廣島蠔蟹捧冬蔭功上海麵 + 五指毛桃豬骨湯 ( 17-MAR-2019 )

( 17-MAR-2019  SUN )

今朝 9 點 45 分起身   沖埋涼就去食早餐喇 ~

食完就番教會   崇拜之後就為短宣開會   之後我再同弟兄開會   搞掂哂都差唔多 2 點 lu ~

買完餸就番屋企   抖陣再食個麵包   里奧大人就食 Flakes ~

里奧大人做公司嘢   我就做家務啦 ~

煲落湯就再執下嘢   里奧大人就瞓晏覺   差唔多 5 點半飲湯   7 點開餐   早食早休息   哈哈 ~

是日懶餐 - 廣島蠔蟹捧冬蔭功上海麵 + 五指毛桃豬骨湯

廣島蠔蟹捧冬蔭功上海麵 - 終於清哂包廣島蠔同上海麵   第時都唔好買咁大包急凍蠔   成日記住要食真係好辛苦   哈哈 ~

五指毛桃豬骨湯 - 家姐之前買咗好多湯包   呢個都係五指毛桃潤肺湯包 (五拍毛桃 / 百合 / 象牙椰子 / 玉竹 / 蜜棗)   但姐夫唔鍾意五指毛桃嘅味道   所以比哂所有湯包比我   好似有 8 包   不過我都會煲嘅   因為好方便   今次都只係加咗西施骨 粟米 紅蘿蔔就搞掂 ~

搞掂哂都只係 8 點   同里奧大人去徑步   之後再去超市買嘢 ~

番到屋企即開機洗衫   沖埋涼就休息喇 ~

家姐依家成日會 Send Berry 嘅相比我睇   咁我錄 "Berry" 比家姐   Berry 聽到就望住門口   之後工人居然同 Berry 講話有無掛住新媽咪呀 ?!   家姐話聽到佢咁講   都差啲噴水呀   哈哈 ~

依家佢好多新玩具   但其實依家啲玩具真係好唔襟咬   哈哈哈哈

今晚開始   同里奧大人一齊靈修半個鐘   我好希望今年睇哂一本聖經呢   求主加力 ~

不過 11 點幾都瞓喇   聽日要番工呢 ~