瞓 lu ~