黑椒牛扒 + 瑤柱節瓜 + 蒜蓉菜心 ( 8-MAY-2014 )

( 8-MAY-2014  THU )

瞓晚瞓得麻麻地   所以今朝都唔太想起身 ~

今朝食麵餐   但真係食唔哂   同埋食到有 d 反胃   可能唔餓呀   哈 ~

菇場忙啦   對手完全未停過   又要做 report   對住 d 數字真係頭都暈 ~

1 點幾先開餐   就係朱古力奶 + 10 粒 flakes   其實仲未餓   不過唔食唔得   因為我要準時開工呢 ~

忙呀忙   超級勁攰呀   放工都仲未做完   不過對眼真係好攰   所以聽朝再博殺過 ~

又去百佳買菜   之後就番屋企預備晚餐 lu ~   

今晚自己食先   所以 7 點半可以開餐   里奧大人 8 點放工   佢話對鞋太線   落到最後一級扶手電梯就向後仆呀   好在有個背囊頂住   唔係就慘啦   之後佢話驚整爆部電腦   我問有無人扶佢   佢話自己起身之後再跑入車廂   我咪話佢痴囉   明知地下濕立立就咪跑啦 ~            

佢番到屋企問佢痛唔痛   佢話背脊同左手有 d 痛喎   我話勁痛就即睇醫生   唔可以拖囉 ~

是日晚餐 - 黑椒牛扒 + 瑤柱節瓜 + 蒜蓉菜心  

黑椒牛扒 - 仲諗住屋企有黑椒汁   估唔到原來無哂   好在頭先買咗李錦記黑椒汁   其實可以煮茄汁   不過我想食 d 惹味 d 嘅嘢呢 ~  

瑤柱節瓜 - 勁呀   d 節瓜放喺雪柜成個星期都未壞   所以整埋佢喇 ~  

蒜蓉菜心 - $8.9/pack   不過唔甜嘅 ~ 

之後我沖涼喇   等埋佢沖完涼再問佢痛唔痛   佢話唔痛喇喎   咁我都安心 d ~

9 點幾行雷閃電   又係睇住由黃雨變紅雨再變黑雨   睇黎有排落 ~

勁攰呀   所以 11 點瞓喇 ~